មេដឹកនាំកម្ពុជាបកស្រាយពីអត្ថប្រយោជន៍នៃលទ្ធផលជំនួបជាមួយមេដឹកនាំរដ្ឋប្រហារយោធាមីយ៉ាន់ម៉ានាពេលថ្មីៗនេះថា បានផ្ដល់អត្ថប្រយោជន៍ដល់អាស៊ាននិងពលរដ្ឋមីយ៉ាន់ម៉ាផងដែរ ខណៈមានការរិះគន់ថា លទ្ធផលនោះជាការបោកបញ្ឆោតក្រសែភ្នែកអន្តរជាតិ។
កាលពីថ្ងៃទី៧ ខែមករា ឆ្នាំ២០២២ លោកនាយករដ្ឋមន្ត្រី ហ៊ុន សែន មេដឹកនាំកម្ពុជាបានជួបមេដឹកនាំរដ្ឋប្រហារយោធាមីយ៉ាន់ម៉ា លោក មីន អ៊ុងឡាំង។ ក្រោយជំនួប កម្ពុជា តាមរយៈក្រសួងការបរទេស បានបញ្ជាក់ក្នុងសេចក្ដីប្រកាសព័ត៌មានចុះថ្ងៃទី៧ ខែមករា ឆ្នាំ២០២២ រដ្ឋាភិបាលរបស់លោក មីន អ៊ុងឡាំង ព្រមទទួលយកយន្តការឈប់បាញ់ជាមួយអង្គការប្រដាប់អាវុធលើជនជាតិភាគតិចទាំងអស់រយៈពេល៥ខែ រហូតដល់ចុងខែកុម្ភៈ ឆ្នាំ២០២២ និងសម្រេចពន្យារពេលបទឈប់បាញ់គ្នានេះបន្ថែមទៀតរហូតដល់ចុងឆ្នាំ២០២២។
ក្នុងពីធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ៥ នៅខេត្តបាត់ដំបង នាថ្ងៃចន្ទនេះ លោកនាយករដ្ឋមន្ត្រី ហ៊ុន សែន ថ្លែងថា កិច្ចព្រមព្រៀងនៃការឈប់បាញ់បានដើរតួនាទីសំខាន់ជាងអ្វីទាំងអស់សម្រាប់ការស្វែងរកដំណោះស្រាយវិបត្តិនៅមីយ៉ាន់ម៉ា។
មេដឹកនាំកម្ពុជាបានគូសបញ្ជាក់ថា កាលណាបទឈប់បាញ់ត្រូវបានដោះស្រាយ ជំនួយមនុស្សធម៌នឹងចូលទៅប្រទេសនៅគ្រប់ទីកន្លែង រីឯការសន្ទនាស្វែងរកដំណោះស្រាយផ្សេងទៀតដែលមានចែងក្នុងចំណុចទី៥នៃកុងសង់ស៊ីសអាស៊ាន វានឹងបើកផ្លូវផងដែរ។
មួយវិញទៀត លោកនាយករដ្ឋមន្ត្រី ហ៊ុន សែន ថ្លែងដែរថា លទ្ធផលនៃបទឈប់បាញ់នេះ ពលរដ្ឋភូមាក៏អាចចៀសផុតពីអំពើហិង្សា ការបាញ់ប្រហារពីសំណាក់យោធា និងទទួលបានជំនួយផ្សេងៗ រួមទាំងវ៉ាក់សាំងប្រឆាំងនឹងជំងឺកូវីដ-១៩ តាមរយៈលទ្ធផលជំនួបដំបូងនេះផងដែរ។
លោកថា៖ «អ្នកណាប្រឆាំងបទឈប់បាញ់ អ្នកហ្នឹងចង់ឱ្យសង្គ្រាមផ្ទុះ ហើយឱ្យមានមនុស្សស្លាប់និងរបួស អ្នកណាប្រឆាំងនឹងការផ្ដល់ជំនួយ អ្នកហ្នឹងចង់ឱ្យមនុស្សស្លាប់ដោយអត់បាយ ស្លាប់ដោយអត់ថ្នាំពេទ្យ ស្លាប់ដោយអត់វ៉ាក់សាំងចាក់ អ្វីដែលខ្ញុំនិយាយគឺប៉ុណ្ណឹង ល្មមយល់គ្នា»។
មន្ត្រីជាន់ខ្ពស់អតីតគណបក្សសង្គ្រោះជាតិ ដែលតុលាការបានរំលាយ លោក មាជ សុវណ្ណារ៉ា មើលឃើញថា ការប្រកាសឈប់បាញ់របស់មេដឹកនាំមីយ៉ាន់ម៉ា ជារឿងវិជ្ជមានមួយ។ ប៉ុន្តែ លោកមើលឃើញថា ជំនួបរវាងមេដឹកនាំកម្ពុជា និងមេដឹកនាំរបបយោធាមីយ៉ាន់ម៉ានោះ មិនបាននិយាយដល់ការបើកលំហរសេរីភាពរបស់ លោកស្រី អ៊ុងសាន ស៊ូជី ដែលត្រូវបានរបបសឹកយោធាមីយ៉ាន់ម៉ាចាប់ឃុំខ្លួននោះទេ ដែលមានន័យថា ជំនួបនោះ នៅមិនទាន់ដោះស្រាយ និងឆ្លើយតបទៅនឹងឆន្ទះរបស់ពលរដ្ឋមីយ៉ាន់ម៉ាដែរ។
លោកថា៖ «យើងប្រកាសឈប់បាញ់គ្នាៗ តែយើងអត់បើកលំហប្រជាធិបតេយ្យនិងសិទ្ធិមនុស្ស ហើយបើកឱ្យប្រជាពលរដ្ឋតវ៉ាដោយអហិង្សា កុំឱ្យរដ្ឋាភិបាលផ្តាច់ការដោយមេដឹកនាំរដ្ឋប្រហារយោធាភូមាហ្នឹងទៅបង្ក្រាបដោយហិង្សា អាហ្នឹងក៏បង្ហាញដោយមេដឹកនាំយោធាហ្នឹងជាមុនសិនដែរ»។
ស្ថាបនិកអតីតគណបក្សសង្គ្រោះជាតិ លោក សម រង្ស៊ី ដែលកំពុងនិរទេសខ្លួនដើម្បីគេចចេញពីការចាប់ខ្លួនខាងនយោបាយនោះ បានបង្ហោះសារនៅលើហ្វេសប៊ុករបស់លោកនៅថ្ងៃទី៩ ខែមករានេះថា ដំណើរទស្សនកិច្ចរបស់មេដឹកនាំបក្សកាន់អំណាចកម្ពុជានេះ ត្រូវបានប្រជាពលរដ្ឋមីយ៉ាន់ម៉ាថ្កោលទោសថា បានលើកទឹកចិត្តដល់ជនផ្ដាច់ការដែលជាមេរដ្ឋប្រហារយោធាមានបាតដៃប្រឡាក់ឈាមនៃរបបសឹកមីយ៉ានម៉ា។
លោក សម រង្ស៊ី ចាត់ទុកសេចក្ដីថ្លែងការណ៍រួមនោះថា៖ «គ្រាន់តែឆ្លុះបញ្ចាំងពីការប៉ុនប៉ងបោកបញ្ឆោតសាធារណមតិអន្តរជាតិតែប៉ុណ្ណោះ។ អ្វីដែលប្រជារាស្ត្រភូមាចង់បាន គឺការបញ្ឈប់នូវរាល់អំពើហិង្សាមកលើប្រជាពលរដ្ឋគ្រប់ទីកន្លែងនិងគ្រប់មជ្ឈដ្ឋាន ដែលទាមទារដោយសន្តិវិធីឱ្យគោរពឆន្ទៈប្រជារាស្ត្រ ដូចបានសម្ដែងតាមរយៈការបោះឆ្នោតឆ្នាំ២០១៥ និង២០២០។ ក្នុងការបោះឆ្នោតនោះ គណបក្សលោកស្រី អ៊ុងសាន ស៊ូជី បានទទួលការគាំទ្រជាង៨០ភាគរយពីអ្នកបោះឆ្នោតទូទាំងប្រទេស»។
អ្នកសិក្សាស្រាវជ្រាវនៅវិទ្យាស្ថានខ្មែរសម្រាប់សហប្រតិបត្តិការ និងសន្តិភាព លោក វណ្ណ ប៊ុនណា ធ្លាប់ផ្តល់បទសម្ភាសន៍ជាមួយវីអូឌីកាលពីថ្ងៃសុក្រថា គេមិនត្រូវមានជំនឿខ្លាំងពេកពីដំណើររបស់មេដឹកនាំកម្ពុជា ទៅកាន់ប្រទេសមីយ៉ាន់ម៉ា ឬភូមាជាលើកដំបូងនេះពេកទេ បើទោះបីលោកមើលឃើញថា ការដោះស្រាយបញ្ហានយោបាយគ្មានជម្រើសណាល្អជាងការចរចានយោបាយក៏ដោយ។
លោកបន្តថា ក្នុងដំណើរទៅកាន់ប្រទេសមីយ៉ាន់ម៉ា កម្ពុជាចង់សម្រេចបានក្រមប្រតិបត្តិនៃភាគីជម្លោះមហាសមុទ្រចិនខាងត្បូង ឬហៅថាCoC ក្នុងនាមខ្លួនជាប្រធានអាស៊ានប្តូរវេននៅពេលនេះ (CoCជាឯកសារកំណត់យន្តការ និងនីតិវិធីក្នុងការដោះស្រាយបញ្ហាសមុទ្រចិនខាងត្បូង)។
លោកថា៖ «អីចឹងទេ ដើម្បីសម្រេចបានអាកិច្ចព្រមព្រៀងហ្នឹង ល្គិកណាភាគីអាស៊ានមាន១០ប្រទេស ដើម្បីចុះហត្ថលេខាបើសិនជាអាស៊ានខ្វះមួយឬក៏អាស៊ាន៩ទេ វាធ្វើឱ្យអាដំណើរការ ឬការចុះហត្ថលេខាCOCរវាងអាស៊ាននិងចិនហ្នឹង វាមិនអាចដំណើរការទៅបាន»។
មហាសមុទ្រចិនខាងត្បូង ថ្វីបើពេលនេះគ្រប់គ្រងដោយមហាអំណាចចិន ប៉ុន្តែកំពុងមានជម្លោះជាមួយប្រទេសចំនួន៤ទៀត ជាសមាជិកអាស៊ាន ក្នុងនោះមានប្រទេសវៀតណាម ម៉ាឡេស៊ី ព្រុយណេ និងហ្វីលីពីន។
យ៉ាងណាក៏ដោយ ក្នុងដំណើរឆ្ពោះទៅកាន់ប្រទេសមីយ៉ាន់ម៉ារបស់មេដឹកនាំកម្ពុជានេះ ស្ថាប័នជាតិ និងអន្តរជាតិធំៗ រួមទាំង ពលរដ្ឋមីយ៉ាន់ម៉ាផង បន្តថ្កោលទោស និងរិះគន់ថា ជាការគាំទ្ររដ្ឋប្រហារទម្លាក់រដ្ឋាភិបាលស៊ីវិលរបស់ លោកស្រី អ៊ុងសាន ស៊ូជី កាលពីថ្ងៃទី១ ខែកុម្ភៈ ឆ្នាំ២០២១៕
