កុ្រមកូដករក្រុមហ៊ុនល្បែងណាហ្គាវើលដ៍ អះអាងថា ពួកគេនឹងចូលទៅបំភ្លឺតាមដីកាបញ្ជាឱ្យចូលខ្លួនរបស់តំណាងអយ្យការអមសាលាដំបូងរាជធានីភ្នំពេញ ពាក់ព័ន្ធនឹងបទចោទ «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩» ឱ្យបានមុនថ្ងៃទី១៩ ខែកុម្ភៈនេះ។
ការអះអាងនេះធ្វើឡើងបន្ទាប់ពីលោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចេញដីកាបញ្ជាឱ្យកូដករក្រុមហ៊ុនណាហ្គាវើលដ៍ចំនួន៤នាក់ រួមមាន ឈ្មោះ ម៉េង កាក់នីកា, អេង ស្រីបូ, អ៊ុក សុភ័ក្រម៉ូលីកា និង ខេង ចិន្ដា ឱ្យចូលខ្លួននៅការិយាល័យប្រឆាំងភេរវកម្ម និងឧក្រិដ្ឋកម្មឆ្លងដែន នៃស្នងការដ្ឋាននគរបាលរាជធានីភ្នំពេញ ឱ្យបានមុនថ្ងៃទី១៩ ខែកុម្ភៈនេះ។
អ្នកស្រី អ៊ុក សុភ័ក្រម៉ូលីកា ដែលអះអាងថាជាកូដករនៅក្រុមហ៊ុនណាហ្គាវើលដ៍ និយាយថា កាលពីថ្ងៃទី៤ ខែកុម្ភៈ ឆ្នាំ២០២២ ខាងក្រសួងសុខាភិបាលបានជូនដំណឹងឱ្យក្រុមកូដករទៅផ្ដល់សំណាករកវិជ្ជមានកូវីដ-១៩ ហើយនៅថ្ងៃនោះ ពួកគាត់មិនបានរារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩ ដូចការចោទប្រកាន់នោះទេ ដោយគ្រាន់តែពួកគេស្នើសុំទៅធ្វើតេស្តនៅព្រឹកថ្ងៃទី៥ ខែកុម្ភៈប៉ុណ្ណោះ ប៉ុន្តែបែរជាតុលាការចោទប្រកាន់ពួកគេថា «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩» ទៅវិញ។
អ្នកស្រីនិយាយថា៖ «ខ្ញុំក៏ឆ្ងល់ ខ្ញុំក៏ចង់សួរទៅអយ្យការដែរ គាត់ចោទខ្ញុំហ្នឹង គាត់មានភស្តុតាងអីដែលគាត់ថាពួកខ្ញុំរារាំង? ព្រោះលិខិតរបស់ក្រសួងបានចេញមកហើយ ទុករយៈពេល៣ថ្ងៃសម្រាប់កូដករទៅធ្វើតេស្តរកវិជ្ជមានកូវីដ ហើយពួកខ្ញុំក៏បានទៅធ្វើតេស្តរកវិជ្ជមានកូវីដតាមអ្វីដែលក្រសួងតម្រូវដែរ។ ហើយស្រាប់តែថ្ងៃ៥កុម្ភៈ គាត់ចាប់ខ្លួនគ្នាខ្ញុំ៦នាក់ ដោះលែង៣នាក់ ហើយចេញដីកាកោះហៅពួកខ្ញុំថារារាំង។ មានរូបភាពណាថាពួកខ្ញុំរារាំង? ព្រោះពួកខ្ញុំបានទៅយកសំណាកអស់ហើយ»។
ចំណែកអ្នកស្រី ម៉េង កាក់នីកា ដែលអះអាងថាជាកូដករនៅក្រុមហ៊ុនណាហ្គាវើលដ៍ និយាយថា គាត់នឹងចូលបំភ្លឺតាមដីកាបញ្ជាឱ្យចូលខ្លួននៅការិយាល័យប្រឆាំងភេរវកម្ម និងឧក្រិដ្ឋកម្មឆ្លងដែន នៃស្នងការដ្ឋាននគរបាលរាជធានីភ្នំពេញ ឱ្យបានមុនថ្ងៃទី១៩ ខែកុម្ភៈនេះ។ អ្នកស្រីស្នើទៅតុលាការទម្លាក់ការចោទប្រកាន់ទៅលើពួកគាត់ ដោយសារពួកគាត់មិនបានធ្វើខុសដូចការចោទប្រកាន់នោះទេ។
អ្នកស្រីស្នើដូច្នេះថា៖ «ខ្ញុំស្នើសុំឱ្យតុលាការទម្លាក់ការចោទប្រកាន់មកលើពួកខ្ញុំហ្នឹងទៅ ព្រោះអីពួកខ្ញុំទាំងអស់គ្នា ទាំងកូដករ ក៏ដូចជាសាក្សីទាំងអស់គ្នាដែរ គឺអត់មានពីណាគេបានរារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩ទេ គឺបានទៅធ្វើតេស្តទាំងអស់គ្នា អត់មានម្នាក់ណាអត់ទៅធ្វើតេស្តទេ»។
បន្ថែមពីនេះ ក្រុមកូដករបានអះអាងប្រហាក់ប្រហែលគ្នាថា មុនពេលពីរឬបីថ្ងៃដែលពួកគាត់ចូលបំភ្លឺនៅស្នងការដ្ឋាននគរបាលរាជធានីភ្នំពេញ គឺពួកគាត់នឹងប្រជុំជាមួយក្រុមកូដករទាំងអស់ រួចធ្វើសេចក្ដីថ្លែងការណ៍ជាសាធារណៈប្រាប់ទៅមជ្ឈដ្ឋានជាតិនិងអន្តរជាតិ ឱ្យដឹងថា ពួកគាត់ជាមនុស្សស្អាតស្អំ មិនពាក់ព័ន្ធរឿងនយោបាយ និងមិនមានសង្គមស៊ីវិលឬបុគ្គលណានៅពីក្រោយ ហើយការធ្វើកូដកម្មនេះគឺធ្វើឡើងដោយសន្តិវិធីនិងអហិង្សាជាដើម។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍យ៉ាងខ្លីថា ការចូលឬមិនចូលបំភ្លឺរបស់កូដករណាហ្គាវើលដ៍នៅស្នងការដ្ឋាននគរបាលរាជធានីភ្នំពេញ ជាសិទ្ធិរបស់ពួកគេ ហើយការសម្រេចយ៉ាងណានោះ គឺអាស្រ័យទៅលើស្ថាប័នតុលាការ ខណៈសមត្ថកិច្ចធ្វើទៅតាមតួនាទីប៉ុណ្ណោះ។
វីអូឌី មិនអាចសុំការបញ្ជាក់ពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅរសៀលថ្ងៃនេះ។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស នៃអង្គការសង់ត្រាល់ លោក ឃុន ថារ៉ូ ចាត់ទុកការចាប់ខ្លួនថ្នាក់ដឹកនាំសហជីព និងកូដករ រួមទាំងការចេញដីកាបញ្ជាឱ្យកូដករចូលខ្លួនទៅបំភ្លឺនេះ ជាសារមួយដាក់សម្ពាធនិងគំរាមកំហែងសិទ្ធិសេរីភាពនៃការធ្វើកូដកម្មដោយសន្តិវិធីនិងអហិង្សា ផ្ទុយពីច្បាប់ជាតិនិងសន្ធិសញ្ញាអន្តរជាតិ។
លោកបញ្ជាក់ថា បើរដ្ឋាភិបាលនិងក្រសួងពាក់ព័ន្ធមិនជួយអន្តរាគមន៍ដោះស្រាយបញ្ចប់វិវាទការងារ និងដោះលែងថ្នាក់ដឹកនាំសហជីពនិងកូដករ រួមទាំងទម្លាក់ការចោទប្រកាន់ទៅលើពួកគេទេ នឹងធ្វើឱ្យប៉ះពាល់ដល់មុខមាត់កម្ពុជាលើឆាកអន្តរជាតិ។
លោកមានប្រសាសន៍ថា៖ «បើសិនជារឿងនៅក្រុមហ៊ុនណាហ្គាវើលដ៍នេះមិនត្រូវបានដោះស្រាយ ហើយក្រសួងការងារមិនមានឥទ្ធិពល មិនមានអំណាច វាបង្ហាញថា និយោជកដែលមានឥទ្ធិពល គាត់អាចបន្តទៅការកេងប្រវ័ញ្ច រំលោភបំពាន មិនគោរពច្បាប់។ វានឹងប៉ះពាល់ដល់មុខមាត់កម្ពុជានៅលើឆាកអន្តរជាតិ»។
កាលពីថ្ងៃទី៥ ខែកុម្ភៈ សមត្ថកិច្ចរាជធានីភ្នំពេញបានចាប់ខ្លួនកូដករក្រុមហ៊ុនណាហ្គាវើលដ៍ចំនួន៦នាក់ ប៉ុន្តែ៣នាក់ត្រូវបានដោះលែងទៅវិញ ខណៈកូដករ៣នាក់ទៀតត្រូវបានតុលាការចោទប្រកាន់និងឃុំខ្លួនពួកគាត់បណ្ដោះអាសន្ននៅពន្ធនាគារ ក្រោមបទចោទ «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»។
រហូតមកទល់ពេលនេះ មានថ្នាក់ដឹកនាំសហជីពនិងកូដករក្រុមហ៊ុនណាហ្គាវើលដ៍ចំនួន១១នាក់ហើយ ត្រូវបានតុលាការសម្រេចឃុំខ្លួន ដោយចោទប្រកាន់ពីបទ «ញុះញង់ឱ្យមានកូដកម្ម» និង »ល្មើសវិធានការច្បាប់ប្រឆាំងកូវីដ-១៩» ខណៈកូដករ៤នាក់ទៀតត្រូវប្រឈមការចាប់ខ្លួនក្រោមបទចោទថា «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩» ផងដែរ៕