ក្រសួងមហាផ្ទៃបានឱ្យដឹងនៅថ្ងៃអង្គារម្សិលមិញថា ច្បាប់ប្រឆាំងនឹងការជ្រៀតជ្រែកពីបរទេសរបស់ប្រទេសសិង្ហបុរីដែលបានអនុម័តកាលពីឆ្នាំមុន នឹងក្លាយជាគំរូមួយសម្រាប់កម្ពុជាក្នុងការបង្កើតច្បាប់ដើម្បីបញ្ចៀសការជ្រៀតជ្រែករបស់បរទេស។
ច្បាប់របស់ប្រទេសសិង្ហបុរីមួយនេះដែលមានគោលបំណងប្រឆាំងនឹង «ការប៉ុនប៉ងពីសំណាក់ភាគីបរទេសដើម្បីរៀបចំនយោបាយក្នុងស្រុក» ក៏បានបង្កឱ្យមានជាការព្រួយបារម្ភក្នុងចំណោមសកម្មជននិងអ្នកសារព័ត៌មានទាំងឡាយផងដែរ ខណៈដែលពួកគេអាចនឹងត្រូវបានផ្ដន្ទាទោសចំពោះការចោទប្រកាន់មិនច្បាស់លាស់ ដាក់ឱ្យស្ថិតនៅក្រោមការត្រួតពិនិត្យ និងការរឹតបន្តឹងនានា ជាដើម។
ទោះជាយ៉ាងនេះក្ដី អ្នកនាំពាក្យក្រសួងមហាផ្ទៃ លោក ខៀវ សុភ័គ ថ្លែងថា ច្បាប់មួយដែលស្រដៀងទៅនឹងច្បាប់ខាងលើនេះ គឺមានសារៈសំខាន់សម្រាប់ប្រទេសកម្ពុជាក្នុងការត្រៀមទុកជាមុន ដោយសារតែកម្ពុជាធ្លាប់មានបទពិសោធន៍នានាកាលពីពេលកន្លងមក។
អ្នកនាំពាក្យដដែលបន្ថែមដោយលើកឡើងពីការលុកលុយរបស់ចាមលើអាណាចក្រអង្គរកាលពីពេលកន្លងទៅថា៖ «តាមប្រវត្តិសាស្ត្រ មហាអំណាចបរទេស ទាំងប្រទេសជិតខាង និងប្រទេសដែលនៅឆ្ងាយៗ បានជ្រៀតជ្រែកដល់សន្តិភាពរបស់កម្ពុជា»។
លោកបន្តថា មុនមានការឈ្លានពានរបស់បរទេស ក៏មានការជ្រៀតជ្រែកដែលមានជនក្បត់ពីផ្ទៃក្នុងផងដែរ។
លោកថា៖ «តាមរយៈបទពិសោធន៍ដ៏ជូរចត់របស់កម្ពុជា និងតាមអ្វីដែលយើងបានមើលឃើញពីប្រទេសផ្សេងៗ សម្ដេចក្រឡាហោមមានការទស្សនៈវិស័យវែងឆ្ងាយ ដើម្បីសិក្សានិងស្វែងយល់ពីករណីនេះ។ យើងគួរតែមានច្បាប់ស្រដៀងគ្នានេះមួយដែរ ដោយសារតែប្រវត្តិសាស្ត្ររបស់យើងធ្លាប់មានបទពិសោធន៍នៃការឈ្លានពាននិងការជ្រៀតជ្រែកពីបរទេស»។
អ្នកនាំពាក្យក្រសួងមហាផ្ទៃរូបនេះបានឱ្យដឹងទៀតថា ប្រទេសសិង្ហបុរី គឺជាគំរូដ៏ជាក់លាក់មួយសម្រាប់ច្បាប់មួយនេះ បើទោះបីជាប្រទេសផ្សេងទៀតមានច្បាប់ស្រដៀងគ្នានេះក៏ដោយ។
លោកបន្ថែមថា៖ «ប្រទេសសិង្ហបុរីមានច្បាប់នេះ ដូច្នេះហើយប្រទេសគេមានការអភិវឌ្ឍនិងឯករាជ្យ ហើយអាចគ្រប់គ្រងប្រទេសរបស់ពួកគេបានដោយគ្មានអ្នកបញ្ជាពីខាងក្រៅ»។
ទោះជាយ៉ាងណា លោកថា ដំណើរការនេះគឺស្ថិតនៅក្នុងដំណាក់កាលដំបូងនៅឡើយ។
លោកបន្ថែមថា៖ «បច្ចុប្បន្ន យើងបានប្រមូលឯកសារនានាហើយ»។
លោក ខៀវ សុភ័គ បន្តថា ច្បាប់ដែលមានចំនួន៥០០ទំព័រដែលយើងទទួលបាននឹងត្រូវបកប្រែជាភាសាខ្មែរ និងសិក្សាឱ្យបានច្បាស់លាស់មុនពេលដែលច្បាប់មួយត្រូវបានព្រាងឡើង។
លោកបន្ថែមទៀតថា យើងនឹងសិក្សាពីអ្នកដទៃ និងអ្វីដែលជាការជ្រៀតជ្រែកពីបរទេស ដែលរួមមានទាំងការផ្ដល់ថវិកាដល់អង្គការក្រៅរដ្ឋាភិបាលដើម្បីបើកសាលារៀននិងធ្វើសកម្មភាពផ្សេងទៀត។
អ្នកនាំពាក្យខាងលើនេះបន្ថែមថា៖ «វាអាចនឹងធ្វើឱ្យមនុស្សមួយចំនួនមិនពេញចិត្ត។ បើទោះបីជាពួកគេមិនពេញចិត្តយ៉ាងណាក៏ដោយ ប៉ុន្តែច្បាប់នេះ គឺដើម្បីប្រយោជន៍ជាតិ។ ប្រសិនបើអ្នកមិនអនុវត្តតាម អ្នកនឹងត្រូវទទួលទោស។ រាល់ច្បាប់ទាំងឡាយ គឺតែងតែមានការដាក់ទោស ដូច្នេះមនុស្សខ្លាចក្នុងការធ្វើអ្វីដែលខុសច្បាប់»។
ទាក់ទិនករណីនេះ នាយករងទទួលបន្ទុកឃ្លាំមើលសិទ្ធិមនុស្សអង្គការលីកាដូ លោក អំ សំអាត បានគូសបញ្ជាក់ឱ្យដឹងថា រដ្ឋាភិបាលមានច្បាប់ប្រឆាំងនឹងអំពើភេរវកម្ម និងច្បាប់ស្ដីពីការប្រឆាំងការលាងលុយកខ្វក់រួចទៅហើយ ដែលមិនចាំបាច់ត្រូវការច្បាប់ថ្មីនេះបន្ថែមទៀតទេ។
លោកយល់ឃើញថា ករណីនេះក៏បានបង្កឱ្យមានជាការព្រួយបារម្ភផងដែរ ដោយសារតែរដ្ឋាភិបាលជានិច្ចកាលតែងតែចាត់ទុកនិងហៅអង្គការក្រៅរដ្ឋាភិបាលថាជាផ្នែកមួយនៃ «បដិវត្តន៍ពណ៌»៕
បកប្រែនិងសម្រួលពីអត្ថបទដើមភាសាអង់គ្លេស “Cambodia Pursues Foreign Interference Law Inspired by Singapore, Angkorian-Era Invasions” ដោយលោក ភុន ច័ន្ទឧសភា
