យុវជនស្ម័គ្រចិត្តកម្ពុជាមួយក្រុម បានបង្តើតយុទ្ធនាការសម្អាតបរិស្ថាននៅថ្ងៃទិវានៃក្ដីស្រឡាញ់ ក្នុងបំណងបណ្ដុះស្មារតីពលរដ្ឋឱ្យស្រឡាញ់បរិស្ថាន ដោយបានត្រៀមកម្លាំងយុវជនចំនួន៥០០នាក់ ដើម្បីរើសសំរាមនៅក្នុងរាជធានីនៅភ្នំពេញ។
ស្ថាបនិកក្រុមក្រៀលកម្ពុជា និងជាអ្នកផ្ដួចផ្ដើមគំនិតបង្កើតយុទ្ធនាការ «ក្ដីស្រឡាញ់បរិស្ថាន ១៤កុម្ភៈ» លោក ហួរ ឆៃងន់ បានថ្លែងថា ការជ្រើសរើសយកថ្ងៃ ១៤កុម្ភៈ ជាទិវានៃក្ដីស្រឡាញ់ ដើម្បីសម្អាតបរិស្ថាននោះ ដោយសារលោកចង់ផ្សារភ្ជាប់ក្ដីស្រឡាញ់រវាងមនុស្សជាមួយនឹងបរិសា្ថន ដោយជំរុញឱ្យពលរដ្ឋចូលរួមកាត់បន្ថយការប្រើប្រាស់ប្លាស្ទិក និងចេះបែងចែកទុកដាក់សំរាមឱ្យបានត្រឹមត្រូវ។
លោកបន្តថា លោកបានកៀរគរកម្លាំងយុវជនស្ម័គ្រចិត្តចំនួន៥០០នាក់ តាមរយៈបណ្ដាញផ្សព្វផ្សាយសង្គម ដើម្បីត្រៀមធ្វើយុទ្ធនាការនេះ ដែលតម្រូវឱ្យក្រុមយុវជនចាប់ផ្ដើមរើសសំរាមនៅទីតាំងចំនួន៣ ក្នុងរាជធានីភ្នំពេញ ចាប់ពីម៉ោង៣រសៀល និងបញ្ចប់នៅម៉ោង៦ល្ងាច។
លោក ហួរ ឆៃងន់ បញ្ជាក់ថា៖ «យើងត្រៀមកម្លាំងចន្លោះ៥០០នាក់ ដើម្បីចូលរួមយុទ្ធនាការមួយហ្នឹង។ ៥០០នាក់ហ្នឹង យើងបែងចែកចេញជាក្រុម ផ្ដើមចេញពី៣ទីតាំងសំខាន់ៗ។ ទីតាំងទី១ ទៅខាងត្រើយម្ខាងជ្រោយចង្វារ យើងដាក់ចំនួន២០០នាក់ ហើយទីតាំងទី២ ពីផ្សារចាស់ ផ្សាររាត្រី យើងដាក់១៥០នាក់ ហើយទីតាំងទី៣ នៅក្រោយក្រសួងបរិស្ថាន និងកៀនកោះពេជ្រ ១៥០នាក់បន្ថែមទៀត»។
ស្ថាបនិកក្រៀលកម្ពុជារូបនេះបានបន្ថែមថា នៅក្នុងថ្ងៃធ្វើយុទ្ធនាការ បន្ទាប់ពីការរៀបចំសកម្មភាពសម្អាតបរិស្ថានហើយនោះ ក៏មានការរៀបចំការប្រគំតន្រ្តីនៅសួនច្បារទល់មុខវត្តបទុមវតី និងមានការលេងល្បែងកម្សាន្តផងដែរ។ លោកបន្តថា ក្រោយព្រឹត្តិការណ៍នេះបញ្ចប់ លោករំពឹងថា ពលរដ្ឋម្នាក់ៗនឹងចាប់ផ្ដើមចាប់អារម្មណ៍លើការងារបរិស្ថានកាន់តែច្រើនឡើងបន្ថែមទៀត។
យ៉ាងណាក្ដី សម្រាប់លោក ហួរ ឆៃងន់ លើកឡើងថា ក្នុងពេលបច្ចុប្បន្ននេះ បញ្ហាសំរាមនៅប្រទេសកម្ពុជានៅតែជាប្រធានបទសំខាន់មួយដែលទាមទារឱ្យមានការយកចិត្តទុកដាក់បន្ថែមទៀត ទោះបីលោកសង្កេតឃើញថា រដ្ឋាភិបាលបានបង្តើតយន្តការដើម្បីដោះស្រាយបញ្ហាបរិស្ថានជាបន្តបន្ទាប់យ៉ាងណាក៏ដោយ។ តែលោកថា ពលរដ្ឋមួយចំនួននៅតែមានទម្លាប់បោះចោលសំរាមពាសវាលពាសកាលដដែល។
លោកថា៖ «សំរាមនៅប្រទេសកម្ពុជាយើងនៅតែមានបញ្ហា ទោះមានការប្រឹងប្រែងពីស្ថាប័នផ្សេងៗក៏ដោយ ព្រោះកម្លាំងនៃការខំប្រឹងវាអត់ធំដល់កម្លាំងនៃការបំផ្លាញ កម្លាំងនៃការពង្រាយ។ អ៊ីចឹងអាហ្នឹងវាជារឿងមួយដែលយើងម្នាក់ៗត្រូវស្វះស្វែងជួយគ្នា»។
ប្រធានមន្ទីរបរិស្ថានរាជធានីភ្នំពេញ លោក គាត រង្សី បានថ្លែងថា ក្នុងនាមអាជ្ញាធរ គឺតែងតែគាំទ្រនិងលើកទឹកចិត្តឱ្យមានការចូលរួមពីប្រជាពលរដ្ឋទូទៅ ជាពិសេសគឺយុវជន ដើម្បីធ្វើសកម្មភាពលើកិច្ចការងារថែរក្សាបរិស្ថាននេះ ដោយថា បញ្ហាបរិស្ថានគឺជាការទទួលខុសត្រូវរបស់ពលរដ្ឋគ្រប់រូប។
លោក គាត រង្សី បន្ថែមថា៖ «ការងារវិស័យបរិស្ថាននេះទាមទារឱ្យមានការចូលរួមទាំងអស់គ្នា តាំងពីយុវជន ប្រជាពលរដ្ឋជាដើមនេះ មានការទទួលខុសត្រូវក្នុងការធ្វើឱ្យរាជធានីភ្នំពេញរបស់យើងស្អាត ឬក៏ប្រទេសយើងទាំងមូលស្អាតតែម្ដង។ ទឹកចិត្តដែលគាត់ចូលរួមនេះជាទឹកចិត្តមួយល្អប្រសើរ»។
លោកបន្តថា ក្នុងនាមមន្ទីរបរិស្ថានរាជធានីភ្នំពេញ តែងតែផ្សព្វផ្សាយជាសារសំឡេងនៅតាមមូលដ្ឋាន ដើម្បីឱ្យពលរដ្ឋចូលរួមទុកដាក់សំរាមឱ្យបានត្រឹមត្រូវ និងបានរៀបចំវគ្គបណ្ដុះបណ្ដាលដល់អាជ្ញាធរក្នុងសង្កាត់ទាំង១០៥ ក្នុងខណ្ឌទាំង១៤ ដើម្បីផ្សព្វផ្សាយពីគោលនយោបាយដែលរដ្ឋាភិបាលដាក់ចេញជាបន្តបន្ទាប់ស្ដីពីការគ្រប់គ្រងកាកសំណល់។ លោកបន្តថា មន្ទីរបរិស្ថានរាជធានីភ្នំពេញ បានសហការជាមួយក្រសួងបរិស្ថាន ដើម្បីវាយតម្លៃចំពោះទីតាំងសាលា វត្តអារាម និងភោជនីយដ្ឋានទាំងឡាយណាដែលបានរៀបចំបរិស្ថានស្អាត នឹងទទួលបានលិខិតសរសើរពីអាជ្ញាធរផងដែរ។
លោក គាត រង្សី បញ្ជាក់ថា៖ «គោលការណ៍ដែលធំដែលយើងបានចូលរួមអនុវត្តជាសំខាន់នោះ គឺថា ទី១ ការគ្រប់គ្រងសំរាម សំណល់រឹងឱ្យបានល្អប្រសើរ។ ទី២ ជំរុញនិងលើកទឹកចិត្តឱ្យបុគ្គលរូបវន្ត ហើយនិងស្ថាប័នពាក់ព័ន្ធចូលរួមនៅក្នុងការលើកសោភ័ណភាពវិស័យបរិស្ថានឱ្យកាន់តែល្អប្រសើរ»។
កាលពីដើមឆ្នាំ២០២១ រដ្ឋាភិបាលកម្ពុជាបានបញ្ចូលបញ្ហាបរិស្ថានក្នុងគោលនយោបាយ «ភូមិ-ឃុំ-សង្កាត់-មានសុវត្ថិភាព» ដើម្បីគ្រប់គ្រងសំរាម ក្នុងគោលបំណងថែរក្សាអនាម័យ បរិស្ថាន និងសុខុមាលភាពប្រជាពលរដ្ឋ។ តាមរយៈគោលនយោបាយថ្មីនេះ រដ្ឋាភិបាលសង្ឃឹមថា នឹងជំរុញឱ្យមានការដោះស្រាយបញ្ហាកាកសំណល់គ្រប់ប្រភេទនៅទូទាំងប្រទេស។
ក្រៀលកម្ពុជា គឺជាក្រុមយុវជនស្ម័គ្រចិត្តមួយក្រុមដែលបានបង្កើតឡើងនៅថ្ងៃទី១០ ខែតុលា ឆ្នាំ២០១៨ ក្នុងគោលដៅជំរុញឱ្យពលរដ្ឋមានការស្រឡាញ់និងយកចិត្តទុកដាក់លើបញ្ហាបរិស្ថាន ហើយបានធ្វើសកម្មភាពជាបន្តបន្ទាប់នាពេលកន្លងមក ដូចជា ការរើសសំរាមក្នុងពិធីបុណ្យអុំទូក ការរៀបចំវគ្គសិក្ខាសាលាដើម្បីបញ្ជ្រាបការយល់ដឹងពីបញ្ហាបរិស្ថាន និងបានបង្កើតផលិតផលច្នៃចេញពីដើមឫស្សី រួមមាន ដបទឹក កែវទឹក ប៊ិក និងបំពង់បឺត ជាដើម សម្រាប់ឱ្យពលរដ្ឋប្រើប្រាស់ ដើម្បីចូលរួមកាត់បន្ថយការប្រើបា្រស់ប្លាស្ទិកផងដែរ៕