ក្រុមកូដករកាស៊ីណូណាហ្គាវើលដ៍ (Naga World) បានបន្តធ្វើយុទ្ធនាការដាក់ញត្តិទៅកាន់ស្ថានទូតប្រទេសលោកសេរីប្រចាំកម្ពុជាទៀត នៅថ្ងៃអង្គារនេះ ដើម្បីសុំឱ្យជួយអន្តរាគមន៍ជំរុញទៅរដ្ឋាភិបាលឱ្យមានការដោះស្រាយវិវាទការងារ និងដោះលែងថ្នាក់ដឹកនាំសហជីព៨នាក់ដែលត្រូវបានចាប់ឃុំខ្លួនដោយសារការពារផលប្រយោជន៍កម្មករនិងសហជីព។
កាលពីថ្ងៃទី១៧ ខែមករានេះ បុគ្គលិកកាស៊ីណូណាហ្គាវើលដ៍បាននាំគ្នាដាក់ញត្តិនៅស្ថានទូតបារាំង អង់គ្លេស អាល្លឺម៉ង់ សិង្ហបុរី កាណាដា សហភាពអឺរ៉ុប។ ដោយឡែក នៅថ្ងៃអង្គារទី១៨ ខែមករានេះ ពួកគាត់បានបន្តដាក់ញត្តិនៅស្ថានទូតជប៉ុន ម៉ាឡេស៊ី អូស្ត្រាលី កូរ៉េខាងត្បូង និងសហរដ្ឋមេរិកប្រចាំនៅកម្ពុជា។
បើតាមខ្លឹមសារញត្តិ ក្រុមអ្នកតវ៉ាបានស្នើដល់ស្ថានទូតប្រទេសលោកសេរីទាំងនោះជួយអន្តរាគមន៍ឱ្យមានការដោះលែងតំណាងសហជីព៨នាក់ ឃ្លាំមើលពួកគេធ្វើកូដកម្មអហិង្សាប្រចាំថ្ងៃ និងជំរុញទៅរដ្ឋាភិបាលកម្ពុជាឱ្យពង្រឹងការគោរពសិទ្ធិមនុស្សនិងសិទ្ធិការងារ ព្រមទាំងគោរពសិទ្ធិសហជីព ជាដើម។
កូដករកាស៊ីណូណាហ្គាវើលដ៍ម្នាក់ដែលមិនមានឈ្មោះបញ្ឈប់ពីការងារ កញ្ញា ឧកសុភ័ក្រ មូលីកា ប្រាប់ វីអូឌី នៅថ្ងៃអង្គារនេះថា ខាងស្ថានទូតបានទទួលញត្តិពួកគេហើយ។ កញ្ញាបន្តថា សម្រាប់ស្ថានទូតអូស្ត្រាលី បានអនុញ្ញាតឱ្យក្រុមអ្នកតវ៉ាចូលយកញត្តិទៅដាក់ដល់ក្នុងការិយាល័យ ហើយមន្ត្រីទូតបានសួរសុខទុក្ខពួកគាត់ និងសួរនាំពីដើមចមដែលនាំឱ្យមានការតវ៉ា ព្រមទាំងសួរនាំពីជំហររបស់ក្រុមកូដករទៅមុខទៀត ក្នុងករណីនៅតែមិនទទួលបានដំណោះស្រាយ។
កញ្ញា ឧកសុភ័ក្រ មូលីកា និយាយថា៖ «ក្រុមយើងបានឆ្លើយប្រាប់មន្ត្រីទូតថា ពួកខ្ញុំនៅតែតស៊ូតវ៉ារហូតទាល់តែមានដំណោះស្រាយ ពីព្រោះពួកខ្ញុំធ្វើនេះ គឺដើម្បីឆ្នាំងបាយ។ កាលដែលចាប់តំណាងរបស់ខ្ញុំ ហើយចោទពីបទញុះញង់នេះ គឺជារឿងមិនត្រឹមត្រូវទេ! គាត់មិនបានញុះញង់ទេ គឺពួកខ្ញុំស្ម័គ្រចិត្តចេញមកធ្វើកូដកម្មទាំងអស់គ្នា ហើយគាត់ថានឹងយករឿងរបស់ពួកយើងនេះប្រាប់ទៅថ្នាក់ដឹកនាំទូតបន្តទៀត»។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ប្រាប់ វីអូឌី កាលពីថ្ងៃម្សិលមិញថា ការដាក់ញត្តិរបស់ក្រុមកូដករនៅស្ថានទូតណាមួយនោះជាសិទ្ធិរបស់ពួកគេ។ លោកថា បរទេសមិនមានសិទ្ធិលូកដៃចូលកិច្ចការងារផ្ទៃក្នុងកម្ពុជាបានទេ។
អ្នកនាំពាក្យរូបនេះបានស្នើដល់អ្នកច្បាប់របស់ភាគីជម្លោះពិនិត្យច្បាប់និងនីតិវិធីដែលពាក់ព័ន្ធអង្គហេតុឡើងវិញ ដោយថា រឿងណាត្រូវដោះស្រាយតាមផ្លូវតុលាការ គួរដោះស្រាយតាមផ្លូវតុលាការ ហើយរឿងណាត្រូវដោះស្រាយនៅក្រសួងការងារ ត្រូវមករកក្រសួងការងារ ដោយក្រសួងរង់ចាំការសម្របសម្រួលដោះស្រាយជានិច្ច។
លោកបន្ថែមថា៖ «ប៉ុន្តែអ្វីដែលខ្ញុំដឹង គឺកម្ពុជាគឺជាកម្ពុជា ហើយបរទេសក៏មិនលូកដៃចូលកិច្ចការងារផ្ទៃក្នុងដែលជាអធិបតេយ្យភាពកម្ពុជានោះដែរ។ រាល់វិវាទនៅប្រទេសណាក៏ដោយ គឺតែងតែមានច្បាប់និងនីតិវិធីដោះស្រាយករណីវិវាទនោះ។ ប្រសិនជាយើងយល់អំពីច្បាប់និងនីតិវិធីត្រូវដោះស្រាយករណីនីមួយៗនោះ យើងប្រហែលជាមិនពិបាកដើរវាងផ្លូវនាំតែឆ្ងាយ ហើយអាចធ្វើឱ្យខូចប្រយោជន៍សមាជិកខ្លួននោះទេ»។
គិតមកដល់ថ្ងៃទី១៨ ខែមករានេះ ថ្នាក់ដឹកនាំនិងសមាជិកសហជីព៨នាក់ត្រូវបានឃុំខ្លួនរយៈពេល១៩ថ្ងៃហើយ ខណៈក្រុមកូដករប្រមាណ១ ០០០នាក់បានបន្តធ្វើកូដកម្មដដែល បើទោះបីជាចំណុចដែលពួកគេទាមទារនៅមិនទាន់មានការដោះស្រាយចំណុចណាមួយក៏ដោយ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា ករណីក្រុមបុគ្គលិកណាហ្គាវើលដ៍សម្រេចប្រមូលផ្ដុំគ្នាដាក់ញត្តិនៅតាមស្ថានទូតនានា ដើម្បីសុំជួយអន្តរាគមន៍វិវាទការងារនេះ ជាការពិតណាស់ដែលថាស្ថានទូតទាំងនោះមិនមានសិទ្ធិអំណាចណាមួយចាប់បង្ខំឱ្យកម្ពុជាអនុវត្តតាមខ្លួនឡើយ។ ប៉ុន្តែលោកថា ករណីនេះជារូបភាពមួយបង្ហាញពីអសមត្ថភាពរបស់រដ្ឋាភិបាលកម្ពុជា ក្នុងការស្វែងរកដំណោះស្រាយឈ្នះៗជូនពលរដ្ឋ និងបង្ហាញពីកម្សោយនៃការអនុវត្តច្បាប់ផងដែរ។
លោកបន្ថែមថា៖ «អ៊ីចឹងមានន័យថា ប្រសិនជាពលរដ្ឋយកមធ្យោបាយដែលបានប្រាស្រ័យជាមួយអាជ្ញាធររដ្ឋ ដែលគ្មានដំណោះស្រាយ និងមិនទទួលបានលទ្ធផលទេ ហើយគាត់ជ្រើសរើសយកការតវ៉ា ហើយជ្រើសរើសយកការដាក់សម្ពាធពីបរទេសផ្សេងៗហ្នឹង មានន័យថា រដ្ឋាភិបាលអសមត្ថភាពនៅក្នុងការដោះស្រាយបញ្ហាជូនរាស្ត្ររបស់ខ្លួន ឬក៏យើងអាចនិយាយថា គណនេយ្យភាពរបស់ស្ថាប័នសាធារណៈចំពោះមុខពលរដ្ឋដែលជាម្ចាស់ឆ្នោតហ្នឹងមានកម្រិតទាបមែនទែន»។
កាលពីថ្ងៃទី៥ ខែមករានេះ ថ្នាក់ដឹកនាំនិងសកម្មជនសហជីពចំនួន៨នាក់ ក្នុងនោះមានប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ផង ត្រូវបានតុលាការសម្រេចឃុំខ្លួនបណ្ដោះអាសន្នក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌ ក្រោយពីពួកគេធ្វើកូដកម្មអហិង្សាទាមទារសិទ្ធិនិងលក្ខខណ្ឌការងារប្រសើរនៅក្នុងក្រុមហ៊ុនល្បែងមួយនេះ។
នៅថ្ងៃដដែលនោះ ក្រុមអ្នកជំនាញអង្គការសិទ្ធិមនុស្សអន្តរជាតិ បានចេញសេចក្ដីថ្លែងការណ៍មួយដោយថ្កោលទោសចំពោះការចាប់ខ្លួននិងឃុំខ្លួនថ្នាក់ដឹកនាំសហជីពណាហ្គាវើលដ៍ ដោយថា ការធ្វើនោះបានបំពានច្បាប់និងរំលោភសិទ្ធិមនុស្សធ្ងន់ធ្ងរ។
ដោយឡែក នៅថ្ងៃទី៧ ខែមករានេះដែរ អង្គការអន្តរជាតិខាងការងារ ហៅកាត់ថា អាយឡូ (ILO) ដែលមានមូលដ្ឋាននៅទីក្រុងហ្សឺណែវ ប្រទេសស្វីស (Switzerland) អំពាវនាវឱ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ដោះលែងថ្នាក់ដឹកនាំនិងសកម្មជនសហជីពណាហ្គាវើលដ៍៨នាក់ឱ្យមានសេរីភាពវិញ ដោយទម្លាក់ចោលការចោទប្រកាន់ប្រឆាំងអ្នកទាំងនោះ។
អង្គការអាយឡូ មើលឃើញថា ការចាប់ឃុំខ្លួនមេដឹកនាំសហជីពដែលដឹកនាំធ្វើកូដកម្មដោយសន្តិវិធី គឺជាការជ្រៀតជ្រែកយ៉ាងខ្លាំងដល់ច្បាប់ស្ដីពីសេរីភាពការងារ និងសិទ្ធិសហជីព៕