ក្រុមអង្គការសង្គមស៊ីវិលធ្វើការផ្នែកសិទ្ធិការងារ និងសិទ្ធិមនុស្ស ស្វែងរកអន្តរាគមន៍ពីតំណាងរាស្ត្រឱ្យជួយរកដំណោះស្រាយវិវាទការងារនៅក្រុមហ៊ុនណាហ្គាវើលដ៍ ក្រោយពីកូដករត្រូវបានហាមតវ៉ា ក្រោមហេតុផលរកឃើញផ្ទុះជំងឺកូវីដ-១៩។
លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស នៃអង្គការសង់ត្រាល់ បានប្រាប់ វីអូឌី នៅព្រឹកថ្ងៃចន្ទនេះថា ក្រុមតំណាងសហជីពគ្រោងនឹងទៅស្វែងរកកិច្ចអន្តរាគមន៍ពីតំណាងរាស្ត្រនៅរដ្ឋសភា នៅរសៀលនេះ ហើយនឹងបន្តទៅរកការអន្តរាគមន៍ពីក្រសួងមហាផ្ទៃផងដែរ ជុំវិញវិវាទការងារនៅក្រុមហ៊ុនណាហ្គាវើលដ៍។
ការដែលក្រុមអង្គការសង្គមស៊ីវិលចេញរកអន្តរាគមន៍ឱ្យតំណាងរាស្ត្រជួយអន្តរាគមន៍រកដំណោះស្រាយនេះ ក្រោយពីបុគ្គលិកណាហ្គាវើលដ៍បាននាំគ្នាតវ៉ាជាង១ខែមកហើយ ទាមទារឱ្យថៅកែរបស់ខ្លួនយកតំណាងសហជីព ៣៥៦នាក់ ចូលធ្វើការវិញ។ ការតវ៉ារបស់បុគ្គលិកណាហ្គា ធ្វើឡើងបន្ទាប់ពីថៅកែបញ្ឈប់កម្មករជាង១ ០០០នាក់ ក្រោយពីមានការតវ៉ាទាមទារដំឡើងប្រាក់ខែអំឡុងឆ្នាំ២០២១។
យ៉ាងណា គិតត្រឹមថ្ងៃចន្ទនេះ តំណាងកូដករជាង១០នាក់ត្រូវបានអាជ្ញាធរចាប់ឃុំខ្លួនជាបន្តបន្ទាប់ ក្នុងនោះមាន៩នាក់ត្រូវបានបង្គាប់ឱ្យឃុំខ្លួនបណ្ដោះអាសន្នក្នុងពន្ធនាគារ៕