ក្រសួងមហាផ្ទៃ ជំរុញឱ្យមេដឹកនាំគណបក្សហ្វ៊ុនស៊ិនប៉ិចដោះស្រាយបញ្ហាផ្ទៃក្នុង មុនរៀបចំសមាជបង្កើតក្បាលម៉ាស៊ីនដឹកនាំថ្មី ក្រោយព្រះអង្គម្ចាស់ នរោត្ដម រណឫទ្ធិ ចូលទិវង្គត។
ការជំរុញនេះបានធ្វើឡើងតាមរយៈលិខិតមួយច្បាប់ដែលចុះហត្ថលេខាដោយរដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃទី២០ ខែមករា ឆ្នាំ២០២២ ផ្ញើទៅព្រះអង្គម្ចាស់ នរោត្ដម ចក្រាវុធ ជាព្រះរាជបុត្រារបស់សម្ដេចក្រុមព្រះ។
លោក ស ខេង បានលើកឡើងក្នុងលិខិតនោះថា ក្រសួងបានទទួលហើយនូវសេចក្ដីសម្រេចចុះថ្ងៃទី១៦ ខែធ្នូ ឆ្នាំ២០២០ របស់គណបក្សហ្វ៊ុនស៊ិនប៉ិច ដែលតែងតាំងព្រះអង្គម្ចាស់ នរោត្ដម ចក្រាវុធ ជាអនុប្រធានគណបក្សហ្វ៊ុនស៊ិនប៉ិច ស្របតាមប្រការ៥៩ថ្មីនៃលក្ខន្តិៈគណបក្ស។
ប៉ុន្តែលោក ស ខេង ស្នើឱ្យមេដឹកនាំរូបនេះ «ត្រូវធ្វើការសម្របសម្រួលផ្ទៃក្នុងគណបក្ស ដើម្បីរៀបចំសមាជជ្រើសរើសក្បាលម៉ាស៊ីនគណបក្សឱ្យស្របតាមខ្លឹមសារត្រង់ប្រការ១៦ ប្រការ១៧ និង១៩ រួមទាំងប្រការ៣៥ ជាដើម នៃលក្ខន្តិៈគណបក្សតម្កល់ទុកនៅក្រសួងមហាផ្ទៃ ព្រមទាំងបញ្ញត្តិមាត្រា១៨ថ្មី នៃច្បាប់គណបក្សនយោបាយផងដែរ»។
អ្នកនាំពាក្យក្រសួងមហាផ្ទៃ លោក ខៀវ សុភ័គ ឱ្យវីអូឌីដឹងបន្ថែមនៅថ្ងៃសុក្រនេះថា គណបក្សហ្វ៊ុនស៊ិនប៉ិច ពេលនេះមានតែអនុប្រធាន គឺព្រះអង្គម្ចាស់ នរោត្ដម ចក្រាវុធ ក្រោយពីសម្ដេចក្រុមព្រះចូលទិវង្គតទៅ ហើយថាផ្ទៃក្នុងរបស់គណបក្សនេះមិនទាន់ចុះសម្រុងគ្នានៅឡើយ ខណៈលក្ខន្តិកៈរបស់គណបក្សដែលបានតម្កល់នៅក្រសួងមហាផ្ទៃ កំណត់ធ្វើសមាជត្រឹមរយៈពេល៦០ថ្ងៃប៉ុណ្ណោះ ដើម្បីជ្រើសតាំងប្រធានបក្ស ក្នុងករណីប្រធានសក្តិ ឬប្រធានបក្សទទួលមរណភាពនោះ។
អ្នកនាំពាក្យរូបនោះគូសបញ្ជាក់ ករណីនេះ ទើបក្រសួងរម្លឹកពីការរៀបចំការធ្វើសមាជ ដើម្បីជ្រើសរើសក្បាលម៉ាស៊ីនដឹកនាំថ្មី និងបញ្ចៀសបានការកង្វះកូរ៉ុមក្នុងពេលសមាជ បើគ្មានការសម្របស្រួលផ្ទៃក្នុងជាមុនទេនោះ។
បើតាមលោក ខៀវ សុភ័គ បញ្ហាផ្ទៃក្នុងរបស់គណបក្សនេះមានច្រើន ក្នុងនោះមានទាំងការប្ដឹងគ្នាទៅតុលាការ និងការបណ្ដេញសមាជិកគណៈកម្មការនាយក រួមទាំងការបញ្ចប់តំណែងមន្ត្រីមួយចំនួន។
លោកថា៖ «មានទាំងបណ្ដេញចេញគណៈនាយកអី ប៉ុន្មាននាក់! មានការបណ្ដេញចេញឯកឧត្ដម យូ ហុកគ្រី អីច្រើនមែនទែន! មិនដឹងខាងណាខាងណីទេ! តែចុងក្រោយនេះ យើងឃើញថា សម្ដេចក្រុមព្រះលោកបានតែងតាំងព្រះអង្គម្ចាស់ ចក្រាវុធ ជាអនុប្រធានហើយ»។
លោក ផាន់ សិទ្ធី ដែលប្រាប់ថាជាអ្នកនាំពាក្យគណៈកម្មការនាយកនៃគណបក្សហ្វ៊ុនស៊ិនប៉ិច បានទទួលស្គាល់ថា បញ្ហាផ្ទៃក្នុងបក្សបានកើតឡើងមែន ខណៈមន្ត្រីមួយចំនួនប្រកាសពីការរៀបចំសមាជនៅចុងខែមករានេះ។
លោកថា៖ «យើងចេះតែធ្វើសេចក្ដីប្រកាសព័ត៌មានទៅ ខ្វែងគ្នារហូត យើងអត់បានប្ដឹងផ្ដល់! តែជាទស្សនៈ សេចក្ដីប្រកាសព័ត៌មានយើងមានគំនិតខ្វែងគ្នារហូត ដល់អ៊ីចឹងទៅប្រហែលជាគេមើលថាសេចក្ដីប្រកាសព័ត៌មានហ្នឹងហើយដែលគេ [ក្រសួងមហាផ្ទៃ] ស្វែងរកដំណោះស្រាយ»។
ប៉ុន្តែយ៉ាងណា លោកថា ពេលនេះ ថ្នាក់ដឹកនាំបានកោះប្រជុំបន្ទាន់មួយ ដើម្បីសម្របសម្រួលផ្ទៃក្នុង ក្រោយពីមានលិខិតជូនដំណឹងពីក្រសួងមហាផ្ទៃ។ លោកបន្តថា ការធ្វើសមាជមិនទាន់កំណត់ពេលនៅឡើយទេ ហើយក៏មិនទាន់ដឹងថានរណាត្រូវឈរជាបេក្ខភាពប្រធាន និងអនុប្រធាននៅឡើយដែរ។
អ្នកនាំពាក្យគណបក្សហ្វ៊ុនស៊ិនប៉ិច លោក ញឿន រ៉ាដែន ចាត់ទុកលិខិតជូនដំណឹងរបស់ក្រសួងមហាផ្ទៃនេះថា ជាការទន្ទឹងរង់ចាំរបស់គណបក្សនេះជាយូរមកហើយ ដោយថា កាលពីអំឡុងឆ្នាំ២០១៩ ក្រសួងបានជូនដំណឹងទៅសម្ដេចក្រុមព្រះពីការស្នើផ្អាកធ្វើសមាជម្ដងហើយ ដោយស្នើឱ្យដោះស្រាយបញ្ហាផ្ទៃក្នុងជាមុនសិន។
អ្នកនាំពាក្យរូបនេះអះអាងថា សមាជនឹងត្រូវធ្វើនៅសប្ដាហ៍ទី១ ខែកុម្ភៈ ឆ្នាំ២០២២ ដោយសម្អាងថា អនុប្រធានបក្សបានដោះស្រាយបញ្ហានេះបានច្រើនហើយ នៅសល់បញ្ហាតិចតួចដែលលោកគិតថាលែងជាបញ្ហាដល់សមាជហើយ។
លោកថា៖ «យើងដឹងហើយ កាលពីឆ្នាំ២០២០ គឺសម្ដេចក្រុមព្រះលោកបានតែងតាំងលោក [ព្រះអង្គ ចក្រាវុធ] ធ្វើជាអនុប្រធានគណបក្ស។ ហើយជាបន្តបន្ទាប់មក តែងតាំងលោកជាអ្នកបន្តវេនទទួលបន្ទុកប៉ុស្តិ៍សិទ្ធិក្នុងការដឹកនាំគណបក្ស មុននឹងលោកយាងចូលទិវង្គត»។
លោក ញឿន រ៉ាដែន ឱ្យដឹងទៀតថា បេក្ខភាពឈរឈ្មោះជាប្រធានគណបក្សហ្វ៊ុនស៊ិនប៉ិចនៅថ្ងៃសមាជនោះ គឺព្រះអង្គម្ចាស់ នរោត្ដម ចក្រាវុធ តែថាបេក្ខភាពអនុប្រធាននៅមិនទាន់ដឹងទេ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មើលឃើញថា គណបក្សនេះនឹងពិបាកស្ដារប្រជាប្រិយភាពឡើងវិញ បើទោះបីព្រះអង្គម្ចាស់ នរោត្ដម ចក្រាវុធ ជាបុត្រាច្បងរបស់សម្ដេចក្រុមព្រះ អាចនឹងធ្វើជាប្រធានបន្តវេនរបស់គណបក្សនេះក៏ដោយ។
គណបក្សហ្វ៊ុនស៊ិនប៉ិច កាលពីអំឡុងការបោះឆ្នោតឆ្នាំ១៩៩៣ ទទួលបានអាសនៈក្នុងសភាចំនួន៥៨ ខណៈគណបក្សប្រជាជនកម្ពុជាទទួលបាន៥១អាសនៈ។ ប៉ុន្តែក្បាលម៉ាស៊ីនដឹកនាំរបស់ប្រទេសកម្ពុជានៅពេលនោះមាននាយករដ្ឋមន្ត្រីពីរ គឺសម្ដេចក្រុមព្រះ ជានាយករដ្ឋមន្ត្រីទី១ និងលោក ហ៊ុន សែន ជានាយករដ្ឋមន្ត្រីទី២។
ចាប់ពីពេលនោះមក គណបក្សដែលធ្លាប់ឈ្នះឆ្នោតមួយនេះមានជម្លោះផ្ទៃក្នុងជាហូរហែ ដែលការណ៍នេះ មេដឹកនាំសំខាន់ៗក្នុងបក្សមួយចំនួនបានចេញទៅបង្កើតបក្សថ្មី ដូចជា លោក សម រង្ស៊ី និងលោក ញឹក ប៊ុនឆៃ ជាដើម ហើយទីបំផុតគណបក្សហ្វ៊ុនស៊ិនប៉ិចបានបាត់បង់អាសនៈទាំងស្រុងក្នុងសភា ក្នុងអំឡុងការបោះឆ្នោតជាតិឆ្នាំ២០១៣៕