អតីតប្រធានចលនាយុវជនរបស់គណបក្សសង្រ្គោះជាតិដែលត្រូវបានតុលាការរំលាយ នឹងវិលត្រលប់មកប្រទេសកម្ពុជាវិញនៅចុងសប្ដាហ៍នេះ ដើម្បីរស់នៅជាមួយក្រុមគ្រួសារវិញ ដោយមិនបារម្ភពីការចាប់ខ្លួននោះទេ ខណៈតុលាការនឹងប្រកាសសាលក្រមនៃសំណុំរឿងរបស់លោកនៅដើមសប្ដាហ៍ក្រោយនេះ។
លោក យឹម ស៊ីណន និងបក្ខពួក សរុប១០នាក់ ត្រូវបានតុលាការចោទប្រកាន់ពាក់ព័ន្ធនឹងសំណុំរឿងព្រឹត្តិការណ៍ ៩វិច្ឆិកា ឆ្នាំ២០១៩ ដែលត្រូវបានបង្កើតឡើងដោយលោក សម រង្ស៉ី សហស្ថាបនិកគណបក្សសង្រ្គោះជាតិដែលត្រូវបានតុលាការរំលាយ ដោយកំណត់ពេលវិលត្រលប់មកប្រទេសកម្ពុជាវិញ ជាមួយនឹងការអំពាវនាវឱ្យកងកម្លាំងប្រដាប់អាវុធប្រឆាំងរាជរដ្ឋាភិបាល និងអំពាវនាវឱ្យប្រជាពលរដ្ឋងើបបះបោរ។
អតីតប្រធានចលនាយុវជនប្រចាំប្រទេសកូរ៉េខាងត្បូង របស់អតីតបក្សសង្រ្គោះជាតិដែលត្រូវបានតុលាការរំលាយ លោក យឹម ស៊ីណន បានប្រាប់ វីអូឌី ថាលោកនឹងវិលត្រលប់មកកម្ពុជានៅថ្ងៃទី១៥ ខែមករា ឆ្នាំ២០២២នេះ ដោយមិនបារម្ភពីការចាប់ខ្លួននោះទេ។ លោកបន្តថា លោកត្រូវមករួមរស់ជាមួយក្រុមគ្រួសារវិញ ហើយលោកក៏មិនចង់ទៅរស់នៅប្រទេសផ្សេងទៀតក្រៅពីប្រទេសកំណើតរបស់ខ្លួននោះដែរ។
លោកមានប្រសាសន៍ថា៖ «ការវិលត្រលប់ទៅរស់នៅកម្ពុជាវិញនេះ អត់មានមូលហេតុអីផ្សេងក្រៅពីការចង់រស់នៅជុំក្រុមគ្រួសារលើទឹកដីកំណើតជាទីស្រឡាញ់របស់ខ្ញុំនោះទេ ព្រោះខ្ញុំមិនដែលមានបំណងចង់រស់នៅប្រទេសទី២ឬទី៣ ក្រៅពីកម្ពុជានោះទេ»។
លោកមានប្រសាសន៍បន្ថែមថា៖ «តុលាការបានបើកជម្រះក្ដីខ្ញុំ និងអីតតសហការី កាលពីថ្ងៃទី១០ ខែមករា រួចហើយ។ សាលក្រមនឹងប្រកាសនៅថ្ងៃទី១៧ ខាងមុខនេះ។ ខ្ញុំនៅតែសង្ឃឹមថា តុលាការនឹងទម្លាក់ចោលនូវរាល់បទចោទទាំងឡាយមកលើរូបខ្ញុំ ព្រោះខ្ញុំមិនមានទោសកំហុសអ្វីដូចការចោទប្រកាន់នោះឡើយ»។
ទាក់ទិននឹងវិស័យនយោបាយវិញ លោក ស៊ីណន បញ្ជាក់ថា នៅក្នុងស្ថានការណ៍នយោបាយក្នុងប្រទេសកំពុងស្ថិតក្នុងជម្លោះនៃការខ្វែងទស្សនៈគ្នាបង្កជាកម្ដៅឆេះរោលបែបនេះ លោកមិនទាន់មានគោលដៅចូលប្រឡូកក្នុងនយោបាយនៅឡើយទេ។ ប៉ុន្តែបើសិនជាស្ថានការណ៍ធូរស្រាល លោកនឹងពិចារណាចូលប្រឡូកក្នុងវិស័យនយោបាយឡើងវិញ។
កាលពីថ្ងៃទី២៩ ខែកញ្ញា ឆ្នាំ២០២១ លោក យឹម ស៊ីណន និងបក្ខពួកចំនួន៩នាក់ផ្សេងទៀត បានផ្ញើលិខិតមួយស្នើសុំកិច្ចអន្តរាគមន៍ទៅលោកនាយករដ្ឋមន្ត្រី ហ៊ុន សែន ឱ្យដកការចោទប្រកាន់ទាំងឡាយទៅលើពួកគេដែលជាប់ពាក់ព័ន្ធនឹងព្រឹត្តិការណ៍វិលចូលស្រុករបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។
លិខិតរបស់លោក យឹម ស៊ីណន ពេលនោះ ត្រូវបានលោកនាយករដ្ឋមន្ត្រី ហ៊ុន សែន ប្រគល់ជូនទៅលោក កើត រិទ្ធ រដ្ឋមន្រ្តីក្រសួងយុត្តិធម៌ ដើម្បីពិនិត្យមើលនិងដោះស្រាយ ប៉ុន្តែមកទល់ពេលនេះ តុលាការនៅមិនទាន់សម្រេចបែបណានៅឡើយទេ៕