មន្រ្តីជាន់ខ្ពស់រដ្ឋាភិបាលកម្ពុជា ថ្លែងការពារពីការជួលក្រុមហ៊ុនរបស់សហរដ្ឋអាមេរិកដើម្បីឱ្យជួយបញ្ចុះបញ្ចូលរដ្ឋាភិបាលរបស់ខ្លួននោះ ថាមិនមែនជាទម្រង់នៃអំពើពុករលួយទេ ប៉ុន្តែវាជាការបើកផ្លូវដើម្បីជំរុញឱ្យមានទំនាក់ទំនងល្អរវាងកម្ពុជានិងសហរដ្ឋអាមេរិកឱ្យកាន់តែល្អប្រសើរឡើង ជាពិសេសនឹងជួយបង្កើនធុរកិច្ចកាន់តែល្អជាងមុន។
ការបញ្ជាក់ពីជំហរនៅពេលនេះរបស់មន្រ្តីរដ្ឋាភិបាលកម្ពុជា បានធ្វើឡើងក្រោយពីកាសែត Reuters បានដកស្រង់ឯកសាររបស់ក្រសួងយុត្តិធម៌សហរដ្ឋអាមេរិក មកចុះផ្សាយថា កម្ពុជាបានជួលក្រុមហ៊ុនមួយរបស់សហរដ្ឋអាមេរិកដែលមានឈ្មោះថា «អាឃីន ហ្គាំ (Akin Gump Strauss Hauer & Feld)» ដើម្បីឱ្យជួយបញ្ចុះបញ្ចូលរដ្ឋាភិបាលអាមេរិក ថាកម្ពុជាមិនមានបញ្ហាអ្វីដូចការចោទប្រកាន់នាពេលកន្លងមក។ ក្រុមហ៊ុនច្បាប់នេះមានមូលដ្ឋាននៅទីក្រុង Washing DC។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ទទួលស្គាល់ថា កម្ពុជាពិតជាបានជួលក្រុមហ៊ុនច្បាប់របស់សហរដ្ឋអាមេរិកនេះមែន។ ប៉ុន្តែលោកបញ្ជាក់ជំហរថា ការជួលនេះធ្វើឡើងដោយត្រឹមត្រូវតាមនីតិវិធី និងឆ្លងកាត់ការត្រួតពិនិត្យយ៉ាងម៉ត់ចត់។ លោកបន្តថាកម្ពុជានឹងទទួលបានផលប្រយោជន៍ច្រើនពីការជួលក្រុមហ៊ុនច្បាប់របស់សហរដ្ឋអាមេរិកនេះ។ មិនតែប៉ុណ្ណោះ លោកថា ការចំណេញនេះនឹងនាំឱ្យកម្ពុជាអាចប្រកួតប្រជែងដោយស្មើភាពគ្នាជាមួយបណ្ដាប្រទេសជិតខាងផងដែរលើជញ្ជីងពាណិជ្ជកម្ម។
លោកបន្តថា៖ «ខ្ញុំគ្រាន់តែដឹងថាយើងមានចុះកិច្ចសន្យាជាមួយនឹងក្រុមហ៊ុន Lobby Group។ ក្រុមហ៊ុន Lobby Group នៅសហរដ្ឋអាមេរិក អាហ្នឹងគឺពិតប្រាកដ! ប៉ុន្តែឈ្មោះក្រុមហ៊ុន ខ្ញុំអត់ស្គាល់ទេ ហើយក៏អត់បានចាំដែរ។ ហើយសារៈប្រយោជន៍ដែលយើងធ្វើ គឺការពង្រឹងការយល់ដឹងរវាងសហរដ្ឋអាមេរិកនិងកម្ពុជា នេះជាគោលបំណងធំ គឺបែបហ្នឹងឯង»។
កាសែត Reuters បានចុះផ្សាយកាលពីថ្ងៃទី២៥ ខែមករា ឆ្នាំ២០២២ ដោយស្រង់យកឯកសារនៃកិច្ចសន្យាដែលត្រូវបានក្រសួងយុត្តិធម៌សហរដ្ឋអាមេរិកលាតត្រដាងអំពីទំហំទឹកប្រាក់នៃការជួលពីភាគីកម្ពុជា។ ផ្អែកលើរបាយការណ៍នេះ រដ្ឋាភិបាលកម្ពុជាបានជួលក្រុមហ៊ុនច្បាប់មួយរបស់សហរដ្ឋអាមេរិកឈ្មោះថា អាឃីន ហ្គាំ ដើម្បីបញ្ចុះបញ្ចូលរដ្ឋាភិបាលអាមេរិក រយៈពេលមួយឆ្នាំ ក្នុងតម្លៃ៧២ម៉ឺនដុល្លារ (៧២០ ០០០)។
យោងតាមទីភ្នាក់ងារសារព័ត៌មាន Reuters ដដែល ក្រុមហ៊ុនច្បាប់ អាឃីន ហ្គាំ (Akin Gump Strauss Hauer & Feld) ដែលរដ្ឋាភិបាលកម្ពុជាបានជួលឱ្យជួយបញ្ចុះបញ្ចូលនេះ ក៏រាប់បញ្ចូលក្រុមការងារអតីតទីប្រឹក្សាសេតវិមានប្រធានាធិបតីសម័យរដ្ឋបាលរបស់លោក បារ៉ាក់ អូបាម៉ា (Barak Obama) ផងដែរ។
ប្រភពដដែលបន្តថា ក្រុមហ៊ុនច្បាប់ខាងលើនេះបានបង្ហាញក្នុងកិច្ចព្រមព្រៀងរបស់ខ្លួនជាមួយកម្ពុជាថា៖ «អាឃីន ហ្គាំ នឹងធ្វើកិច្ចការងារដើម្បីរក្សាទំនាក់ទំនងបើកចំហ ក្នុងការធានាឱ្យបាននូវសារដែលមានតុល្យភាពបន្ថែមទៀត ជុំវិញទំនាក់ទំនងកម្ពុជា-អាមេរិកដ៏សំខាន់»។
យ៉ាងនេះក្ដី លោក ផៃ ស៊ីផាន អះអាងថា ករណីនេះ មើលទៅហាក់ដូចជាថ្មីណាស់សម្រាប់កម្ពុជា ប៉ុន្តែបណ្ដាប្រទេសនៅជុំវិញពិភពលោក គេបានអនុវត្តបែបនេះមុនកម្ពុជាទៅទៀត។ លោកបន្ថែមថា ព្រោះហេតុដូច្នេះហើយបានជាប្រទេសមួយចំនួន រាប់ទាំងក្នុងតំបន់ និងពិភពលោកផង គេមានភាពជឿនលឿននិងជោគជ័យទាំងផ្នែកពាណិជ្ជកម្មនិងនយោបាយ បើធៀបនឹងកម្ពុជា។
លោកបន្តថា៖ «មិនមែនជាការខាតប្រយោជន៍អីទេ ពីព្រោះក្រុមហ៊ុន Lobby Group ហ្នឹងនៅសហរដ្ឋអាមេរិក មានប្រទេសជាច្រើនសូម្បីប្រទេសវៀតណាមដែលប្រកាន់របបកុម្មុយនីស្ត គេក៏មានក្រុមហ៊ុន Lobby Group សម្រាប់ឱ្យរដ្ឋាភិបាលអាមេរិកាំងយល់អំពីប្រទេសរបស់គេ»។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា ក៏ឯកភាពដែរថា ការជួលក្រុមហ៊ុនច្បាប់របស់សហរដ្ឋអាមេរិកនេះ មិនមែនជាប្រភេទទម្រង់នៃអំពើពុករលួយ ប្រសិនបើការជួលនេះប្រព្រឹត្តទៅដើម្បីបម្រើផលប្រយោជន៍ជាតិ។ ប៉ុន្តែរឿងដែលសំខាន់និងចាំបាច់ វាស្ថិតនៅត្រង់គោលបំណងនៃការជួលទៅវិញទេ ថាការជួលក្រុមហ៊ុនច្បាប់នេះបម្រើក្នុងន័យបែបណា នោះទើបជាបញ្ហា។
លោកបន្តថា៖ «អ៊ីចឹងសំខាន់លើគោលបំណងនៃការធ្វើ Lobby ហ្នឹងទេ! បើសិនជា Lobby ដើម្បីប្រយោជន៍ជាតិ មិនមែនជារឿងខុសអីទេ។ ប៉ុន្តែបើយើង Lobby ឱ្យប៉ះពាល់ដល់ប្រយោជន៍សាធារណៈវិញ វាជាសំណួរ ហើយជាគណនេយ្យភាពមួយអ្នកដែលធ្វើហ្នឹងត្រូវទទួលខុសត្រូវចំពោះប្រជាពលរដ្ឋ »។
បើទោះជាលោកឯកភាពថា ការជួលក្រុមហ៊ុនបរទេសនេះជារឿងត្រឹមត្រូវក៏ដោយចុះ ប៉ុន្តែលោក ប៉ិច ពិសី យល់ឃើញថា ស្ថិតក្នុងស្ថានភាពកម្ពុជាកំពុងតែក្រីក្របែបនេះ រដ្ឋាភិបាលគួរប្រើប្រាស់សាច់ប្រាក់ដែលមាននេះសម្រាប់អភិវឌ្ឍប្រទេសវិញប្រសើរជាង។
ការជួលក្រុមហ៊ុនបញ្ចុះបញ្ចូលចុងក្រោយមួយនេះ ត្រូវបានអ្នកតាមដានសង្គមមើលឃើញថាធ្វើឡើងស្របពេលសហរដ្ឋអាមេរិកបានប្រកាសពីការពិនិត្យឡើងវិញនូវការធ្វើពាណិជ្ជកម្មរបស់កម្ពុជា។ ការនាំចេញរបស់កម្ពុជាសម្រាប់សហរដ្ឋអាមេរិកមានប្រមាណជា៤៣ភាគរយ ក្នុងរយៈពេល៩ខែដំបូងនៃឆ្នាំ២០២១។ តួលេខនេះមានកើនឡើងបើធៀបក្នុងរយៈពេលដូចគ្នាកាលពីឆ្នាំ២០២០ ដែលមានប្រមាណ៣៧ភាគរយ ខណៈឆ្នាំ២០១៩ ការនាំចេញរបស់កម្ពុជាទៅសហរដ្ឋអាមេរិកមានប្រមាណ៣២ភាគរយ។
កាលពីឆ្នាំ២០១៩ កម្ពុជាក៏ធ្លាប់បានចំណាយថវិកាជាង១លានដុល្លារដែរ លើការចំណាយជួលក្រុមហ៊ុនដើម្បីបញ្ចុះបញ្ចូលមួយរបស់អាមេរិក៕