គណបក្សប្រជាធិបតេយ្យមូលដ្ឋាន (គ.ប.ម) នៅខេត្តស្វាយរៀង បានចោទមេឃុំស្វាយយា ក្នុងស្រុកស្វាយជ្រុំ ថាមិនយល់ពីច្បាប់ ហើយមានចេតនារារាំងការធ្វើសកម្មភាពរបស់គណបក្សនេះ ដូចជា ការលើកស្លាកនិងការជួបជុំគ្នាជាដើម។
ក្រុមការងារគណបក្សប្រជាធិបតេយ្យមូលដ្ឋានខេត្តស្វាយរៀង បានផ្សាយផ្ទាល់លើផេកហ្វេសប៊ុករបស់ខ្លួនកាលពីថ្ងៃទី២ ខែកុម្ភៈ ដោយបញ្ជាក់ថា មេឃុំស្វាយយាមិនទទួលលិខិតជូនដំណឹងពីគណបក្សនេះលើការលើកស្លាកឡើយ។ ក្រុមការងារគណបក្សនេះបានចាត់ទុកទង្វើរបស់មេឃុំថា មានចេតនារារាំងសកម្មភាពធ្វើនយោបាយដែលច្បាប់បានអនុញ្ញាត។
ប្រធានប្រតិបត្តិគណបក្សប្រជាធិបតេយ្យមូលដ្ឋានខេត្តស្វាយរៀង លោក ខឿន សោភ័ណ មានប្រសាសន៍នៅថ្ងៃទី១៤ ខែកុម្ភៈថា មេឃុំស្វាយយា បង្កការលំបាកក្នុងការធ្វើសកម្មភាពនយោបាយ ដូចជា ការលើកស្លាកសញ្ញា និងការជួបជុំ។ លោកបន្តថា តាមផែនការ គណបក្សនេះគ្រោងលើកស្លាក៣ទីតាំង និងមានការជួបជុំមនុស្សពី១៥ទៅ៣០នាក់ នៅថ្ងៃទី១៣ ខែកុម្ភៈ ប៉ុន្តែមេឃុំស្វាយយាទាមទារលក្ខខណ្ឌផ្សេងៗ។
លោក ខឿន សោភ័ណ បន្តទៀតថា ក្រុមការងាររបស់លោកបានទៅជួបមេឃុំចំនួន៣ដង ទើបមេឃុំអនុញ្ញាតឱ្យលើកតែមួយទីតាំង ហើយមិនឱ្យជួបជុំដោយសម្អាងហេតុថា គណបក្សនេះមិនមានស្នាក់ការនៅទីនោះ។
លោក ខឿន សោភ័ណ ចាត់ទុកការអះអាងរបស់មេឃុំរូបនោះ ថាធ្វើផ្ទុយពីច្បាប់និងសេចក្ដីណែនាំពីក្រសួងមហាផ្ទៃ និងកំពុងរារាំងដល់សកម្មភាពគណបក្សផ្សេងមិនឱ្យចូលរួមប្រកួតប្រជែងការបោះឆ្នោតឃុំ-សង្កាត់នៅពេលខាងមុខនេះ។
លោកថា៖ «ត្បិតតែគាត់ជាតំណាងឱ្យគណបក្សប្រជាជន ប៉ុន្តែគាត់ជាប់ជាមេឃុំហើយ គាត់ត្រូវដោះអាវគណបក្សចេញ ហើយធ្វើជាអ្នកបម្រើប្រជាពលរដ្ឋទូទៅ។ តែគាត់ចេះតែធ្វើឱ្យគណបក្សនយោបាយផ្សេងលំបាក និយាយរួមទៅ គាត់ភ័យខ្លាចគេប្រកួតប្រជែងទេដឹង!»
ករណីនេះ លោក ខឿន សោភ័ណ អំពាវនាវដល់អាជ្ញាធរពាក់ព័ន្ធនៅថ្នាក់មូលដ្ឋានបំពេញតួនាទីជាមន្ត្រីអនុវត្តច្បាប់ស្របតាមសង្គមប្រជាធិបតេយ្យ។
លោកថា៖ «សម្រាប់គាត់ជាអាជ្ញាធរ មិនថាគាត់ជាមេប៉ុស្តិ៍ គាត់ជាអធិការ ឬជាសមត្ថកិច្ចណាមួយទេ គាត់ត្រូវតែសម្រួលដល់ពលរដ្ឋទូទៅក្នុងការធ្វើសកម្មភាពនយោបាយហ្នឹង ដូចជាពួកខ្ញុំជាដើម មិនត្រូវរារាំងអ៊ីចឹងទេ! បើរារាំងអ៊ីចឹងបានន័យថា មិនមែនប្រជាធិបតេយ្យទេ»។
ឆ្លើយតបជុំវិញការចោទប្រកាន់នេះ មេឃុំស្វាយយា លោក សុខ សំអន បញ្ជាក់យ៉ាងខ្លីថា លោកធ្វើការងារតាមច្បាប់ ហើយលោកក៏ចុចទូរសព្ទបិទទៅ។
លោកថា៖ «ឱ្យគាត់បើកមើលច្បាប់ និងក្រសួងមហាផ្ទៃ គេណែនាំទៅ! ហើយបើចង់ដឹង ឱ្យមកសាលាឃុំមក ខ្ញុំកូពីឱ្យ»។
តាមលិខិតដែលចុះហត្ថលេខាដោយលោក ស ខេង រដ្ឋមន្ត្រីក្រសួងមហាផ្ទៃ ចុះថ្ងៃទី៧ ខែកុម្ភៈ បានបញ្ជាក់ថា រាល់ការលើកស្លាកនៅទីតាំងឯកជន មិនត្រូវឱ្យសុំច្បាប់ទេ គឺគ្រាន់តែជូនដំណឹងទៅអាជ្ញាធរឃុំឬសង្កាត់៣ថ្ងៃមុន។ ចំណែកការជួបជុំរបស់គណបក្សនយោបាយនៅស្នាក់ការ ឬផ្ទះឯកជន ក៏មិនត្រូវឱ្យសុំច្បាប់អនុញ្ញាតដែរ គ្រាន់តែត្រូវជូនដំណឹងទៅអាជ្ញាធរឃុំឬសង្កាត់តែប៉ុណ្ណោះ។
អ្នកសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែល លោក កន សាវាង្ស មានប្រសាសន៍ថា ករណីដែលអាជ្ញាធរតម្រូវឱ្យគណបក្សនយោបាយសុំការអនុញ្ញាតពីថ្នាក់លើ ឬទាមទារលក្ខខណ្ឌផ្សេងៗក្នុងការជួបជុំគ្នា ឬលើកស្លាកនៅក្នុងផ្ទះឯកជននោះ មិនត្រឹមត្រូវទេ។
លោកថា៖ «លើកឡើងឱ្យមានការសុំច្បាប់តាំងពីលើដល់ក្រោមហ្នឹង ទាក់ទងការលើកស្លាក ការជួបជុំហ្នឹង អាហ្នឹងមិនត្រឹមត្រូវទេ! ជាទូទៅ គេឱ្យមានការសម្របសម្រួលពីអាជ្ញាធរមូលដ្ឋានក្នុងការលើកស្លាកហ្នឹង។ សម្របសម្រួលយ៉ាងម៉េច? សម្របសម្រួលក្រែងលើកស្លាកហ្នឹងប៉ះពាល់ដល់ទីសាធារណៈ ឬក៏ប៉ះពាល់ដល់គណបក្សយោបាយផ្សេងអ៊ីចឹង អាហ្នឹងគេឱ្យមានការសម្របសម្រួល»។
ការបោះឆ្នោតឃុំ-សង្កាត់អាណត្តិទី៥ នឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២ខាងមុខ។ ខណៈការបោះឆ្នោតកាន់តែខិតជិតចូលមកដល់ គណបក្សនយោបាយផ្សេងៗក៏បានបង្កើនការធ្វើសកម្មភាពនៅតាមមូលដ្ឋានផ្សេងៗផងដែរ៕