លោកនាយករដ្ឋមន្ត្រី ហ៊ុន សែន នឹងដឹកនាំគណៈប្រតិភូរដ្ឋាភិបាលទៅបំពេញទស្សនកិច្ចនៅសាធារណរដ្ឋកូរ៉េ និងធ្វើជាសហប្រធានក្នុងកិច្ចប្រជុំកំពូលសន្តិភាពពិភពលោក ក្រោមប្រធានបទ «ឆ្ពោះទៅកាន់សន្ដិភាពនៅឧបទី្វបកូរ៉េ» ក្នុងសប្ដាហ៍នេះ។
នាយកដ្ឋានព័ត៌មាននៃក្រសួងការបរទេស និងសហប្រតិបត្តិការអន្ដរជាតិ ម្សិលមិញ បានចេញសេចក្ដីប្រការព័ត៌មានមួយឱ្យដឹងថា ដំណើរទស្សនកិច្ចនិងកិច្ចប្រជុំកំពូលពិភពលោកនេះនឹងប្រព្រឹត្តទៅពីថ្ងៃទី១០ ដល់ថ្ងៃទី១៣ ខែកុម្ភៈ ឆ្នាំ២០២២ នៅទីក្រុងសេអ៊ូល នៃសាធារណរដ្ឋកូរ៉េ ឬកូរ៉េខាងត្បូង។
ប្រភពដដែលបន្តថា កិច្ចប្រជុំកំពូលពិភពលោក ឆ្នាំ២០២២នេះ នឹងមានការចូលរួមពីលោកស្រីបណ្ឌិត ហាក់ ចាហាន់មូន ជាសហស្ថាបនិកនៃសហព័ន្ធសន្ដិភាពសកល (UPF), លោក បាន គីមូន អតីតអគ្គលេខាធិការអង្គការសហប្រជាជាតិ និងមានវាគ្មិនសំខាន់ៗ ព្រមទាំងអ្នកចូលរួមពីបណ្ដាប្រទេសចំនួន១៥៧ផ្សេងទៀត ដើម្បីស្វែងរកក្ដីសង្ឃឹមក្នុងការបង្រួបបង្រួមឧបទ្វីបកូរ៉េប្រកបដោយសន្តិវិធី។
ក្រសួងការបរទេសបន្តថា ក្នុងដំណើរទស្សនកិច្ចនោះ លោក ហ៊ុន សែន នឹងមានជំនួបជាមួយប្រធានាធិបតីនៃសាធារណរដ្ឋកូរ៉េ លោក មូន ចេអ៊ីន ដើម្បីពិភាក្សាអំពីទំនាក់ទំនង និងកិច្ចសហប្រតិបត្តិការទេ្វភាគី ព្រមទាំងបញ្ហាតំបន់និងអន្ដរជាតិ ជាដើម។
ក្រសួងការបរទេសបញ្ជាក់ថា នៅថ្ងៃទី១២ ខែកុម្ភៈ កិច្ចប្រជុំកំពូលនឹងប្រគល់ពានរង្វាន់សនិ្តភាព “ស៊ុនហាក់ លើកទី៥” ជូនលោក ហ៊ុន សែន ជាផ្លូវការ ក្នុងនាមជានាយករដ្ឋមន្រ្តីនៃព្រះរាជាណាចក្រកម្ពុជាថែមទៀតផង៕