ធនាការជាតិនៃកម្ពុជាបានឱ្យដឹងថា នៅឆ្នាំ២០២២នេះ កម្ពុជាត្រូវជួបប្រទះវិបត្តិអតិផរណា ឬហៅម្យ៉ាងថាបញ្ហាទំនិញ ឬសេវាឡើងថ្លៃ រីឯប្រាក់ចុះថោកនោះ នឹងកើតមានរួមក្នុងអត្រា ២,៦ភាគរយ ដោយប្រៀបធៀបកាលពីឆ្នាំមុនអត្រាអតិផរណានេះមានការថយចុះបន្តិច។
ក្នុងរបាយការណ៍បូកសរុបការងារឆ្នាំ២០២១ និងដាក់ទិសដៅការងារឆ្នាំ២០២២ របស់ធនាគារជាតិនៃកម្ពុជាដែលចេញផ្សាយក្នុងសប្តាហ៍នេះបានឱ្យដឹងថា អតិផរណារួមសម្រាប់ឆ្នាំ២០២២នេះ អាចនឹងមានអត្រា២,៦% ខណៈអតិផរណារួមក្នុងឆ្នាំ២០២១ បានហក់ឡើងរហូតដល់៣% ហើយកាលពីឆ្នាំ២០២០ អត្រានេះស្ថិតក្នុងរង្វង់២,៩%។
ធនាការជាតិនៃកម្ពុជាបានឱ្យដឹងថា អតិផរណារួមក្នុងអត្រា ២,៦%នេះ ត្រូវបានព្យាករណ៍ដោយផ្អែកទៅលើកំណើនក្រុមថ្លៃម្ហូបអាហារនឹងបន្តថយចុះមកវិញ ដោយសារមានការជំរុញជាចម្បងដូចជាភាពប្រសើរឡើងនៃការផ្គត់ផ្គង់។ ការបន្តងើបឡើងវិញនៃប្រាក់ចំណូលពលរដ្ឋ និងកំណើនថ្លៃក្រុមទំនិញ និងសេវាកម្មដែលពាក់ព័ន្ធនឹងប្រេងឥន្ទនៈនឹងថយចុះតម្លៃមកវិញ ព្រមទាំងអត្រាប្តូរប្រាក់ផ្លូវការបន្តមានស្ថិរភាព ក្នុងរង្វង់៤ ០៧៥រៀលក្នុងមួយដុល្លារអាមេរិកផងដែរ។
ក្នុងរបាយការណ៍នោះបានឱ្យដឹងទៀតថា ក្នុងឆ្នាំ២០២១ កន្លងទៅ សេដ្ឋកិច្ចកម្ពុជាបន្តរងផលប៉ះពាល់ពីជំងឺកូវីដ-១៩ ដោយសារការអូសបន្លាយនៃការឆ្លងចូលសហគមន៍ព្រឹត្តិការណ៍២០កុម្ភៈ។
យ៉ាងណាក្តីស្ថាប័នជាតិមួយនេះ បញ្ជាក់ថាបើប្រៀបធៀបទៅនឹង ឆ្នាំ២០២០ ស្ថានភាពសេដ្ឋកិច្ចក្នុងឆ្នាំ២០២១ គឺមានល្អប្រសើរជាង ជាពិសេសចាប់តាំងពីឆមាសទី២ ឆ្នាំមុនមក។ ការងើបឡើងវិញនៃសេដ្ឋកិច្ចនៅឆ្នាំមុននោះ ធនាគារជាតិនៃកម្ពុជាអះអាងថា ដោយសារមានការងើបឡើងវិញនូវកំណើនសេដ្ឋកិច្ចពិភពលោក ការសម្របខ្លួនទៅនឹងប្រក្រតីភាពថ្មី និងជោគជ័យនៃការចាក់វ៉ាក់សាំងជូនប្រជាពលរដ្ឋ។ កត្តាជំរុញទាំងនេះ ដែលធ្វើឱ្យសេដ្ឋកិច្ចកម្ពុជាក្នុងឆ្នាំ២០២១ ត្រូវបានប៉ាន់ស្មានថាមានកំណើនក្នុងរង្វង់ប្រមាណ៣ភាគរយ។
ទោះបីជាយ៉ាងនេះក្តី អង្គការសហប្រជាជាតិ (UN) ប្រចាំកម្ពុជា កាលពីខែវិច្ឆិកា ឆ្នាំ២០២១ កន្លងទៅ ឱ្យដឹងថា គ្រួសារងាយរងគ្រោះដែលបណ្ដាលមកពីវិបត្តិកូវីដ-១៩ និងគ្រោះទឹកជំនន់រាប់ពាន់គ្រួសារ បានកាត់បន្ថយរបបអាហារប្រចាំថ្ងៃរបស់ពួកគេ ដោយគ្រួសារខ្លះក្នុងចំណោមនោះត្រូវបង្ខំចិត្តលក់ទ្រព្យសម្បត្តិ និងខ្ចីបុលគេកាន់តែច្រើន ដើម្បីយកមកដោះស្រាយជីវភាពដែលជាតម្រូវការចាំបាច់ប្រចាំថ្ងៃ៕