រដ្ឋាភិបាលបានកាត់ផ្ទៃដីបឹងតាមោកជិត១០០ហិកតាបន្ថែមទៀតប្រគល់ឱ្យភរិយាឧត្ដមសេនីយ៍ផ្កាយពីរនៅអង្គភាព“ង៧០” អ្នកស្រី សាយ សោភា និងលោក ចេង ស្រ៊ុនហេង ដើម្បីធ្វើជាកម្មសិទ្ធិ ចាប់ពីថ្ងៃចុះហត្ថលេខាតទៅ។
ក្នុងអនុក្រឹត្យចេញកាលពីថ្ងៃទី៤ ខែវិច្ឆិកា ឆ្នាំ២០២១ ចុះហត្ថលេខាដោយលោកនាយករដ្ឋមន្ត្រី ហ៊ុន សែន ដែលវីអូឌីទើបទទួលបាននៅថ្ងៃនេះ បានឱ្យដឹងថា ផ្ទៃដីចំនួន៧០ហិកតា ស្ថិតនៅសង្កាត់ព្រែកព្នៅ សង្កាត់ពញាពន់ និងសង្កាត់គោករកា ខណ្ឌព្រែកព្នៅ ត្រូវបានកាត់ចេញពីបឹងតាមោក ដើម្បីប្រគល់ឱ្យលោកស្រី សាយ សោភា ចាប់ពីថ្ងៃចុះហត្ថលេខាតទៅ។
លោកស្រី សាយ សោភា ដែលជាអគ្គនាយិកាសាលាអន្តរជាតិ វើលដ៍កម្ពុជា និងជាភរិយារបស់ឧត្ដមសេនីយ៍ផ្កាយពីរនៃអង្គភាព “ង៧០” លោក ភឿន ផល្លា ទទួលបានដីបឹងតាមោកចំនួន៤លើកមកហើយ ក្នុងនោះ លើកទី១ ទទួលបានដីជាង៧ហិកតា លើកទី២ បានដីទំហំជាង៤ហិកតា ខណៈលើកទី៣ ទទួលបានជាង១៥ហិកតា និងលើកទី៤ បានចំនួន៧០ហិកតា។ គិតមកទល់ពេលនេះ លោកស្រី សាយ សោភា ទទួលបានដីបឹងតាមោកសរុបជិត១០០ហិកតាពីរដ្ឋាភិបាល។
ចំណែកអនុក្រឹត្យមួយទៀតចេញកាលពីថ្ងៃទី២៤ ខែវិច្ឆិកា ឆ្នាំ២០២១ ចុះហត្ថលេខាដោយលោកនាយករដ្ឋមន្ត្រី ហ៊ុន សែន បានសម្រេចកាត់ដីជិត២០ហិកតា (១៩២ ៣០៩ម៉ែត្រក្រឡា) ស្ថិតនៅសង្កាត់ពញាពន់ និងសង្កាត់សំរោង ខណ្ឌព្រែកព្នៅ ប្រគល់ឱ្យលោក ចេង ស្រ៊ុនហេង ដើម្បីធ្វើជាកម្មសិទ្ធិ ដោយពន្ធនិងអាករផ្សេងៗជាបន្ទុករបស់រដ្ឋ។
វីអូឌី មិនអាចសុំការឆ្លើយតបពីអគ្គនាយិកាសាលាអន្តរជាតិ វើលដ៍កម្ពុជា លោកស្រី សាយ សោភា និងលោក ចេង ស្រ៊ុនហេង បានទេ នៅថ្ងៃសុក្រនេះ។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ប្រាប់វីអូឌីកាលពីថ្ងៃម្សិលមិញថា រដ្ឋាភិបាលកំណត់រក្សាផ្ទៃបឹងរួចហើយ ប៉ុន្តែចំនួនប៉ុន្មាននោះ លោកឱ្យសួរទៅសាលារាជធានីភ្នំពេញ។
លោកថា៖ «វាមានគេបែងចែកព្រំដែនរួចស្រេចទៅហើយ។ តាមខ្ញុំដឹង មានពីរប្រភេទ អាងទឹក! ដោយអាងទឹកទី១ បើសិនជាប្រភេទទឹកភ្លៀង មកពីខាងលិចខេត្តកំពង់ស្ពឺ វាត្រូវបញ្ចៀសចែកជាពីរ បែកទៅខាងតាខ្មៅ បញ្ចៀសមួយទៀតបែកទៅបឹងតាមោក មុននឹងទម្លាក់ទៅទន្លេសាប តាមរយៈអូរព្រែកព្នៅ តាមខ្ញុំដឹង! មួយទៀត តាមរយៈទឹកស្អុយដែលគេទៅសម្អាត ដើម្បីចូលទៅប្លុកមួយទៀត។ ដូច្នេះ ប្លុកទាំងពីរនេះមានរួចស្រេចព្រំដែនរបស់គេត្រឹមត្រូវហើយ លើកលែងផ្ទៃក្រឡាដីសាធារណៈរបស់ក្រសួង»។
បឹងតាមោក មានផ្ទៃដីសរុប៣ ២៣៩ហិកតា ជាអាងស្ដុកទឹកកខ្វក់និងរំដោះទឹកចេញពីរាជធានីភ្នំពេញ ហើយបឹងនេះត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់បឹងធម្មជាតិមួយនេះជាសម្បតិ្តសាធារណៈរបស់រដ្ឋ។
ប៉ុន្តែបើយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុងខែកញ្ញា ឆ្នាំ២០២១ ផ្ទៃបឹងតាមោកសរុបជាង១ ៦០០ហិកតាហើយ ត្រូវបានរដ្ឋាភិបាលកាត់និងដោះដូរទៅឱ្យស្ថាប័នរដ្ឋ ក្រុមហ៊ុនឯកជន និងបុគ្គលឯកជន ដែលគេដឹងថា ជាអ្នកមានប្រាក់និងមានអំណាច សម្រាប់សាងសង់អគារនិងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន។
ប្រធានគម្រោងសិទ្ធិលំនៅឋាន និងស្រាវជ្រាវនៃអង្គការសមាគមធាងត្នោត លោក ស៊ាង មួយឡៃ បានជំរុញទៅរដ្ឋាភិបាលគួរឈប់កាត់ផ្ទៃបឹងតាមោកបន្តទៀត ដោយសារទីតាំងនោះសុទ្ធតែជាផ្ទៃទឹកដែលមានជម្រៅចាប់ពី២ទៅ៣ម៉ែត្រទៅ ហើយបច្ចុប្បន្ន បឹងធម្មជាតិកំពុងបម្រើដល់ផលប្រយោជន៍សាធារណៈនៅឡើយ ក្នុងនោះ ប្រជាពលរដ្ឋបាននឹងកំពុងអាស្រ័យផល ដើម្បីប្រកបរបរចិញ្ចឹមជីវិត។
លោកថា៖ «មួយទៀត បើសម្អាងថា បុគ្គលទាំងអស់នោះ គាត់ទិញពីប្រជាពលរដ្ឋដែលកាន់កាប់ពីមុន និងជាក់ស្ដែង រដ្ឋាភិបាលគួរតែពិចារណាឡើងវិញអំពីចំណុចហ្នឹង។ ក្នុងករណីនេះអាចមានអំពើពុករលួយ ឬការរៀបចំលិខិតណាមួយមិនត្រឹមត្រូវដែរឬអត់? ព្រោះករណីដែលអះអាងទិញពីប្រជាពលរដ្ឋ ហើយទិញលើដីបឹង អាហ្នឹងមែនទែនគឺទិញដោយខុសច្បាប់ហើយ។ អាហ្នឹងត្រូវមានទោសទណ្ឌអីបន្ថែមទៀត ចំពោះមន្ត្រីឬអ្នកដែលពាក់ព័ន្ធនិងចូលរួមទិញទ្រព្យសាធារណៈរបស់រដ្ឋហ្នឹង»។
កាលពីថ្ងៃទី៨ ខែវិច្ឆិកា ឆ្នាំ២០២១ លោកនាយករដ្ឋមន្ត្រី ហ៊ុន សែន បានថ្លែងថា បញ្ហាទឹកជំនន់ដែលបង្កឱ្យលិចរាជធានីភ្នំពេញ មិនមែនបណ្ដាលមកពីការលុបបឹងធម្មជាតិនោះទេ ដោយថា កន្លងមក ទោះបីជាមិនលុបបឹង រាជធានីភ្នំពេញក៏មានទឹកជំនន់ដែរ ដែលករណីនេះ លោកថា គួរតែឈប់រិះគន់ពីបញ្ហានេះ។
តែយ៉ាងណា កាលពីខែឧសភា ឆ្នាំ២០២០ រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ បានចេញលិខិតមួយដោយព្រមានអំពីគ្រោះមហន្តរាយដោយសារទឹកជំនន់ ក្រោយពីក្រសួងមើលឃើញថា មានការចាក់ដីលុប និងការសាងសង់សំណង់ផ្សេងៗបិទផ្លូវទឹក និងកន្លែងស្តុកទឹកនានាជាបន្តបន្ទាប់៕