កូរ៉េខាងត្បូង បានប្រកាសដាក់ទណ្ឌកម្មលើកូរ៉េខាងជើង ចំពោះការពាក់ព័ន្ធនឹងការលួចរូបិយបណ្ណឌីជីថល (cryptocurrency) ជាសកល។ នេះបើតាមការចេញផ្សាយរបស់ទីភ្នាក់ងារសារព័ត៌មាន NHK នៅថ្ងៃទី១០ ខែកុម្ភៈ ឆ្នាំ២០២៣ នេះ។
ក្រសួងការបរទេសកូរ៉េខាងត្បូង បាននិយាយនៅថ្ងៃសុក្រនេះថា ការដាក់ទណ្ឌកម្មនេះផ្តោតលើអ្នកជំនាញបច្ចេកវិទ្យាកូរ៉េខាងជើង ចំនួន៤នាក់ រួមទាំងក្រុមចោរបច្ចេកវិទ្យា (Hacker) និងអង្គភាពចំនួន៧ រួមទាំងអ្នកដែលស្ថិតនៅក្រោមទីភ្នាក់ងារស៊ើបការណ៍យោធារបស់កូរ៉េខាងជើង។
ក្រសួងនេះបាននិយាយថា បុគ្គលទាំងនេះត្រូវបានសង្ស័យថាជាប់ពាក់ព័ន្ធក្នុងការវាយប្រហារតាមអ៊ីនធឺណិត និងកម្មវិធីទាក់ទងនឹងការលួចរូបិយបណ្ណឌីជីថល (cryptocurrency)។
ទណ្ឌកម្មនេះធ្វើឡើងដើម្បីរារាំងសកម្មភាពលួចប្រាក់តាមអ៊ីនធឺណិតដោយខុសច្បាប់ដើម្បីផ្គត់ផ្គង់ដល់កម្មវិធីមីស៊ីល និងនុយក្លេអ៊ែររបស់កូរ៉េខាងជើង។ វិធានការនេះនឹងហាមឃាត់ប្រតិបត្តិការហិរញ្ញវត្ថុជាមួយគោលដៅ។
នេះជាការដាក់ទណ្ឌកម្មលើកទី៣ លើកូរ៉េខាងជើង ដោយរដ្ឋាភិបាលកូរ៉េខាងត្បូង ក្រោមការដឹកនាំរបស់ប្រធានាធិបតី យូន ស៊ុកយុល (Yoon Suk-yeol) និងជាលើកទីមួយ ជុំវិញសកម្មភាពខុសច្បាប់។
ទីភ្នាក់ងារស៊ើបការណ៍សម្ងាត់របស់ប្រទេសកូរ៉េខាងត្បូង និងសហរដ្ឋអាមេរិក បានបង្ហាញអាសយដ្ឋាន IP (internet protocol) របស់អង្គភាពដែលសង្ស័យថាជាប់ពាក់ព័ន្ធក្នុងការវាយប្រហារតាមអ៊ីនធឺណិត ដែលជាផ្នែកមួយនៃការលួចរូបិយបណ្ណឌីជីថលសកលដោយក្រុមចោរបច្ចេកវិទ្យា (Hacker) កូរ៉េខាងជើង។
គួរបញ្ជាក់ថា របាយការណ៍នាពេលថ្មីនេះដែលដាក់ជូនក្រុមប្រឹក្សាសន្តិសុខអង្គការសហប្រជាជាតិ បាននិយាយថា ប្រទេសកូរ៉េខាងជើង បានលួចរូបិយបណ្ណឌីជីថល (cryptocurrency) នៅឆ្នាំ២០២២ ច្រើនជាងឆ្នាំណាៗទាំងអស់។ យោងតាមទីភ្នាក់ងារសារព័ត៌មាន Reuters បានឱ្យដឹងថា រូបិយបណ្ណឌីជីថលដែលបានលួចនោះអាចមានតម្លៃប្រហែល ១ ពាន់លានដុល្លារ៕
