ជនជាតិដើមភាគតិចកួយជិត៨០គ្រួសារ រស់នៅឃុំរម្យទម ស្រុករវៀង ខេត្តព្រះវិហារ កំពុងប្រឈមបាត់ដីស្រែចម្ការ ដោយពួកគេចោទថា ក្រុមហ៊ុនចិននិងក្រុមហ៊ុនឯកជនមួយបានរំលោភបំពានយកហើយប្រើអំណាចដើម្បីគាបសង្កត់កុំឱ្យពួកគេតវ៉ា។
ជនជាតិដើមភាគតិចកួយ អ្នកស្រី យឹម សុផាត រស់នៅភូមិរំដេងក្នុង ឃុំរម្យទម ស្រុករវៀង ខេត្តព្រះវិហារ ប្រាប់វីអូឌីនៅថ្ងៃនេះថា គ្រួសារគាត់បានធ្វើស្រែចម្ការ ដំាស្វាយចន្ទី តាំងពីឆ្នាំ១៩៩០ មកម្លេះ ប៉ុន្តែនៅឆ្នាំ២០១៤ ស្រាប់តែក្រុមហ៊ុន Delcom Cambodia និងក្រុមហ៊ុន សឺន សាន រួមទាំងក្រុមហ៊ុនឯកជនមួយទៀត ចូលវិនិយោគជីកយករ៉ែនៅទីនោះ ហើយអាជ្ញាធរចាប់ផ្ដើមរារាំងពួកគាត់មិនឱ្យចូលអាស្រ័យផលលើដីខ្លួនដែរ។
អ្នកស្រីថា អាជ្ញាធរបានការពារក្រុមហ៊ុនដោយគំរាមកំហែង ហើយចាប់ពួកគាត់វាយខ្នោះ បើសិនជាពួកគាត់តវ៉ា បើទោះបីជាដីដែលពួកគាត់អាស្រ័យផលនោះ មានប្លង់រឹង និងប្លង់ទទួលស្គាល់ពីអាជ្ញាធរភូមិឃុំក៏ដោយ។
អ្នកស្រីថា៖ «ប៉ុន្មានគ្រួសារ អាខ្លះរត់ អាខ្លះដោះដូរទាំងបង្ខំទាំងសម្លុត ទាំងគេគំរាមចាប់ដាក់គុក គេចោទប្រជាពលរដ្ឋកាប់ទន្ទ្រានយកដីក្រុមហ៊ុន ចុះក្រុមហ៊ុននោះ ម៉េចមិនចោទផង។ ខាងក្រុមហ៊ុនជីកយករ៉ែហេតុអីមកដាំស្វា ចេក មកដេញប្រជាពលរដ្ឋមិនឱ្យអាស្រ័យផលអត់យល់ដែរ។ ក្រុមហ៊ុននេះធ្វើមាស តើហេតុអ្វីបានជាមកធ្វើបាបប្រជាពលរដ្ឋក្នុងដំណាក់កាលនេះ»។
អ្នកស្រី យឹម សុផាត បន្តថា កន្លងមក ពួកគាត់បានស្នើទៅអាជ្ញាធរឱ្យធ្វើប្លង់រឹង ប៉ុន្តែអាជ្ញាធរមិនព្រមធ្វើឱ្យខណៈអ្នកដែលមានប្លង់រឹង ត្រូវអាជ្ញាធរស្រុកដោះស្រាយដោយគិតឱ្យក្នុង១ហិកតាតម្លៃ១ ៥០០ដុល្លារ។ ចំណែកអ្នកមានប្លង់ចេញពីភូមិ និងឃុំនោះ អាជ្ញាធរឱ្យតម្លៃ២០០ដុល្លារ ក្នុង១ហិកតា។ ប៉ុន្តែអ្នកស្រីថា ពួកគាត់មិនព្រមយក ដោយសារតម្លៃដីដែលអាជ្ញាធរផ្ដល់នេះ មិនអាចទិញដីនៅកន្លែងផ្សេងបានឡើយ។
ជនជាតិដើមភាគតិចកួយម្នាក់ទៀត រស់នៅភូមិស្វាយដំណាក់ ឃុំរម្យទម លោក រ៉ន រ៉េន លើកឡើងដែរថា បច្ចុប្បន្ន ពួកគាត់ប្រឈមនឹងការបាត់បង់ដីស្រែចម្ការវិលជុំ ដោយសារអាជ្ញាធរឃុំ និងស្រុកបានចេញមុខរារាំងពួកគាត់មិនឱ្យចូលអាស្រ័យផលលើដីរបស់ខ្លួន ដើម្បីការពារក្រុមហ៊ុនចិន និងក្រុមហ៊ុនឯកជនធ្វើអាជីវកម្មរ៉ែនៅទីនោះ។ ក្រៅពីរារាំងហើយលោកថា អាជ្ញាធរបានគំរាមចាប់ខ្លួនពួកគាត់ដាក់គុកបន្ថែមទៀត បើសិនជាពួកគាត់ចេញតវ៉ានោះ។
ជនជាតិដើមភាគតិចកួយរូបនេះ ចាត់ទុកការគំរាមកំហែងពួកគាត់ និងបង្ខំឱ្យលក់ដីដែលមានប្លង់កម្មសិទ្ធិ ១ហិកតា តម្លៃ១ ៥០០ ដុល្លារ ទៅឱ្យក្រុមហ៊ុននេះ ថាជារឿងយុត្តិធម៌សម្រាប់ពួកគាត់ជាជនជាតិដើមភាគតិច ដែលកំពុងរស់នៅនិងអាស្រ័យផលដីចម្ការវិលជុំ។
លោកថា៖ «ថ្ងៃមុនខ្ញុំទៅតែគ្នា២ ទៅ៣នាក់ គ្នាគាត់មកជាង១០ នាក់ សុទ្ធតែទាហាន ថាចេះ ថាចុះ គំរាមសុទ្ធតែចាប់ដាក់គុក ហើ់យថា យើងទៅបំផ្លាញព្រៃឈើ ចុះគាត់អ្នកបំផ្លាញព្រៃឈើសុទ្ធតែអាត្រាក់ទ័រនោះ មិនថាបំផ្លាញ សុទ្ធគាត់ហ្នឹងអ្នកធ្វើ»។
បើតាមអ្នកស្រី យឹម សុផាត ជនជាតិដើមភាគតិចកួយអះអាងថា ក្រុមហ៊ុន Delcom Cambodia, ក្រុមហ៊ុនចិន សឺន សាន និងក្រុមហ៊ុនឯកជន បានចាប់ផ្ដើមចូលទៅធ្វើអាជីវកម្មជីករ៉ែមាស កាលពីឆ្នាំ២០១៤ រហូតដល់បច្ចុប្បន្ន។ អ្នកស្រីអះអាងថា បច្ចុប្បន្នពលរដ្ឋដែលរងផលប៉ះពាល់ដោយសារការវិនិយោគរបស់ក្រុមហ៊ុនមានចំនួន ៧៨ គ្រួសារ ក្នុងភូមិចំនួន ៤ នៃឃុំរម្យទម ស្រុករវៀង ខេត្តព្រះវិហារ។
វីអូឌី មិនអាចសុំការបំភ្លឺពីជំទប់ទី១ នៃឃុំរមទុម លោក ប្រាក់ ផន បានទេនៅថ្ងៃនេះ ដោយលោកថា ច្រឡំលេខ ខណៈអភិបាលស្រុករវៀងលោក ហោ ប៊ុនហ៊ូរ សុំមិនធ្វើអត្ថាធិប្បាយដោយទាមទារឱ្យអ្នកសារព័ត៌មានចុះទៅផ្ទាល់ នៅពេលអ្នកសារព័ត៌មានថា តើអាជ្ញាធរបានរារាំង និងគំរាមកំហែងប្រជាពលរដ្ឋ មិនឱ្យចូលអាស្រ័យផលលើដីពួកគេនោះ។
លោកថា៖ «អត់ទោសអញ្ជើញចុះមកផ្ទាល់មក ខ្ញុំនាំដើរមើល ដើរទស្សនកិច្ច តើរឿងហ្នឹង វាពិតឬមិនពិត។ រៀបចំពេលវេលាចុះមក អញ្ជើញមកដល់ទីតាំងមក។ ខ្ញុំឆ្លើយជម្រាបហើយ ទី១ ខ្ញុំអត់ដឹងបងស្រីអ្នកនៅខាងណា ទាល់ជួបគ្នាទើបមានការបកស្រាយបំភ្លឺ ឬសម្ភាស៍អី»។
យ៉ាងណាក៏ដោយ ជនជាតិភាគតិចទាំងនោះស្នើទៅរដ្ឋាភិបាល និងស្ថាប័នពាក់ព័ន្ធជួយអន្តរាគមន៍ ដោយឱ្យអាជ្ញាធរឈប់គំរាមកំហែង រារាំង និងបង្ខំពួកគាត់បន្តទៀត ដោយថា ពួកគាត់ជាជនជាតិដើមភាគតិចរស់នៅ ដោយអាស្រ័យផលកម្ការវិលជុំ ប៉ុន្តែបើដីស្រែកចម្ការត្រូវបានអាជ្ញាធរនិងក្រុមហ៊ុនយកអស់ពួកគាត់គ្មានអ្វីទៀតឡើយ។
រដ្ឋធម្មនុញ្ញកម្ពុជា មាត្រា ៤៤ ចែងថា ជនណាក៏ដោយ ទោះជាបុគ្គលក្ដី ជាសមូហភាពក្ដី មានសិទ្ធិជាម្ចាស់កម្មសិទ្ធិ។ មានតែរូបវន្តបុគ្គល ឬនីតិបុគ្គលដែលមានសញ្ជាតិជាខ្មែរទេ ទើបមានសិទ្ធិជាម្ចាស់ កម្មសិទ្ធិលើដីធ្លី។ កម្មសិទ្ធិឯកជនស្របច្បាប់ ស្ថិតនៅក្រោមការគាំពារនៃច្បាប់។ ដែលនឹងដកហូតកម្មសិទ្ធិ អំពីជនណាមួយបាននោះ លុះត្រាតែប្រយោជន៍សាធារណៈតម្រូវឱ្យធ្វើ ក្នុងករណីដែលច្បាប់បានបញ្ញត្តិទុក ហើយត្រូវផ្ដល់សំណងជាមុន ដោយសមរម្យ និង យុត្តិធម៌។
ចំណែកសេចក្ដីប្រកាសរបស់អង្គការសហប្រជាជាតិ ស្ដីពី សិទ្ធិជនជាតិដើមភាគតិចមាត្រា ១០ ចែងថា ជនជាតិដើមភាគតិចមិនត្រូវបានបណ្ដេញទាំងបង្ខំពីដីធ្លី ឬដែនដីរបស់ខ្លួនឡើយ៕
