ប្រជាពលរដ្ឋមួយចំនួននៅរាជធានីភ្នំពេញបារម្ភពីផលប៉ះពាល់ដល់ជីវភាពគ្រួសារ បើសិនជាមានការបិទខ្ទប់ក្រុងឬភូមិសាស្ត្រណាមួយជាថ្មី ដើម្បីទប់ស្កាត់ការឆ្លងរាលដាលនៃជំងឺប្រភេទថ្មី «អូមីក្រុង» ខណៈជំងឺនេះកំពុងឆ្លងរាលដាលកាន់តែខ្លាំងពីមួយថ្ងៃទៅមួយថ្ងៃ។
ការព្រួយបារម្ភនេះ ស្របពេលដែលលោកនាយករដ្ឋមន្ត្រី ហ៊ុន សែន បានចេញសារជាសំឡេងជូនជនរួមជាតិ ពាក់ព័ន្ធស្ថានភាពការរីករាលដាលខ្លាំងនៃមេរោគកូវីដ-១៩ ប្រភេទ អូមីក្រុង។ លើសពីនេះ លោកបានអំពាវនាវឱ្យប្រជាពលរដ្ឋកាត់បន្ថយការជួបជុំផឹកស៊ីកម្សាន្តសប្បាយ ដើម្បីធានានូវការរក្សាគម្លាតសុវត្ថិភាព រួមទាំងមង្គលការ និងបុណ្យសាសនា ជាដើម គួរតែមានការជួបជុំគ្នា «កាន់តែតិច កាន់តែល្អ»។
អាជីវករម្នាក់លក់គ្រឿងក្លែមនៅម្ដុំសង្កាត់ទួលស្វាយព្រៃ រាជធានីភ្នំពេញ អ្នកស្រី សុខ លីនដា និយាយថា គាត់ឃើញព័ត៌មាននេះដោយដកស្រង់ប្រសាសន៍របស់លោកនាយករដ្ឋមន្ត្រី ហ៊ុន សែន មកផ្សព្វផ្សាយតាមបណ្ដាញសង្គមហ្វេសប៊ុក។ អ្នកស្រីថា ព័ត៌មាននេះធ្វើឱ្យគាត់បារម្ភខ្លាចជំងឺប្រភេទនេះឆ្លងរាលដាលដល់សហគមន៍កាន់តែខ្លាំង នឹងធ្វើឱ្យរដ្ឋាភិបាលបិទខ្ទប់ជាថ្មីទៀត ហើយអ្នករងគ្រោះគឺប្រជាពលរដ្ឋដែលមានជីវភាពក្រីក្រ។
អ្នកស្រីបារម្ភដូច្នេះថា៖ «បើមានការបិទដូចពីមុន មានការបារម្ភដែរ ព្រោះយើងជាអាជីវកររកស៊ី។ អ៊ីចឹងវាពិបាកណាស់ វាប៉ះពាល់ដល់ចំណូល ដល់ជីវភាពគ្រួសារ អ៊ីចឹងខ្ញុំមានការបារម្ភច្រើន។ អ៊ីចឹងខ្ញុំនឹងចូលរួមទប់ស្កាត់ទាំងអស់គ្នា កុំឱ្យជំងឺហ្នឹង [កូវីដ-១៩] កើតឡើង»។
អាជីវករលក់គ្រឿងទេសនៅម្ដុំសង្កាត់ផ្សារដើមគ រាជធានីភ្នំពេញ អ្នកស្រី ស៊ុន រតនៈស្រីពៅ លើកឡើងដោយគាំទ្រប្រសាសន៍របស់លោកនាយករដ្ឋមន្ត្រី ហ៊ុន សែន ដែលស្នើឱ្យពលរដ្ឋកាត់បន្ថយការជួបជុំផឹកស៊ីកម្សាន្តសប្បាយ និងរក្សាគម្លាត ដើម្បីរួមគ្នាទប់ស្កាត់ការឆ្លងរាលដាលជំងឺប្រភេទ «អូមីក្រុង»។
ទោះជាបែបនេះក្ដី អ្នកស្រីនៅតែព្រួយបារម្ភថា បើជំងឺប្រភេទបំប្លែងខ្លួនថ្មីនេះឆ្លងចូលក្នុងសហគមន៍កាន់តែខ្លាំង ហើយរដ្ឋាភិបាលបិទក្រុងដូចកាលពីកន្លងមក នឹងធ្វើឱ្យប្រជាពលរដ្ឋកាន់តែរងគ្រោះធ្ងន់ធ្ងរ ជាពិសេសបញ្ហាជីវភាពតែម្ដង។
អ្នកស្រីមានប្រសាសន៍ថា៖ «ហាងធម្មតា គេសុទ្ធតែមានគម្លាតត្រឹមត្រូវ មានតុ មានអាល់កុលការពាររបស់គេហើយ ប៉ុន្តែដូចជាក្លឹប ខារ៉ាអូខេ ទទួលស្គាល់ថាគេមានជាអាល់កុលការពារ ប៉ុន្តែវាមិនមែនទាំងអស់ដូចពួកយើងទេ។ វាមានកន្លែងខ្លះក៏ទូលាយ កន្លែងខ្លះក៏ជិតទៅ និយាយរួម បិទតែក្លឹប និងខារ៉ាអូខេទៅ វាល្អហើយ ព្រោះអីមនុស្សយើងភាគច្រើនជួបជុំគ្នាតែផឹកស៊ីតែក្រៅទេ ប៉ុន្តែក្នុងក្លឹបវិញ មួយៗយប់សឹងតែទល់ភ្លឺ»។
លោក យិន តារា ដែលប្រកបអាជីវកម្មក្រៅប្រព័ន្ធមួយរូប អំពាវនាវទៅប្រជាពលរដ្ឋទាំងអស់ត្រូវរួមគ្នារក្សាអនាម័យ រក្សាគម្លាត កាត់បន្ថយការជួបជុំ ស្របតាមការអំពាវនាវរបស់រដ្ឋាភិបាល ដើម្បីទប់ស្កាត់ការឆ្លងរាលដាលជំងឺកូវីដ-១៩ប្រភេទថ្មី ឱ្យមានប្រសិទ្ធភាពខ្ពស់។
លោកអំពាវនាវដូច្នេះថា៖ «បើធម្មតាអ៊ីចឹងទៅ គ្រាន់តែយើងនៅរក្សាគម្លាត ឃ្លាតពីគ្នា កុំនៅជិតគ្នាពេក ខ្លាចវាឆ្លង។ បើឆ្លង បិទប្រទេសទៀត វាចប់ហើយ បានអីសងលុយគេ បើយើងជំពាក់លុយគេដែរ។ បើយើងមានជំងឺកូវីដ គេយកយើងទៅឃុំហើយ។ អ៊ីចឹងយើងរកចំណូលឯណាចូលក្នុងគ្រួសារ»។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី មានប្រសាសន៍ថា រដ្ឋាភិបាលអំពាវនាវឱ្យប្រជាពលរដ្ឋប្រុងប្រយ័ត្ននិងកាត់បន្ថយការជួបជុំបែបនេះ ដោយសារថ្នាក់ដឹកនាំបានដឹងពីចំនួនអ្នកឆ្លងជំងឺកូវីដ-១៩ប្រភេទ «អូមីក្រុង» មានការកើនឡើងខ្លាំងគួរឱ្យកត់សម្គាល់នាប៉ុន្មានថ្ងៃចុងក្រោយនេះ។
លោក អ៊ូច វុទ្ធី បញ្ជាក់ថា បើប្រជាពលរដ្ឋមិនគោរពតាមការអំពាវនាវរបស់លោកនាយករដ្ឋមន្ត្រីទេ អ្នកដែលរងគ្រោះគឺប្រជាពលរដ្ឋខ្លួនឯង មិនអាចបន្ទោសទៅថ្នាក់ដឹកនាំបានឡើយ។
លោកមានប្រសាសន៍ថា៖ «បើសិនជាបងប្អូនប្រជាពលរដ្ឋយើង គាត់អត់ស្ដាប់ការទូន្មានរបស់មន្ត្រីជំនាញសុខាភិបាល ក៏ដូចជាប្រមុខរដ្ឋាភិបាល កន្លែងហ្នឹងហើយ ហានិភ័យគឺខ្លួនគាត់ទាំងអស់ជាអ្នកទទួលខុសត្រូវ គឺខ្លួនគាត់! គ្មាននរណាជួយខ្លួនយើងជាងខ្លួនយើងជួយខ្លួនឯងទេ។ បើសិនជាបងប្អូននៅតែផ្គើន នៅតែមិនស្ដាប់ ហើយប្រហែស នោះហើយគេហៅថា វាសនាខ្លួនឯង ទទួលរងគ្រោះខ្លួនឯង»។
សេចក្ដីប្រកាសព័ត៌មានរបស់ក្រសួងសុខាភិបាលនៅថ្ងៃទី៩ ខែកុម្ភៈ ឆ្នាំ២០២២ បានឱ្យដឹងថា ក្រសួងបានរកឃើញករណីឆ្លងជំងឺកូវីដ-១៩ថ្មី ចំនួន២២៣នាក់ទៀត ដែលសុទ្ធតែជាប្រភេទអូមីក្រុងទាំងអស់។ ក្នុងនោះមានករណីនាំចូលពីក្រៅប្រទេសចំនួន៥នាក់ និងឆ្លងក្នុងសហគមន៍២១៨នាក់។ ចំណែកអ្នកជាសះស្បើយថ្មីវិញ ក្រសួងថាមានចំនួន៥៨នាក់ ហើយអ្នកស្លាប់ថ្មីគ្មានឡើយ។
គិតត្រឹមព្រឹកថ្ងៃពុធនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២២ ២០៦នាក់ ក្នុងនោះ អ្នកជំងឺព្យាបាលជាសះស្បើយចំនួន១១៨ ៣៤៤នាក់ និងអ្នកស្លាប់ចំនួន៣ ០១៥នាក់ ហើយករណីនាំចូលពីក្រៅប្រទេសចំនួន២០ ៤២៦នាក់។ ចំណែកករណីឆ្លងអូមីក្រុងក្នុងសហគមន៍វិញ ក្រសួងបញ្ជាក់ថា គិតមកដល់ពេលនេះមានចំនួនសរុប១ ១៩៦នាក់៕