មេធាវីការពារក្ដីឱ្យអតីតគណបក្សបេះដូងជាតិ ឱ្យដឹងថា មកដល់ពេលនេះ លោកបានដាក់សំណើទៅតុលាការរួចហើយ ដើម្បីស្នើសុំពន្យារពេលឱ្យកូនក្ដីរបស់ខ្លួនចូលបំភ្លឺទៅតាមដីកោះរបស់តុលាការ ក្នុងសំណុំរឿង«ក្លែងស្នាមមេដៃ»។
លោក សំ សុគង់ មេធាវីការពារក្ដីឱ្យអតីតគណបក្សបេះដូងជាតិ បានប្រាប់វីអូឌីនៅថ្ងៃសុក្រនេះថា មូលហេតុដែលនាំឱ្យលោកសម្រេចដាក់ពាក្យស្នើសុំពន្យារពេលនេះ ព្រោះតែកូនក្ដីរបស់លោកមិនមានពេលវេលាគ្រប់គ្រាន់ និងមានបញ្ហាស្មុគស្មាញមួយចំនួនដែលត្រូវការពេលវេលាបន្ថែមក្នុងការចូលឆ្លើយបំភ្លឺ។
លោកបន្តថា៖ «ពួកគាត់ទាំងអស់ដែលមិនបានចូលបំភ្លឺ ដោយហេតុថា ពួកគាត់ទើបតែទទួលបានដីកាកោះហៅពីលោកព្រះរាជអាជ្ញារង។ ពួកគាត់ទាំងអស់ហ្នឹងមានបញ្ហាសុខភាពផង ហើយអ្នកខ្លះមានវ័យចាស់ជរាផង។ ពួកគាត់ភាគច្រើនមិនធ្លាប់បានមកភ្នំពេញ ហើយពុំសូវបានស្គាល់ភ្នំពេញ និងមិនដឹងថាតុលាការនៅទីណាទេ»។
លោក សំ សុគង់ បញ្ជាក់ថា លោកបានដាក់សំណើសុំពន្យារពេលឱ្យកូនក្ដីចូលឆ្លើយបំភ្លឺនេះ គឺធ្វើឡើងជាបន្តបន្ទាប់ចាប់តាំងពីថ្ងៃទី១៦ រហូតដល់ថ្ងៃទី២០ ខែមករា ឆ្នាំ២០២២។ ការស្នើនេះធ្វើឡើងបន្ទាប់ពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លោក សៀង ហៀង បានចេញដីកាកាលពីថ្ងៃទី១០ ខែមករា ដោយកោះហៅអតីតសមាជិកនៅតាមមូលដ្ឋានមកពីគណបក្សបេះដូងជាតិ ឱ្យចូលបំភ្លឺក្រោមបទចោទ «ក្លែងស្នាមមេដៃ» ដែលមានក្រសួងមហាផ្ទៃជាដើមបណ្ដឹង។
បើតាមលោក សំ សុគង់ គិតមកដល់ពេលនេះ មានអតីតសមាជិកគណបក្សបេះដូងជាតិនៅតាមមូលដ្ឋានប្រមាណ២០នាក់ នៅខេត្តចំនួន៥ រួមមាន ខេត្តកណ្ដាល កំពង់ឆ្នាំង សៀមរាប បន្ទាយមានជ័យ និងកំពង់ចាម។ លោក សំ សុគង់ បញ្ជាក់ដែរថា ថ្វីត្បិតរឿងក្ដីនេះ អ្នកប្រព្រឹត្តបទល្មើសជាអ្នករស់នៅតាមបណ្ដាខេត្ត ប៉ុន្តែព្រះរាជអាជ្ញារង លោក សៀង ហៀង គឺជាអ្នកចាត់ការ ហើយជនជាប់ចោទទាំង២០នាក់នោះ តម្រូវឱ្យចូលឆ្លើយបំភ្លឺនៅសាលាដំបូងរាជធានីភ្នំពេញទាំងអស់។
ចំណែកមេធាវីការពារក្ដីឱ្យដើមបណ្ដឹងរដ្ឋប្បវេណី នៃក្រសួងមហាផ្ទៃ លោក ហាក់ សៀកលី ធ្លាប់បដិសេធថា ក្រសួងមហាផ្ទៃមិនបានកសាងសំណុំរឿងប្រឆាំងអតីតសកម្មជននៅតាមមូលដ្ឋានមកពីគណបក្សបេះដូងជាតិទេ។ លោកបន្ថែមថា ជាការសន្និដ្ឋានរបស់លោក រឿងនេះអាចជាសមត្ថកិច្ចរបស់ព្រះរាជអាជ្ញានៅតាមខេត្តជាអ្នកប្ដឹងដើម្បីស្វែងរកការពិត។
អតីតស្ថាបនិកគណបក្សបេះដូងជាតិ លោក សៀម ភ្លុក ចាត់ទុកការកោះហៅសកម្មជនរបស់ខ្លួននៅតាមមូលដ្ឋានដោយតុលាការក្រុងភ្នំពេញនេះថា នេះជាវិធីបំបាក់ស្មារតីសម្រាប់អ្នកតស៊ូដើម្បីកុំឱ្យមានរបបកុម្មុយនីស្តនៅកម្ពុជា និងបើកផ្លូវឱ្យមានការគោរពសិទ្ធិមនុស្សពេញលេញ។
លោកបន្តថា៖ «នេះវាជាការគំរាមកំហែង ធ្វើទុក្ខបុកម្នេញផ្នែកនយោបាយពីសំណាក់បក្សកាន់អំណាច។ នេះវាជាការព្រួយបារម្ភសម្រាប់អ្នកប្រជាធិបតេយ្យទាំងអស់គ្នា ពិសេសជាការព្រួយបារម្ភ រួមទាំងមតិជាតិ និងអន្តរជាតិ »។
សេចក្ដីប្រកាសព័ត៌មានរបស់ក្រសួងមហាផ្ទៃ កាលពីថ្ងៃទី១៦ ខែវិច្ឆិកា ឆ្នាំ២០២១ សម្រេចបដិសេធការសុំចុះបញ្ជីរបស់គណបក្សបេះដូងជាតិ ដោយសម្អាងហេតុថា គណបក្សនេះមានចេតនាទុច្ចរិត និងក្លែងស្នាមមេដៃ។
យ៉ាងនេះក្ដី កាលពីថ្ងៃទី២៤ ខែធ្នូ ឆ្នាំ២០២១ ចៅក្រមជំនុំជម្រះនៃតុលាការកំពូល លោក គង់ ស្រ៊ីម បានសម្រេចឱ្យក្រសួងមហាផ្ទៃ ជាអ្នកឈ្នះក្ដីលើអតីតគណបក្សបេះដូងជាតិ។ ការប្រើសវនាការប្រមាណ៤ម៉ោង តុលាការកំពូលចាត់ទុកបណ្ដឹងតវ៉ារបស់អតីតស្ថាបនិកគណបក្សបេះដូងជាតិ ជាការអសារបង់។
មន្រ្តីនាំពាក្យក្រសួងមហាផ្ទៃ លោក ខៀវ សុភ័គ បានប្រាប់វីអូឌីនៅថ្ងៃសុក្រនេះថា សំណុំរឿងអតីតគណបក្សបេះដូងជាតិដែលបានបញ្ជូនទៅដល់តុលាការនោះ ជាបទល្មើស។ លោកបន្ថែមថា ដោយឡែក ចំពោះរឿងនយោបាយ គឺភាគីជម្លោះបានដោះបញ្ចប់រួចអស់ទៅហើយ អ្វីដែលនៅសេសសល់ វាជានីតិវិធីតុលាការសុទ្ធសាធ។
លោកបន្តថា៖ «ទោសព្រហ្មទណ្ឌនៅក្នុងហ្នឹង ក្រសួងមហាផ្ទៃមិនបានប្ដឹងទៅតុលាការកំពូលរឿងស្នាមមេដៃណា៎! ក្រសួងមហាផ្ទៃប្ដឹងទៅសាលាដំបូងតើ! រឿងក្លែងស្នាមមេដៃ! អាហ្នឹងជាទោសព្រហ្មទណ្ឌ ក្លែងឯកសារសាធារណៈ ឯកសារដាក់ពាក្យសុំបង្កើតគណបក្សនយោបាយ គឺជាឯកសារសាធារណៈ គឺជាឯកសារនយោបាយសាធារណៈ លួចបន្លំមេដៃ»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ ហាក់មានភាពស្មុគស្មាញក្នុងការផ្ដល់យោបល់អំពីរឿងក្ដីមួយនេះ។ លោកថា បើផ្អែកលើអង្គហេតុនេះ រឿងផ្អាកដំណើរការអតីតគណបក្សបេះដូងជាតិនេះ ជាចេតនានយោបាយ។ ប៉ុន្តែដើម្បីបិទបាំងការជំទាស់នេះ លោក សេក សុជាតិ លើកឡើងថា ក្រសួងមហាផ្ទៃបានប្រើប្រាស់ច្បាប់ជាលេស ដើម្បីបង្ហាញថាការបិទផ្លូវគណបក្សនេះធ្វើឡើងដោយត្រឹមត្រូវនិងតម្លាភាព។
លោកបន្តថា៖ «រឿងក្ដីនេះ វាពិបាកក្នុងការវិនិច្ឆយមែនទែន ពីព្រោះយើងឃើញថា វាស្ថិតនៅក្នុងកម្រិតនយោបាយ ដែលអ្នកនយោបាយយើងតែងតែយកមកលេងនៅក្នុងសង្វៀននយោបាយ»។
កាលពីថ្ងៃទី៨ ខែវិច្ឆិកា ឆ្នាំ២០២១ លោក ស ខេង រដ្ឋមន្រ្តីក្រសួងមហាផ្ទៃ បានរាយការណ៍ទៅលោកនាយករដ្ឋមន្ត្រី ហ៊ុន សែន ស្ដីពីលទ្ធផលនៃការពិនិត្យស្នាមមេដៃ ដែលស្នើឡើងដោយអតីតគណបក្សបេះដូងជាតិ ដើម្បីសុំចុះបញ្ជីជាគណបក្សនយោបាយនៅក្រសួងមហាផ្ទៃ។
នៅក្នុងខ្លឹមសារនៃរបាយការណ៍នោះ លោក ស ខេង លើកឡើងថា ការធ្វើកោសលវិច័យទៅលើស្នាមមេដៃជិត៥ពាន់ស្នាមមេដៃ រកឃើញថា មានស្នាមមេដៃរបស់អ្នកគាំទ្រ២០នាក់ ខុសពីស្នាមមេដៃដែលមាននៅក្នុងអត្តសញ្ញាណបណ្ណ។ មិនតែប៉ុណ្ណោះ នៅមានស្នាមមេដៃអ្នកគាំទ្រ២០នាក់ផ្សេងទៀតផ្ដិតលើមនុស្ស៥៤នាក់ ស្នាមមេដៃអ្នកគាំទ្រ៧៤នាក់មានភាពមិនប្រក្រតីឬក្លែងបន្លំ ខណៈស្នាមមេដៃជិត៣០០នាក់ទៀតខូចគុណភាព។
បើទោះជាបែបណា អតីតស្ថាបនិកគណបក្សបេះដូងជាតិ ចាត់ទុកថា ការជំទាស់មិនព្រមចុះបញ្ជីឱ្យអតីតគណបក្សបេះដូងជាតិ រហូតមានសាលដីកាសម្រេចបិទផ្លូវតវ៉ាពីតុលាការកំពូលបន្ថែមទៀតនេះ វាគឺជាចេតនានយោបាយសុទ្ធសាធ។ ម្យ៉ាងវិញទៀត ការបិទផ្លូវ មិនឱ្យបក្សទើបបង្កើតថ្មោងថ្មីនេះអាចលេចចេញជារូបរាងបាន ដោយសង្ស័យថាមានលោក សម រង្ស៊ី សហស្ថាបនិកគណបក្សសង្រ្គោះជាតិដែលត្រូវបានតុលាការរំលាយ ជាអ្នកនៅពីក្រោយ។ លោក សៀម ភ្លុក ថ្លែងថា នេះជាមូលហេតុតែមួយគត់ដែលមិនអនុញ្ញាតឱ្យបក្សបេះដូងជាតិ ចុះបញ្ជីជាផ្លូវការនៅក្រសួងមហាផ្ទៃ ដើម្បីអាចធ្វើសកម្មភាពនយោបាយបាន៕