ស្រ្តីដែលជាប់ទាក់ទងសកម្មភាពយកស្បែកជើងគប់ស្លាកគណបក្សប្រជាជនកម្ពុជា អះអាងថា គាត់ត្រូវបានតុលាការខេត្តកំពង់ស្ពឺកំណត់ជាកំហិតទុកពេល១ថ្ងៃ ដើម្បីឱ្យអ្នកស្រីយកលុយចំនួន១០លានរៀលបង់ថ្លៃពិន័យ ក្រោយពេលអ្នកស្រីបានអនុវត្តទោសដែលជាទោសកម្រិតអតិបរមានៅក្នុងពន្ធនាគារ៤ឆ្នាំកន្លងទៅនេះ។
អ្នកស្រី សំ សុខា ជាអ្នកគាំទ្រគណបក្សសង្រ្គោះជាតិដែលត្រូវបានតុលាការកំពូលរំលាយ បានប្រាប់ វីអូឌី នៅថ្ងៃទី១០ ខែកុម្ភៈនេះថា អ្នកស្រីបានអនុវត្តទោសគ្រប់ចំនួន ដូចការចោទប្រកាន់របស់តុលាការចប់សព្វគ្រប់អស់ហើយ គិតត្រឹមថ្ងៃទី៩ ខែកុម្ភៈ ម្សិលមិញនេះ។
ប្រភពបន្តថា ប៉ុន្តែអ្វីដែលអ្នកស្រ្តីខ្វល់ខ្វាយនិងលំបាកចិត្តទៀត គឺក្នុងថ្ងៃតែមួយនៃការដោះលែងឱ្យមានសេរីភាពវិញនេះ តុលាការទុកពេលឱ្យតែ១ថ្ងៃប៉ុណ្ណោះ ដើម្បីឱ្យអ្នកស្រីរកលុយបង់ថ្លៃពិន័យឱ្យបាន។ អ្នកស្រី សំ សុខា បន្ថែមថា ប្រសិនបើអ្នកស្រីរកលុយសម្រាប់បង់ថ្លៃពិន័យឱ្យតុលាការនៅថ្ងៃនេះមិនទាន់ពេលទេ អ្នកស្រីអាចនឹងត្រូវចាប់ខ្លួនបញ្ជូនទៅពន្ធនាគារសាជាថ្មីទៀត។
អ្នកស្រីបន្តថា៖ «បើប្រៀបធៀបជាមួយអ្នកទោសគេផ្សេង គឺគេមានការបង់រម្លស់ តែបើសម្រាប់ខ្ញុំ គេអត់ឱ្យបង់រម្លស់ ហើយគេអត់ឱ្យពេលវេលាខ្ញុំតែម្ដង។ ខ្ញុំសុំគេបានត្រឹមតែ១ថ្ងៃនៅថ្ងៃនេះ ហើយបើយើងអត់មានសមត្ថភាពបង់ទាំងមូល ហើយបើសិនខ្ញុំរកលុយបានត្រឹម២លានអីដាក់តម្កល់អីសិនបានដែរអត់ គេថាអត់! គេថាលោកស្រីអត់មានសិទ្ធិតាំងជាសំណួរទៅកាន់គេទេ គ្រាន់តែចាំឆ្លើយថាមានឬមិនមាន បានតែប៉ុណ្ណឹង»។
បើតាមអ្នកស្រី សំ សុខា នៅពេលនេះ រូបគាត់មិនដឹងមានមធ្យោបាយអ្វី ដើម្បីបានលុយដែលមានទំហំដ៏ច្រើនបែបនេះមកពីណា ក្នុងការបង់ថ្លៃពិន័យទៅតុលាការនោះឡើយ។ អ្នកស្រីកំពុងពិគ្រោះយោបល់ជាមួយសាច់ញាតិ ក្នុងការរិះរកវិធីដើម្បីបានលុយបង់ថ្លៃពិន័យនេះទៅតុលាការ ប៉ុន្តែពេលវេលាត្រឹមតែមួយថ្ងៃដែលទុកឱ្យអ្នកស្រីរកលុយនេះ វាខ្លីណាស់ ក្រោយចេញពីពន្ធនាគារភ្លាមៗ។
អ្នកស្រី សំ សុខា គឺជាអតីតកម្មការិនីរោងចក្រមួយកន្លែង ស្ថិតក្នុងស្រុកសំរោងទង ខេត្តកំពង់ស្ពឺ។ ជាអ្នកស្រុកកំណើតនៅខេត្តតាកែវ និងមានផ្ទះជួលនៅភូមិត្រស់សាលា សង្កាត់ក្រវ៉ាន់ ក្រុងច្បារមន ខេត្តកំពង់ស្ពឺ។ អ្នកស្រីក៏ជាអ្នកគាំទ្រគណបក្សសង្រ្គោះជាតិដែលត្រូវបានតុលាការកំពូលរំលាយផងដែរ។
កាលពីចុងខែមិថុនា ឆ្នាំ២០១៧ សាលាដំបូងខេត្តកំពង់ស្ពឺបានផ្ដន្ទាទោសដោយកំបាំងមុខអ្នកស្រី សំ សុខា ដាក់ពន្ធនាគារ២ឆ្នាំ និងពិន័យលុយ៥លានរៀល ក្រោមបទចោទ «ជេរប្រមាថ និងញុះញង់ឱ្យមានការរើសអើង»។ ការផ្ដន្ទាទោសដោយកំបាំងមុខនេះ បន្ទាប់ពីអ្នកស្រី បានយកស្បែកជើងគប់ស្លាកគណបក្សប្រជាជនកម្ពុជា ដែលមានរូបលោកនាយករដ្ឋមន្រ្តី ហ៊ុន សែន និងលោក ហេង សំរិន ប្រធានរដ្ឋសភា កាលពីដើមខែមេសា ឆ្នាំ២០១៧ នៅស្រុកព្រៃនប់ ខេត្តព្រះសីហនុ។
ជាថ្មីទៀត តុលាការខេត្តកំពង់ស្ពឺ បានកាត់ទោសអ្នកស្រីឱ្យជាប់ពន្ធនាគារចំនួន២ឆ្នាំ និងពិន័យលុយ៥លានរៀលបន្ថែមទៀត។ ការផ្ដន្ទាទោសលើកទី២នេះ ក្រោយពេលអ្នកស្រីត្រូវបានអាជ្ញាធរថៃចាប់ខ្លួនមកកម្ពុជាវិញ កាលពីដើមខែកុម្ភៈ ឆ្នាំ២០១៨ ខណៈអ្នកស្រីទទួលបានសិទ្ធិជាជនភៀសខ្លួនពីឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន ដែលមានការិយាល័យនៅទីក្រុងបាងកក ក្រោយពីអ្នកស្រីរត់ភៀសខ្លួន ទៅដល់ទីនោះ។
ការផ្ដន្ទាទោសទាំងពីរលើកនេះបានធ្វើឱ្យអ្នកស្រី សំ សុខា ត្រូវជាប់ពន្ធនាគារសរុបចំនួន៤ឆ្នាំ និងពិន័យជាប្រាក់ចំនួន១០លានរៀល។
អ្នកនាំពាក្យក្រសួងយុត្តិធម៌ លោក ជិន ម៉ាលីន ថ្លែងថា ការបន្តនីតិវិធីបែបណាទៀតនោះ វាជាឆន្ទានុសិទ្ធិរបស់តំណាងអយ្យការ ដែលជាអ្នកមានភារៈទទួលបន្ទុកក្នុងការអនុវត្តសាលក្រមរបស់តុលាការ។ លោកបន្តថា ចំពោះក្រសួងយុត្តិធម៌មិនមានចំណាត់ការឬក៏ឥទ្ធិពលណាមួយនៅក្នុងរឿងក្ដីនេះទេ។
លោកបន្តថា៖ «បាទ! ហ្នឹងគឺអាស្រ័យលើព្រះរាជអាជ្ញា។ ព្រះរាជអាជ្ញាជាអ្នកអនុវត្តពិន័យតាមអំណាចសាលក្រមណាបាទ»។
ដោយឡែក ព្រះរាជអាជ្ញារងនៃអយ្យការអមសាលាដំបូងខេត្តកំពង់ស្ពឺ លោក វ៉ិត មោឃៈ ដែលកាន់សំណុំរឿងនេះ បដិសេធថា តុលាការមិនបានបង្ខំឱ្យអតីតទណ្ឌិតរូបនេះត្រូវរកលុយក្នុងពេលត្រឹម១ថ្ងៃដូច្នេះឡើយ ប៉ុន្តែនេះជាការស្នើឡើងពីសាម៉ីខ្លួនប៉ុណ្ណោះ។ លោកបន្តថា ការបន្តនីតិវិធីបែបណាទៀតនោះ គឺត្រូវរង់ចាំមើលពីភាគីនៅក្នុងរឿងក្ដីនេះសិន។
លោកបន្តថា៖ «ដោយសារនេះជានីតិវិធី អ៊ីចឹងនៅពេលដែលតុលាការមានចំណាត់ការ ទើបជាព័ត៌មានមួយដែលច្បាស់លាស់ ព្រោះអីជាសំណូមពររបស់គាត់ទេ។ សំណូមពររបស់គាត់ដែលគាត់សុំដោយខ្លួនគាត់ នេះជាសំណូមពររបស់គាត់។ ដូច្នេះបន្ទាប់មកជានីតិវិធីបែបណានោះ នឹងមានចំណាត់ការបន្តទៀត»។
នាយករងអង្គការការពារសិទ្ធិមនុស្ស លីកាដូ (Licadho) លោក អំ សំអាត ចាត់ទុកការកំណត់ពេលដ៏ខ្លីសម្រាប់ការបង់ពិន័យរបស់អតីតទណ្ឌិតរូបនេះថា ជាការបិទផ្លូវរស់សម្រាប់អ្នកស្រី សំ សុខា។ លោកបន្តថា ករណីនេះទើបជាលើកទី១ហើយដែលតុលាការចាប់អនុវត្តសម្រាប់អតីតជនជាប់ឃុំដែលបានអនុវត្តទោសស្ថាពរ។ បញ្ហានេះ លោកថា វាក៏មិនខុសពីឱ្យមនុស្សដើរដល់ផ្លូវទាល់ច្រកដែរ។
លោកបន្តថា៖ «សូម្បីគាត់ទៅលក់ទ្រព្យសម្បត្តិក៏លក់មិនទាន់ផង មួយថ្ងៃបែបនេះ ដើម្បីបានលុយយកមកបង់ពិន័យ។ ដូច្នេះ ខ្ញុំមើលទៅបញ្ហានេះ វាហាក់ដូចជាដាក់សម្ពាធសម្រាប់គាត់ [សំ សុខា] ធ្ងន់ធ្ងរពេក នៅក្នុងករណីនេះ។ ដោយសារនៅក្នុងករណីនេះ យើងឃើញហើយ ជាករណីមួយមានការចាប់អារម្មណ៍តាំងពីដើមមក។ គាត់ត្រូវបានចាប់បញ្ជូនពីប្រទេសថៃមកកម្ពុជាវិញ ហើយដាក់ពន្ធនាគារដោយមិនមានស្ថានសម្រាលទោស»។
បើតាមលោក លោក អំ សំអាត ការអនុវត្តដោយបង្ខំនេះ គឺប្រហែលជាតុលាការយោងលើក្រមនីតិវិធីព្រហ្មទណ្ឌ។ លោកបន្តថា ក្នុងក្រមនេះបានបញ្ញត្តិថា ប្រសិនបើការផាកពិន័យនេះ លុយមានចន្លោះចាប់ពី៥លានរៀល រហូតដល់១០លានរៀល ត្រូវដាក់ទោសបង្ខំរូបរាងកាយចំនួន៦ខែ។ ក្រោយពេលអនុវត្តទោសបាន៦ខែស្ថាពរហើយ តុលាការមិនមានសិទ្ធិចាប់បង្ខំដាក់ពន្ធនាគារសាជាថ្មីទៀតទេ ប៉ុន្តែត្រូវបង្គាប់ឱ្យបង់ប្រាក់តាមរយៈលក់ឡាយឡុងទ្រព្យសម្បត្តិ ជាដើម។ មាត្រា៥៣០ នៃក្រមនីតិវិធីព្រហ្មទណ្ឌ បានចែងថា ថេរវេលានៃការបង្ខំនេះត្រូវកំណត់ដោយគិតគូរតាមចំនួនសរុបនៃទណ្ឌកម្ម៕