អ្នកភូមិឡពាង នៅស្រុកកំពង់ត្រឡាច ខេត្តកំពង់ឆ្នាំង ស្វែងរកមេធាវី ដើម្បីតតាំងក្ដីជាមួយប្រធានក្រុមហ៊ុន ខេឌីស៊ី (KDC) ដែលជាភរិយារបស់លោក ស៊ុយ សែម រដ្ឋមន្ត្រីក្រសួងរ៉ែ និងថាមពល ក្នុងរឿងជម្លោះដីធ្លី ក្រោយពីតុលាការបានចេញដីកាកោះហៅពលរដ្ឋ៧នាក់ឱ្យចូលបំភ្លឺ។
កាលពីចុងឆ្នាំ២០២១ សាលាឧទ្ធរណ៍រាជធានីភ្នំពេញ បានចេញដីកាកោះហៅពលរដ្ឋ៧នាក់ នៅភូមិឡពាង ឃុំតាជេស ស្រុកកំពង់ត្រឡាច ឱ្យចូលទៅបំភ្លឺនៅថ្ងៃទី២៦ ខែមករា ឆ្នាំ២០២២ ដើម្បីទាញហេតុផលផ្ទាល់មាត់ ជុំវិញបណ្ដឹងសុំមោឃភាពកិច្ចព្រមព្រៀងជាមួយម្ចាស់ក្រុមហ៊ុន ខេឌីស៊ី របស់លោកស្រី ជា ខេង ប៉ុន្តែត្រូវបានអ្នកភូមិ៧នាក់នោះដាក់ពាក្យសុំពន្យារពេលចូលបំភ្លឺវិញ។
អ្នកភូមិឡពាង អ្នកស្រី កែវ សុវណ្ណ អាយុ៥៩ឆ្នាំ ប្រាប់ វីអូឌី នៅថ្ងៃព្រហស្បតិ៍នេះថា ពួកគាត់បានដាក់ពាក្យសុំពន្យារពេលចូលបំភ្លឺកាលពីពាក់កណ្ដាលសប្ដាហ៍មុន ដោយសារពួកគាត់រកមេធាវីមកការពារក្ដីមិនទាន់បាន និងម្យ៉ាងទៀតតំណាងរបស់ពួកគេម្នាក់កំពុងជាប់ឃុំនៅឡើយ។
អ្នកស្រីបន្តថា អ្នកភូមិបានស្វែងរកមេធាវីលោកនាយករដ្ឋមន្ត្រី ហ៊ុន សែន ឱ្យជួយតតាំងក្ដីជាមួយលោកស្រី ជា ខេង ដែរ ប៉ុន្តែខាងមេធាវីលោកនាយកមន្ត្រីមិនទទួលការស្នើសុំរបស់ពួកគាត់ឡើយ ក្រោមហេតុផលថាជាប់រវល់ ខណៈការស្វែងរកមេធាវីពីខាងមជ្ឈមណ្ឌលសិទ្ធិមនុស្សកម្ពុជា មិនទាន់មានការឆ្លើយតបនៅឡើយ។
អ្នកស្រីបន្ថែមថា៖ «ពួកខ្ញុំទៅរកមេធាវីសម្ដេចឱ្យជួយដែរ ប៉ុន្តែមេធាវីសម្ដេចមិនទទួលទេ គេថាចៅក្រមហ្នឹងសុទ្ធតែបងប្អូន សុទ្ធតែមិត្តភក្តិ គេមិនអាចកាន់ក្ដីឱ្យពួកខ្ញុំបានទេ។ អ៊ីចឹងហើយបានជាពួកខ្ញុំនាំគ្នាទៅរកមេធាវីកន្លែងផ្សេងទៀត»។
អ្នកស្រី កែវ សុវណ្ណ ឱ្យដឹងទៀតថា អ្នកភូមិឡពាង ៣១គ្រួសារ បានប្ដឹងទៅតុលាការឱ្យមោឃភាពចោលកិច្ចព្រមព្រៀងជាមួយក្រុមហ៊ុន ខេឌីស៊ី ក្រោយពីម្ចាស់ក្រុមហ៊ុនមួយនេះផ្ដល់សំណងដីធ្លីឱ្យពួកគាត់៣៥គ្រួសារទាំងបង្ខិតបង្ខំ និងមានចំនួនតិចតួច និងបានរៀបចំគម្រោងភូតកុហក និងចាប់បង្ខំឱ្យពលរដ្ឋផ្ដិតមេដៃលើឯកសារ ដើម្បីបញ្ជាក់ថា ពួកគាត់បានទទួលយកសំណង។
ពលរដ្ឋឡពាងរូបនេះឱ្យដឹងថា លោកស្រី ជា ខេង ផ្ដល់លុយឱ្យគាត់ត្រឹមតែ៤លានរៀលសម្រាប់ដី៣ហិកតាកន្លះ ខណៈរូបគាត់និងពលរដ្ឋផ្សេងទៀតទាមទារសំណងតាមតម្លៃទីផ្សារ ដោយមួយហិកតាប្រហែល១០ ០០០ ទៅ២០ ០០០ដុល្លារ។
តំណាងពលរដ្ឋឡពាង អ្នកស្រី អ៊ុំ សុភី ឱ្យដឹងថា បច្ចុប្បន្ននៅមានពលរដ្ឋឡពាង ៥២គ្រួសារទៀត ដែលមានទំហំដី១១០ហិកតា កំពុងតវ៉ាជាមួយក្រុមហ៊ុន ខេឌីស៊ី ខណៈជម្លោះដីធ្លីនោះអូសបន្លាយជិត២០ឆ្នាំមកហើយ។ ករណីនេះបានស្នើដល់អាជ្ញាធរពាក់ព័ន្ធជួយពន្លឿនការដោះស្រាយ ជាពិសេសស្នើដល់តុលាការកាត់ក្ដីដោយផ្ដល់យុត្តិធម៌ដល់ពួកគាត់ផងដែរ។
អ្នកស្រីបន្ថែមថា៖ «ពាក់ព័ន្ធរឿងនេះ តុលាការលោកគួរតែរកយុត្តិធម៌ដល់ពួកខ្ញុំ។ កាត់ក្ដីដោយឈរលើគោលការណ៍ឯករាជ្យ យុត្តិធម៌សម្រាប់ពួកខ្ញុំ។ ហើយអាជ្ញាធរត្រូវដោះស្រាយរឿងនេះជូនពួកខ្ញុំឱ្យបានសមរម្យទៅតាមតម្លៃទីផ្សារ»។
វីអូឌី មិនអាចសុំការអត្ថាធិប្បាយជុំវិញករណីនេះពីលោក គី តិច ប្រធានក្រុមមេធាវីរបស់លោកនាយករដ្ឋមន្ត្រី ហ៊ុន សែន បានទេ នៅថ្ងៃនេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មិនទាន់អាចឆ្លើយបានទេ ពាក់ព័ន្ធអ្នកភូមិឡពាងស្នើមេធាវីពីខាងអង្គការរបស់លោកឱ្យជួយការពារក្ដីនេះ ដោយថា បញ្ហានោះកំពុងស្ថិតក្នុងការពិភាក្សាក្នុងក្រុមការងារនៅឡើយ។
លោកបន្តថា ករណីវិវាទដីធ្លីរវាងពលរដ្ឋឡពាង និងភរិយារដ្ឋមន្ត្រីនេះ ដែលបន្តអូសបន្លាយយូរឆ្នាំនេះ ដោយសារអាជ្ញាធរឬរដ្ឋាភិបាលគ្មានឆន្ទៈក្នុងការដោះស្រាយបញ្ចប់។ លោកថា ការបណ្ដែតបណ្ដោយឱ្យជម្លោះដីធ្លីបន្តអូសបន្លាយបែបនេះ បានធ្វើឱ្យប៉ះពាល់ដល់សិទ្ធិមនុស្សធ្ងន់ធ្ងរ ដោយសារអ្នកភូមិបានខ្លះបានបាត់បង់មុខរបរ ប្រាក់ចំណូល កូនៗបាត់បង់ការសិក្សា និងខ្វះខាតក្នុងជីវភាពគ្រួសារ។
លោកបន្ថែមថា៖ «មួយទៀត ទាក់ទងទៅនឹងជីវភាពរបស់ពួកគាត់នាពេលបច្ចុប្បន្ននេះ គឺវេទនាណាស់ កូនៗអត់បានទៅរៀនសូត្រដូចកូនប្រជាពលរដ្ឋដទៃទៀតទេ ដោយសាររវល់ដើរតស៊ូមតិដើម្បីទាមទារឱ្យមានដំណោះស្រាយដីធ្លី។ រហូតមកដល់បច្ចុប្បន្ននេះ ឃើញថា ជីវភាពរបស់ពួកគាត់កាន់តែលំបាកធ្ងន់ធ្ងរទៅ។ អ៊ីចឹងវារំលោភសិទ្ធិមនុស្សទាំងអស់របស់ប្រជាពលរដ្ឋដែលរងផលប៉ះពាល់ដីធ្លីហ្នឹង ហើយមិនត្រូវបានអើពើដោយរដ្ឋាភិបាលនិងអាជ្ញាធរជាដើមហ្នឹង»។
គួររម្លឹកថា ជម្លោះដីធ្លីរវាងពលរដ្ឋឡពាង និងក្រុមហ៊ុន ខេឌីស៊ី របស់លោកស្រី ជា ខេង ដែលជាភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានអូសបន្លាយជិត២០ឆ្នាំមកនេះ បានឈានដល់ការចាប់ខ្លួនពលរដ្ឋដាក់ពន្ធនាគារ និងប្រើហិង្សាបណ្ដាលឱ្យរបួសជាច្រើននាក់ផងដែរ៕
