បុគ្គលិកក្រុមហ៊ុនកាស៊ីណូណាហ្គាវើលដ៍ (Naga World) មួយចំនួនប្តេជ្ញាថានឹងធ្វើកូដកម្មអហិង្សារាល់ថ្ងៃរហូតដល់មានការដោះលែងថ្នាក់ដឹកនាំសហជីព និងទាមទារឱ្យក្រុមហ៊ុនទូទាត់ប្រាក់បំណាច់បញ្ចប់កិច្ចសន្យាការងារតាមច្បាប់កំណត់ បើទោះបីជាការតវ៉ារបស់ពួកគាត់មានការរារំាងពីសមត្ថកិច្ចក្តី។
កូដករនៅក្រុមហ៊ុនណាហ្គាវើលដ៍ អ្នកនាង ម៉ៅ ម៉ាណែត មានប្រសាសន៍ប្រាប់វីអូឌីនៅថ្ងៃអាទិត្យនេះថា រយៈពេលជាង២០ថ្ងៃមកហើយ ដែលពួកគេនាំគ្នាបន្តធ្វើកូដកម្មនៅក្បែរក្រុមហ៊ុន ដើម្បីទាមទារឱ្យក្រុមហ៊ុនទូទាត់ប្រាក់បំណាច់បញ្ចប់កិច្ចសន្យាការងារតាមច្បាប់កំណត់ ប៉ុន្តែអ្នកនាងថា កំឡុងពេលធ្វើកូដកម្មដោយអហិង្សានេះ ក្រុមសមត្ថកិច្ចបានចាប់ខ្លួនថ្នាក់ដឹកនាំសហជីព និងតំណាងពួកគេជាបន្តបន្ទាប់ដាក់ពន្ធនាគារចំនួន ៨នាក់។
ករណីនេះអ្នកនាងប្តេជ្ញាថា ពួកគេនៅតែបន្តប្រមូលផ្តុំគ្នានៅក្បែរក្រុមហ៊ុនជារៀងរាល់ថ្ងៃ ដើម្បីទាមទារឱ្យដោះលែងថ្នាក់ដឹកនាំសហជីព និងទាមទារឱ្យក្រុមហ៊ុនទូទាត់បំណាច់បញ្ចប់កិច្ចសន្យាការងារតាមច្បាប់កំណត់។
អ្នកនាងនិយាយថា៖ «ចាប់តំណាងខ្ញុំ ៨នាក់ដាក់ពន្ធនាគារ ពួកខ្ញុំបានប្រគល់សិទ្ធិជូនតំណាងខ្ញុំអស់ហើយ។ បើចង់ដោះស្រាយនិងចូលតុចចាជាមួយក្រុមហ៊ុន លុះត្រាតែដោះលែងតំណាងពួកខ្ញុំមកវិញ។ បើអត់ដោះលែងទេ ពួកខ្ញុំមិនចូលដោះស្រាយ និងបន្តធ្វើកូដកម្មជារៀងរាល់ថ្ងៃរហូតមានដំណោះស្រាយ»។
កូដករម្នាក់ទៀត អ្នកនាង ម៉ៅ គឹមឡាយ រៀបរាប់ថា ពួកគាត់ធ្វើកូដកម្មដោយអហិង្សា ប៉ុន្តែសមត្ថកិច្ចបានដាក់របាំងបិទផ្លូវនៅម្តុំវិមានរដ្ឋសភាជាតិ ដោយមិនឱ្យពួកគេទៅជួបជុំនៅមុខក្រុមហ៊ុនណាហ្គាវើលដ៍នោះទេ ។ អ្នកនាងចាត់ទុកការរាំងរបស់សមត្ថកិច្ចថា ជាការរឹតត្បិតសេរីភាពបញ្ចេញមតិ និងសេរីភាពជួបជុំដោយសន្តិវិធី ផ្ទុយពីច្បាប់ជាតិ និងច្បាប់អន្តរជាតិ ។
អ្នកនាងនិយាយថា៖ «ពួកខ្ញុំមានទំនាស់ជាមួយក្រុមហ៊ុនណាហ្គាវើលដ៍ គឺក្រុមហ៊ុនត្រូវដោះស្រាយជាមួយពួកខ្ញុំ ប៉ុន្តែអាជ្ញាធរបែរជាមកបិទផ្លូវ ដាក់របាំងមិនពួកខ្ញុំទៅមុខក្រុមហ៊ុនតវ៉ាទៅវិញ។ នេះជាការសិទ្ធិសេរីភាពការងារ និងការជួបជុំគ្នាដោយអហិង្សា ដោយសន្តិវិធីស្របតាមច្បាប់ គាត់អត់ត្រូវធ្វើចឹងទេ »។
ទោះបីជាក្រុមកូដករនាំគ្នាតវ៉ាបន្តនៅថ្ងៃនេះក្តី ប៉ុន្តែមិនមានតំណាងអាជ្ញាធរណាចុះទៅដោះស្រាយវិវាទការងារតាមការស្នើសុំរបស់ពួកគេឡើយ ក្រៅតែពីក្រុមសមត្ថកិច្ចនិងកម្លាំងសន្តិសុខជាច្រើននាក់ ដែលដាក់ឃ្លាំមើលសកម្មភាពធ្វើកូដកម្មរបស់ពួកគេប៉ុណ្ណោះ។
កាលពីថ្ងៃទី៦ ខែមករានេះ ក្រសួងការងារ និងបណ្ដុះបណ្ដាលវិជ្ជាជីវៈ បានចេញលិខិតជាថ្មីទៀតឱ្យតំណាងឬបុគ្គលិករបស់ក្រុមហ៊ុនណាហ្គាវើលដ៍ ចូលរួមប្រជុំពិនិត្យផ្ទៀងផ្ទាត់ឡើងវិញនូវការទូទាត់ប្រាក់បំណាច់បញ្ចប់កិច្ចសន្យាការងារ ចាប់ពីថ្ងៃទី៧ ខែមករា ឆ្នាំ២០២២ ដើម្បីដោះស្រាយបញ្ចប់វិវាទការងារនៅក្រុមហ៊ុនល្បែងមួយនេះ ប៉ុន្តែកូដករមួយចំនួនប្រកាន់ជំហរថា ពួកគេមិនជួបប្រជុំជាមួយក្រសួងនោះទេ ប្រសិនបើថ្នាក់ដឹកនាំសហជីពមិនត្រូវបានដោះលែង។
គិតចាប់តាំងពីការធ្វើកូដកម្មនៅថ្ងៃទី១៨ ខែធ្នូ ឆ្នាំ២០២១ មកដល់ពេលនេះមានរយៈពេល២២ថ្ងៃមកហើយ យ៉ាងហោចណាស់ ថ្នាក់ដឹកនាំសហជីព និងសមាជិកសរុបជិត៣០នាក់ ត្រូវបានអាជ្ញាធរចាប់ខ្លួនជាបន្តបន្ទាប់ ក្នុងនោះ ៨នាក់ រួមទាំងកញ្ញា ឈឹម ស៊ីថរ ប្រធានសហជីពផង ត្រូវបានតុលាការសម្រេចឃុំខ្លួនបណ្ដោះអាសន្ន ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌ។
ក្រុមអ្នកជំនាញអង្គការសិទ្ធិមនុស្សជាតិនិងអន្តរជាតិ បានថ្កោលទោសជាបន្តបន្ទាប់ចំពោះការចាប់ខ្លួន និងការឃុំខ្លួនថ្នាក់ដឹកនាំសហជីពណាហ្គាវើលដ៍ ដោយថា ការចាប់ខ្លួនធ្វើឡើងទាំងបំពានច្បាប់ និងរំលោភសិទ្ធិមនុស្ស ហើយពួកគេបានទាមទារឱ្យទម្លាក់ចោលការចោទប្រកាន់ជាបន្ទាន់ផងដែរ៕