សាលាដំបូងរាជធានីភ្នំពេញ បានបន្តបង្ហាញវីដេអូឃ្លីបនិងសម្រង់សម្ដីសន្ទនាឯកជនតាមទូរសព្ទ យកមកធ្វើជាភស្តុតាងដាក់បន្ទុកលើមេដឹកនាំ និងសកម្មជនបក្សសង្គ្រោះជាតិដែលត្រូវបានតុលាការរំលាយ មុនឱ្យមេធាវីនិងតំណាងអយ្យការធ្វើសេចក្ដីសន្និដ្ឋាននៅខែក្រោយ។
ចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ នៅថ្ងៃព្រហស្បតិ៍នេះ បានបន្តសវនាការលើសំណុំរឿងមេដឹកនាំ និងអ្នកគាំទ្រគណបក្សសង្គ្រោះជាតិដែលតុលាការរំលាយ ចំនួន២១នាក់ ពីបទ «ញុះញង់ឱ្យមានភាពវឹកវរធ្ងន់ធ្ងរសន្តិសុខសង្គម» និង «ញុះញង់យោធិនមិនឱ្យស្ដាប់បទបញ្ជា និងរួមគំនិតក្បត់»។ ប៉ុន្តែសវនាការនេះមិនមានវត្តមានថ្នាក់ដឹកនាំ និងសកម្មជនបក្សប្រឆាំង៨រូបនោះឡើយ។
សវនាការនាព្រឹកនេះ តុលាការបានបន្តចាក់បង្ហាញវីដេអូឃ្លីបដែលលោក សម រង្ស៊ី សហស្ថាបនិកគណបក្សសង្គ្រោះជាតិដែលតុលាការរំលាយ និយាយអំពីការបង្កើតចលនាសង្គ្រោះជាតិនៅក្រៅប្រទេស កាលពីខែមករា ដល់ខែកុម្ភៈ ឆ្នាំ២០១៨។
ក្រៅពីចាក់វីដេអូ ចៅក្រមក៏ឱ្យបង្ហាញសម្រង់សម្ដីសកម្មជនទាំងនោះដែលបានសន្ទនាឯកជនតាមប្រព័ន្ធទូរសព្ទ ដោយឱ្យក្រឡាបញ្ជីជាអ្នកអានឱ្យអ្នកចូលរួមស្ដាប់ និងមើលអំឡុងពេលសវនាការ។ បើតាមសម្រង់សម្ដីក្រឡាបញ្ជីអាននោះ មានលោក ញ៉ែម វៀន បានសន្ទនាជាមួយភរិយា រួមទាំង លោក ឡុង ផារី, លោក ងិន ឃាង, លោក ឃុត ច្រឹក, លោក យឹម សារ៉េត និងលោក ហិន ឆាន ដែលបានសន្ទនាគ្នាតាមប្រព័ន្ធទូរសព្ទ។
បើតាមការសន្ទានារវាងលោក ញ៉ែម វៀន ជាមួយភរិយារបស់គាត់ កាលពីថ្ងៃទី១៥ ខែមេសា ឆ្នាំ២០២០ បាននិយាយពីករណីសមត្ថកិច្ចបានបន្តចាប់ខ្លួនសកម្មជននៅខេត្តព្រៃវែង និងនិយាយអំពីការឆ្លងជំងឺកូវីដ-១៩ ដោយភ្ជាប់ជាមួយការលាក់បាំងរដ្ឋាភិបាលពីចំនួនតួលេខអ្នកឆ្លងជំងឺ ជាដើម។
លោកថា៖ «គេចាប់មនុស្សនៅព្រៃវែងម្នាក់ទៀតហើយ ឯងប្រយ័ត្នផង! កុំចេញទៅយកអំណោយអីណា ខ្លាចចាញ់បោកគេ! កូនមេភូមិនៅរមាសហែង បាត់ខ្លួនហើយ។ […] នៅខេត្តសៀមរាបឆ្លងកូវីដរហូតដល់៤០០នាក់ ប៉ុន្តេដាក់តែ១០នាក់ទេ ហើយនៅបាវិត កំពង់សោម កោះកុងជាដើម ក៏មានឆ្លងដែរ»។
ចំណែកលោក ងិន ឃាង បាននិយាយមួយលោក ឃុត ច្រឹក ពាក់ព័ន្ធការថ្លែងរបស់លោកនាយករដ្ឋមន្ត្រី ហ៊ុន សែន ដែលដេញអ្នកសារព័ត៌មានមិនឱ្យចូលរួមក្នុងបន្ទប់ធ្វើសន្និសីទកាសែត បើសិនពួកគេពាក់ម៉ាស់។ ភស្តុតាងនោះ លោកនិយាយថា លោកនាយករដ្ឋមន្ត្រីចូលចិត្តធ្វើអ្វីបញ្ច្រាសទិស ខណៈលោក ឡុង ផារី និយាយអំពីការទៅព្យាបាលជំងឺនៅសិង្ហបុរីរបស់លោក ហ៊ុន សែន ពាក់ព័ន្ធនឹងរឿងកូវីដ-១៩នេះដែរ។
ដោយឡែក ការសន្ទនារវាងលោក យឹម សារ៉េត ជាមួយលោក ហិន ឆាន ពាក់ព័ន្ធនឹងករណីថា រដ្ឋាភិបាលនឹងប្រគល់គណបក្សសង្គ្រោះជាតិឱ្យវិញ បន្ទាប់ពីលោកទទួលបានព័ត៌មានពីប្អូនជីដូនមួយដែលធ្វើការនៅក្រសួងមហាផ្ទៃ។
យ៉ាងណាក៏ដោយ ការចាក់បង្ហាញវីដេអូ និងអានសម្រង់សម្ដីជនជាប់ចោទមួយចំនួនដែលបានសន្ទនាតាមទូរសព្ទនេះ គឺធ្វើឡើងបន្ទាប់ពីចៅក្រមបានកំណត់យកថ្ងៃទី២៤ ខែកុម្ភៈ ឆ្នាំ២០២២ ដើម្បីឱ្យមេធាវី និងតំណាងអយ្យការធ្វើសេចក្ដីសន្និដ្ឋាន ហើយបិទបញ្ចប់សំណុំរឿងថ្នាក់ដឹកនាំ និងសកម្មជនទាំង២១នាក់ ក្រោយបើកសវនាការសួរដេញដោលរយៈពេលជាង១ឆ្នាំមកនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ត្បិតតែតុលាការមានឆន្ទានុសិទ្ធិក្នុងការដាក់បន្ទុកលើពួកគាត់ក៏ពិតមែន ប៉ុន្តែការធ្វើទុក្ខបុកម្នេញនិងចាប់ខ្លួនចោទប្រកាន់សកម្មជនកន្លងមក បានកើតឡើងដោយវិបត្តិនយោបាយ។
លោកថា៖ «យើងធ្លាប់ដឹងកន្លងមក បញ្ហានយោបាយនេះ អ្នកជាប់ឃុំនយោបាយនេះ បើសិនជាស្ថានភាពនយោបាយនៅតែមានភាពតឹងតែងបែបនេះ មិនមានអីប្រែប្រួលទេ ហើយអ្នកដែលគាត់រងទុក្ខទោសនៅក្នុងពន្ធនាគារ ចេះតែបន្តរហូតទៅ លុះត្រាតែមានការបន្ធូរបន្ថយស្ថានភាពនយោបាយកើតឡើង អាហ្នឹងបានពួកគាត់មានសេរីភាព»។
ថ្នាក់ដឹកនាំ និងសកម្មជនបក្សប្រឆាំងដែលតុលាការរំលាយ ជាប់ចោទពីបទ «ញុះញង់ឱ្យមានភាពវឹកវរធ្ងន់ធ្ងរសន្តិសុខសង្គម ញុះញង់យោធិនមិនឱ្យស្ដាប់បទបញ្ជា និងរួមគំនិតក្បត់» រួមមានចំនួន២១នាក់ ក្នុងនោះរួមមានទាំងលោក សម រង្ស៊ី, លោក អេង ឆៃអ៊ាង, លោក ហូរ វ៉ាន់, លោក នុត រំដួល, លោកស្រី ជូឡុង សូមូរ៉ា, លោកស្រី មូរ សុខហួរ ព្រមទាំងមនុស្សមួយចំនួនទៀត៕
