ក្រសួងយុត្តិធម៌ បានបង្កើតក្រុមការងារមួយ ដើម្បីប្រឆាំងនឹងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ។
ក្នុងសេចក្ដីសម្រេចរបស់ក្រសួងយុត្តិធម៌ ចុះថ្ងៃទី១៨ ខែមករា រដ្ឋមន្ត្រីក្រសួងយុត្តិធម៌ លោក កើត រិទ្ធ បានសម្រេចបង្កើតក្រុមការងាររបស់ក្រសួងដែលមានខ្លួនលោកផ្ទាល់ជាប្រធាន និងមានអនុប្រធាន និងសមាជិកចំនួន២៧រូបទៀត ដើម្បីរួមគ្នាប្រឆាំងទប់ស្កាត់ការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ។
សេចក្ដីសម្រេចដដែលបញ្ជាក់ពីតួនាទីសំខាន់របស់ក្រុមការងារដែលត្រូវអនុវត្ត ដូចជា តាមដាន ត្រួតពិនិត្យ និងជំរុញការអនុវត្តច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម និងច្បាប់ស្ដីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ ដែលស្ថិតក្រោមដែនសមត្ថកិច្ចរបស់ក្រសួងយុត្តិធម៌ និងរៀបចំតារាងស្ថិតិដើម្បីប្រមូលទិន្នន័យពីការស៊ើបអង្កេត ការចោទប្រកាន់ ការស៊ើបសួរ ការផ្ដន្ទាទោស និងការរឹបអូសទ្រព្យសម្បត្តិដែលពាក់ព័ន្ធបទល្មើសសម្អាតប្រាក់ ជាដើម។
បន្ថែមពីនេះ ក្រុមការងារក៏មានកាតព្វកិច្ចជំរុញការប្រមូលនិងចងក្រងទិន្នន័យ ការចាប់យក ការបង្កក និងការរឹបអូសផលនៃបទល្មើស ឧបករណ៍មធ្យោបាយប្រព្រឹត្តបទល្មើស និងទ្រព្យសម្បត្តិដែលមានតម្លៃស្មើ ដើម្បីធ្វើបច្ចុប្បន្នភាពពីការអនុវត្តផែនការសកម្មភាពរបស់ក្រុមការងារត្រួតពិនិត្យរួមនៃក្រុមប្រទេសអាស៊ីប៉ាស៊ីហ្វិក អំពីកិច្ចសហប្រតិបត្តិការអន្តរជាតិ រៀងរាល់៤ខែម្ដង និងប្រចាំឆ្នាំផងដែរ។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍នៅថ្ងៃពុធនេះថា ក្រសួងបង្កើតក្រុមការងារនេះឡើង ដើម្បីប្រមូលភស្តុតាងពាក់ព័ន្ធជូនទៅតុលាការឬស្ថាប័នពាក់ព័ន្ធ និងបង្កើននូវប្រសិទ្ធភាពការងារក្នុងការប្រឆាំងនឹងបទល្មើសទាំងនេះ។
លោកមានប្រសាសន៍ថា៖ «ការបង្កើតនេះធ្វើតែក្នុងវិស័យយុត្តិធម៌ដែលពាក់ព័ន្ធនឹងវិធានការច្បាប់ ពាក់ព័ន្ធដំណើរការនីតិវិធីរបស់តុលាការ ការសម្រេចក្ដី ការប្រមូលព័ត៌មានទិន្នន័យនៃសំណុំរឿងបទល្មើសស្ថិតនៅក្នុងដំណើរការនីតិវិធីរបស់តុលាការ ក៏ដូចជាការឆ្លើយតបទៅនឹងសំណួរផ្សេងៗរបស់អន្តរជាតិដែលពាក់ព័ន្ធ»។
លោកបន្ថែមថា៖ «យន្តការនេះជាយន្តការផ្ទៃក្នុងរបស់ក្រសួងយុត្តិធម៌ ដើម្បីបង្កើននូវប្រសិទ្ធភាពក្នុងការប្រយុទ្ធប្រឆាំងអំពើភេរវកម្ម និងហិរញ្ញប្បទាន នៃអាវុធមហាប្រល័យនេះតែប៉ុណ្ណោះ»។
នាយកប្រតិបត្តិនៃអង្គការតម្លាភាពកម្ពុជា លោក ប៉ិច ពិសី គាំទ្រចំពោះការបង្កើតក្រុមការងារនេះ ដើម្បីទប់ស្កាត់បទល្មើស និងលំហូរ ឬការលាងលុយកខ្វក់នៅកម្ពុជា។ តែយ៉ាងណា លោកបានជំរុញទៅក្រុមការងារដែលទើបបង្កើតថ្មីនេះអនុវត្តការងារប្រកបដោយតម្លាភាព មិនប្រកាន់បក្ខពួក ដោយមានការសហការជាមួយគ្រប់ភាគីពាក់ព័ន្ធ ដើម្បីឱ្យការងារនេះមានប្រសិទ្ធភាពខ្ពស់។
លោកបន្តថា៖ «យើងជំរុញឱ្យមានបរិយាកាសស្អាតស្អំក្នុងការធ្វើវិនិយោគ ហើយធានាបាននូវការទប់ស្កាត់ឬលំហូរសាច់ប្រាក់ដែលភេរវកម្មជាហានិភ័យដល់សន្តិសុខជាតិរបស់កម្ពុជាផង សន្តិសុខតំបន់ផង»។
លេខាធិការដ្ឋានបោសសម្អាតលុយកខ្វក់អន្តរជាតិ (Financial Action Task Force-FATF) កន្លងមក បានដាក់ប្រទេសកម្ពុជាចូលក្នុងបញ្ជីប្រផេះរបស់ខ្លួន សម្រាប់តាមដានការលាងលុយកខ្វក់ពីលំហូរហិរញ្ញវត្ថុ វិនិយោគ និងពាណិជ្ជកម្ម ចេញនិងចូលក្នុងប្រទេសនេះ។
អង្គការអន្តរជាតិមួយនេះបន្តថា បច្ចុប្បន្ន ប្រទេសចំនួន២ដែលត្រូវបានដាក់ចូលក្នុងបញ្ជីខ្មៅ រួមមាន ប្រទេសអ៊ីរ៉ង់ និងកូរ៉េខាងជើង ដែលប្រទេសទាំងពីរនេះកំពុងត្រូវបានពិភពលោកហ៊ុមព័ទ្ធសេដ្ឋកិច្ច ខណៈប្រទេសកម្ពុជា និងប្រទេស៩ទៀត ត្រូវបានដាក់ចូលក្នុងបញ្ជីតាមដានថែមទៀតផង៕