ក្រសួងមហាផ្ទៃ ជំរុញឱ្យថ្នាក់ដឹកនាំគណបក្សហ្វ៊ុនស៊ិនប៉ិច ដោះស្រាយបញ្ហាផ្ទៃក្នុង និងរៀបចំធ្វើសមាជបង្កើតក្បាលម៉ាស៊ីនដឹកនាំគណបក្ស ក្រោយព្រះអង្គម្ចាស់ នរោត្ដម រណឫទ្ធិ ចូលទិវង្គត។
ការជំរុញនេះបានធ្វើឡើងតាមរយៈលិខិតមួយច្បាប់ដែលចុះហត្ថលេខាដោយរដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃទី២០ ខែមករា ឆ្នាំ២០២២ ផ្ញើទៅព្រះអង្គម្ចាស់ នរោត្ដម ចក្រាវុធ ជាព្រះរាជបុត្រារបស់សម្ដេចក្រុមព្រះ។
លោក ស ខេង បានលើកឡើងក្នុងលិខិតនោះថា ក្រសួងបានទទួលហើយនូវសេចក្ដីសម្រេចចុះថ្ងៃទី១៦ ខែធ្នូ ឆ្នាំ២០២០ របស់គណបក្សហ្វ៊ុនស៊ិនប៉ិច ដែលតែងតាំងព្រះអង្គម្ចាស់ នរោត្ដម ចក្រាវុធ ជាអនុប្រធានគណបក្សហ្វ៊ុនស៊ិនប៉ិច ស្របតាមប្រការ៥៩ថ្មី នៃលក្ខន្តិៈគណបក្ស។
ប៉ុន្តែលោក ស ខេង ស្នើឱ្យមេដឹកនាំរូបនេះ «ត្រូវធ្វើការសម្របសម្រួលផ្ទៃក្នុងគណបក្ស ដើម្បីរៀបចំសមាជជ្រើសរើសក្បាលម៉ាស៊ីនគណបក្សឱ្យស្របតាមខ្លឹមសារត្រង់ប្រការ១៦ ប្រការ១៧ និង១៩ រួមទាំងប្រការ៣៥ ជាដើម នៃលក្ខន្តិៈគណបក្សតម្កល់ទុកនៅក្រសួងមហាផ្ទៃ ព្រមទាំងបញ្ញត្តិមាត្រា១៨ថ្មី នៃច្បាប់គណបក្សនយោបាយផងដែរ»។
ការដែលក្រសួងចេញលិខិតនេះ ចំពេលមេដឹកនាំក្នុងជួរគណបក្សហ្វ៊ុនស៊ិនប៉ិចមិនចុះសម្រុងគ្នាលើគម្រោងរៀបចំសមាជ ដើម្បីជ្រើសក្បាលម៉ាស៊ីនដឹកនាំថ្មី ក្រោយពីសម្ដេចក្រុមព្រះជាអតីតព្រះប្រធានគណបក្សនេះបានចូលទិវង្គត។
សម្ដេចក្រុមព្រះ និងជាអតីតនាយករដ្ឋមន្ត្រីទី១ បានចូលទិវង្គតកាលពីថ្ងៃទី២៨ ខែវិច្ឆិកា ឆ្នាំ២០២១ នៅឯប្រទេសបារាំង ក្នុងព្រះជន្មាយុ៧៧ព្រះវស្សា ដោយរោគាពាធ៕