កម្មករបម្រើការងារនៅរោងចក្រដេរកាបូប JS LEATHER COLLECTION PHNOM PENH CO, LTD ស្ថិតនៅតំបន់ព្រៃទា សង្កាត់ចោមចៅ ខណ្ឌពោធិ៍សែនជ័យ សម្រេចចូលធ្វើការងារវិញនៅរសៀលថ្ងៃព្រហស្បតិ៍ម្សិលមិញ ក្រោយពីពួកគេប្រមូលផ្ដុំតវ៉ាអស់រយៈពេល២ថ្ងៃ ដើម្បីទាមទារប្រាក់ជំនាញដែលថៅកែសន្យាផ្ដល់ជូនពួកគេ។
ប្រធានផ្នែកដេរនៅរោងចក្រដេរកាបូប JS Leather អ្នកស្រី ផាន សាវរី ប្រាប់វីអូឌីថា កម្មកររោងចក្រ JS នៅសាខាទី១ ប្រហែល៥០០នាក់ បាននាំគ្នាធ្វើកូដកម្មក្នុងរោងចក្រចំនួន២ថ្ងៃ គឺនៅថ្ងៃទី៩ និងថ្ងៃទី១០ ខែកុម្ភៈម្សិលមិញ ដើម្បីទាមទារឱ្យថៅកែផ្ដល់ប្រាក់ជំនាញជូនពួកគេទៅតាមការសន្យារបស់ខ្លួន។
អ្នកស្រីឱ្យដឹងថា កម្មករចាប់ពីថ្នាក់ប្រធានក្រុមឡើងទៅ ត្រូវបានថៅកែសន្យាផ្ដល់ប្រាក់ជំនាញនៅក្នុងខែមករា ឆ្នាំ២០២២នេះ ប៉ុន្តែរហូតមកដល់ខែកុម្ភៈនេះ គឺថៅកែមិនបានផ្ដល់ជូនកម្មករនៅឡើយទេ ដែលធ្វើឱ្យកម្មករសម្រេចធ្វើកូដកម្មដើម្បីទាមទារ។
យ៉ាងណា អ្នកស្រីថា ក្រោយកម្មករធ្វើកូដកម្មបាន២ថ្ងៃ និងមានការសម្របសម្រួលពីមន្ត្រីសម្របសម្រួលនៅក្រសួងការងាររួចមក ក្រុមកម្មករសម្រេចចូលធ្វើការងារវិញនៅរសៀលថ្ងៃទី១០ ខែកុម្ភៈ ម្សិលមិញ ខណៈថៅកែសន្យាជួបប្រជុំអំពីបញ្ហានេះនៅថ្ងៃទី២៨ ខែកុម្ភៈ ខាងមុខនេះ។
អ្នកស្រីបន្ថែមថា៖ «ថៅកែគាត់សន្យាឱ្យប្រាក់ជំនាញហ្នឹងនៅខែមួយ[ខែមករា]នេះ ដល់ពេលអត់ឃើញឱ្យហ្នឹងហើយបានកម្មករគាត់នាំគ្នាកូដកម្ម ហើយបើអត់បានទេ កម្មករធ្វើកូដកម្មទៀតទៅ»។
វីអូឌី មិនអាចសុំការឆ្លើយតបពីប្រធានរដ្ឋបាលរោងចក្រ JS LEATHER លោក ប៉ុណ្ណា បានទេ ដោយប្រាប់ថាជាប់រវល់។
ប្រធានសហព័ន្ធសហជីពឯករាជ្យ លោក រី សិទ្ធីណែត មានប្រសាសន៍ថា បើទោះបីជាប្រាក់ជំនាញនេះពុំមានកំណត់ក្នុងច្បាប់ ប៉ុន្តែថៅកែបានសន្យាផ្ដល់ប្រាក់នេះជូនកម្មករ ដូច្នេះថៅកែគួរតែគោរពតាមពាក្យសន្យារបស់ខ្លួន ខណៈនៅសាខាទី១របស់រោងចក្រនេះ ខាងថៅកែបានផ្ដល់ឱ្យកម្មកររួចទៅហើយ។
លោកបន្ថែមថា៖ «គំនិតខ្ញុំ បើរោងចក្រទី១ឱ្យហើយ អ៊ីចឹងរោងចក្រទី២ក៏ត្រូវតែឱ្យដូចគ្នា ព្រោះរោងចក្រតែមួយ ថៅកែធំតែមួយ។ អ៊ីចឹងគាត់ត្រូវតែឱ្យលុយហ្នឹងទៅកម្មករដូចគ្នា ព្រោះរោងចក្រនៅកម្ពុជាដូចគ្នា»។
បើតាមក្រុមកម្មករ រោងចក្រ JS LEATHER COLLECTION PHNOM PENH CO, LTD នៅតំបន់ព្រៃទា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញនេះ គឺជាសាខាទី២ និងមានកម្មករធ្វើការសរុបប្រហែល២ ០០០នាក់៕