ប្រជាពលរដ្ឋជាង១០០គ្រួសាររស់នៅឃុំកណ្ដោល ស្រុកបទុមសាគរ ខេត្តកោះកុង បាននាំគ្នាចាកចេញពីតង់និងរោងចាំដីទាំងយប់ ក្រោយពីកងកម្លាំងប្រដាប់អាវុធ បានដាក់ពង្រាយព័ទ្ធជុំវិញកន្លែងរបស់ពលរដ្ឋបោះតង់និងសង់រោងចាំដីនៅលើដីកំពុងមានជម្លោះមួយកាលពីថ្ងៃទី១១ ខែកុម្ភៈ ម្សិលមិញនេះ។
ពលរដ្ឋម្នាក់រស់នៅឃុំកណ្ដោល អ្នកស្រី ភាព តេង ប្រាប់វីអូឌីនៅថ្ងៃសៅរ៍នេះថា ពួកគាត់បាននាំគ្នាត្រឡប់មកផ្ទះវិញហើយ កាលពីវេលាម៉ោង ៨ យប់ ថ្ងៃទី១១ ខែកុម្ភៈ ក្រោយកម្លាំងសមត្ថកិច្ចបានបិទផ្លូវ និងរារាំងពួកគាត់មិនឱ្យចេញក្រៅ ហើយមិនឱ្យអ្នកខាងក្រៅចូលទៅកន្លែងសង់រោង និងបោះតង់លើដីជម្លោះដែលមានជម្លោះ។
អ្នកស្រីថា៖ «គេបិទយើងជិតឈឹង គេព័ទ្ធយើងជុំវិញ អ៊ីចឹងពួកខ្ញុំអត់មានទឹកងួត អត់មានបាយហូប អត់មានទឹកផឹក អ៊ីចឹងពួកខ្ញុំក៏សម្រេចដកថយសិនអ៊ីចឹងទៅ។ ពួកខ្ញុំដកតាំងពីយប់ ព្រោះអីគេបិទយើងគ្រប់ច្រកចេញចូលអ៊ីចឹង»។
ទោះបីជាពួកគាត់មិនសម្រាក់នៅលើដីមានជម្លោះក្តី តែអ្នកស្រី ភាព តេង ថា នៅថ្ងៃទី១៤ ខែកុម្ភៈ ខាងមុខនេះ អ្នកភូមិនឹងនាំគ្នាទៅសាលាឃុំ ដើម្បីទាមទារឱ្យអាជ្ញាធរបង្ហាញឈ្មោះអ្នកដែលទទួលបានសំណងពីក្រុមហ៊ុន ខណៈពួកគាត់ទាំងអស់គ្នាមិនទាន់ទទួលបានសំណងនៅឡើយ។
អ្នកស្រីថា៖ «ពួកខ្ញុំបំបែកគ្នាសិន ហើយថ្ងៃទី១៤ ពួកខ្ញុំបន្តទៅឃុំវិញ ទៅសួរឃុំ ព្រោះគាត់ថា ពួកខ្ញុំទទួលបានសំណងអស់ហើយ។ អ៊ីចឹងពួកខ្ញុំចង់ឱ្យឃុំឆែកមើលឈ្មោះណាខ្លះ ដែលមានសំណងទទួលលុយពីក្រុមហ៊ុនហ្នឹង»។
អាជ្ញាធរបានចោទប្រកាន់អ្នកភូមិទាំង ១៥០ គ្រួសារនេះថា ទទួលបានសំណងហើយ ប៉ុន្តែនៅតវ៉ាទៀត និងបាននាំគ្នាទៅសង់រោង និងបោះតង់នៅលើដីរបស់ក្រុមហ៊ុនហ៊ុន«កោះកុងស៊ូហ្គើ» និង «កោះកុងផ្លេនថេសិន» របស់ឧកញ៉ា លី យ៉ុងផាត់ សមាជិកព្រឹទ្ធសភា។ យ៉ាងណា អ្នកភូមិបានច្រានចោល ដោយអះអាងថា ពួកគេមិនទាន់ទទួលបានសំណងដូចការលើកឡើងរបស់អាជ្ញាធរនេះឡើយ។
អ្នកភូមិអះអាងថា កាលពីថ្ងៃម្សិលមិញនេះ សមត្ថកិច្ចខេត្តកោះកុងបានដាក់ពង្រាយកម្លាំងព័ទ្ធប្រជាពលរដ្ឋជាង១០០គ្រួសារដែលកំពុងសង់រោងនៅលើដីមានជម្លោះមួយកន្លែង ស្ថិតក្នុងឃុំកណ្ដោល ស្រុកបទុមសាគរ ក្រោយការព្រមានឱ្យរុះរើ ប៉ុន្តែពលរដ្ឋមិនអនុវត្តតាម។
លិខិតរបស់រដ្ឋបាលស្រុកបទុមសាគរ ខេត្តកោះកុង កាលពីថ្ងៃទី៧ ខែកុម្ភៈនេះ បានចេញសេចក្ដីណែនាំមួយដោយប្រាប់ឱ្យប្រជាពលរដ្ឋ១៥០គ្រួសាររុះរើរោងដែលសង់ដោយខុសច្បាប់នៅលើដីរដ្ឋជាបន្ទាន់ បើពុំនោះទេ អាជ្ញាធរនឹងអនុវត្តវិធានការរដ្ឋបាល។
វីអូឌី នៅមិនទាន់អាចទាក់ទងអាជ្ញាធរខេត្តកោះកុង ដើម្បីបំភ្លឺជុំវិញករណីនេះបាននៅឡើយទេ គិតត្រឹមថ្ងៃសៅរ៍នេះ៕
