ព្រះអង្គម្ចាស់ នរោត្ដម ចក្រាវុធ ដែលជាព្រះប្រធានគណបក្សហ្វ៊ុនស៊ិនប៉ិច បានតែងតាំងព្រះអង្គម្ចាស់ក្សត្រី នរោត្ដម រតនាទេវី ដែលជាព្រះអនុជរបស់ទ្រង់ ជាអនុប្រធានគណបក្សហ៊្វុនស៊ិនប៉ិចជាផ្លូវការ។
ក្នុងសេចក្ដីសម្រេចរបស់ព្រះប្រធានគណបក្សរាជានិយមមួយនេះចេញកាលពីថ្ងៃចន្ទសប្ដាហ៍មុន ដែលវីអូឌីទើបទទួលបាន បញ្ជាក់ថា ព្រះអង្គម្ចាស់ក្សត្រី នរោត្ដម រតនាទេវី ដែលជាព្រះអនុជបង្កើតព្រះអង្គម្ចាស់ នរោត្ដម ចក្រាវុធ ត្រូវបានតែងតាំងជាអនុប្រធានគណបក្សហ៊្វុនស៊ិនប៉ិច។
អ្នកនាំពាក្យគណបក្សហ៊្វុនស៊ិនប៉ិច លោក ញឿន រ៉ាដែន មានប្រសាសន៍ប្រាប់វីអូឌីថា ព្រះអង្គម្ចាស់ក្សត្រី រតនាទេវី ទ្រង់គឺជារដ្ឋលេខាធិការនៃក្រសួងទេសចរណ៍ និងតែងតែដង្ហែយ៉ាងខ្ជាប់ខ្ជួនជាមួយសម្ដេចក្រុមព្រះ អំឡុងពេលដែលសម្ដេចក្រុមព្រះទ្រង់គង់ជាប្រធាននៃរដ្ឋសភាជាតិ ហើយទ្រង់ក៏ធ្លាប់ជាប់ជាសមាជិករដ្ឋសភាដែលបានជាប់ឆ្នោតនៅមណ្ឌលខេត្តក្រចេះផងដែរ។
លោកបានបន្តថា ព្រះអង្គម្ចាស់ក្សត្រីមានតួនាទីយ៉ាងសំខាន់ក្នុងការជួយសម្តេចក្រុមព្រះ ក្នុងកិច្ចការថ្នាក់ជាតិនិងអន្តរជាតិជាមួយបណ្ដាស្ថានទូតនានាថែមទៀតផង។
លោកបានបញ្ជាក់ថា ថ្មីៗនេះ ព្រះអង្គម្ចាស់ នរោត្តម រតនាទេវី ក៏ជាសមាជិកគណៈកម្មាធិការនាយក និងជាតំណាងដ៏ខ្ពង់ខ្ពស់របស់ព្រះអង្គម្ចាស់ នរោត្ដម ចក្រាវុធ បន្ទាប់ពីទ្រង់ត្រូវបានតែងតាំងជាព្រះប្រធានថ្មី និងចូលរួមកិច្ចការជាច្រើនជាមួយគណបក្សហ៊្វុនស៊ិនប៉ិច។
លោកថា៖ «ព្រះអង្គម្ចាស់ក្សត្រី នរោត្តម រតនាទេវី លោកបានដើរតួយ៉ាងសំខាន់ក្នុងការចូលរួមជាមួយអង្គការជាតិ និងអន្តរជាតិជាដើម ជាពិសេសលោក [ព្រះអង្គម្ចាស់ក្សត្រី នរោត្តម រតនាទេវី] តែងតែចុះទៅជួបថ្នាក់ដឹកនាំសមាជិកសមាជិកាធ្វើនូវកិច្ចការសង្គម ក៏ដូចជាកិច្ចការមនុស្សធម៌ជាដើម»។
លោកបានបន្តទៀតថា លោកមានជំនឿតាមរយៈការតែងតាំងព្រះអង្គម្ចាស់ក្សត្រី នឹងអាចជួយធ្វើយ៉ាងណាឱ្យគណបក្សហ៊្វុនស៊ិនប៉ិចកាន់តែទទួលបានជោគជ័យ ព្រោះព្រះអង្គម្ចាស់ក្សត្រីមានភាពស្វិតស្វាញ ដឹងពីកិច្ចការមួយចំនួន ជាពិសេសទ្រង់ធ្លាប់ចុះមូលដ្ឋាននៅខេត្តក្រចេះ ដែលធ្វើឱ្យទ្រង់យល់ដឹងច្រើនតាំងពីជំនាន់សម្ដេចក្រុមព្រះទ្រង់នៅមានព្រះជន្ម។
ព្រះអង្គម្ចាស់ក្សត្រី នរោត្តម រតនាទេវី ទ្រង់ជាបុត្រីទី៣ របស់សម្តេចក្រុមព្រះ នរោត្តម រណឫទ្ធិ និងជាព្រះអនុជរបស់ព្រះអង្គម្ចាស់ នរោត្តម ចក្រាវុធ ដែលជាព្រះប្រធានគណបក្សហ៊្វុនស៊ិនប៉ិចបច្ចុប្បន្ន។
អតីតព្រះប្រធានគណបក្សហ៊្វុនស៊ិនប៉ិច សម្ដេចក្រុមព្រះ នរោត្ដម រណឫទ្ធិ បានចូលទិវង្គត កាលពីខែវិច្ឆិកា ឆ្នាំ២០២១ ដោយរោគាពាធ នៅប្រទេសបារាំង។ ក្រោយមក គណបក្សបានតែងតាំងព្រះអង្គម្ចាស់ នរោត្តម ចក្រាវុធ ជាព្រះប្រធានបន្ត។
សម្ដេចក្រុមព្រះ នរោត្ដម រណឫទ្ធិ មានបុត្រា-បុត្រី ចំនួន៥ព្រះអង្គ រួមមាន ទី១ ព្រះអង្គម្ចាស់ នរោត្តម ចក្រាវុធ ជាព្រះរាជបុត្រាច្បងរបស់សម្ដេចក្រុមព្រះ នរោត្តម រណឫទ្ធិ ជាមួយព្រះអង្គម្ចាស់ក្សត្រី ម៉ារី រណឫទ្ធិ។
ទី២ ព្រះអង្គម្ចាស់ នរោត្ដម សីហឫទ្ធិ ជាព្រះរាជបុត្រារបស់សម្តេចក្រុមព្រះ នរោត្តម រណឫទ្ធិ ជាមួយព្រះអង្គម្ចាស់ក្សត្រី ម៉ារី រណឫទ្ធិ។ ទី៣ ព្រះអង្គម្ចាស់ក្សត្រី នរោត្តម រតនាទេវី ជាព្រះរាជបុត្រីរបស់សម្តេចក្រុមព្រះ នរោត្តម រណឫទ្ធិ ជាមួយព្រះអង្គម្ចាស់ក្សត្រី ម៉ារី រណឫទ្ធិ។ ទី៤ អ្នកអង្គម្ចាស់ នរោត្តម សុធាឫទ្ធិ ព្រះរាជបុត្រារបស់សម្ដេចក្រុមព្រះ នរោត្ដម រណឫទ្ធិ ជាមួយអ្នកម្នាង អ៊ុក ផល្លា និងចុងក្រោយ អ្នកអង្គម្ចាស់ នរោត្ដម រណវង្ស ជាព្រះរាជបុត្រាពៅរបស់សម្ដេចក្រុមព្រះ នរោត្ដម រណឫទ្ធិ ជាមួយអ្នកម្នាង អ៊ុក ផល្លា៕
