ជំទប់ទី១ នៅឃុំសណ្ដែក មកពីកូតាគណបក្សសង្រ្គោះជាតិ(CNRP)ដែលត្រូវបានតុលាការរំលាយ បានលាឈប់ពីតំណែង ដោយសារធ្វើការងារមិនចុះសម្រុងគ្នាជាមួយថ្នាក់ដឹកនាំដែលមកពីគណបក្សប្រជាជនកម្ពុជា ប៉ុន្តែមន្ត្រីថ្នាក់ខេត្តថា ការលាឈប់របស់ជំទប់ទី១នេះ ដោយសារតែគាត់មានជំងឺប្រចាំកាយ។
លោក ឡាត គិមលាន ជាជំទប់ទី១ នៃឃុំសណ្ដែក ស្រុកប្រាសាទបាគង ខេត្តសៀមរាប ដែលមានកូតាមកពីគណបក្សសង្គ្រោះជាតិដែលត្រូវបានតុលាការរំលាយ បានប្រាប់ វីអូឌី នៅថ្ងៃពុធនេះថា លោកធ្លាប់ធ្វើជាសកម្មជនគណបក្សសមរង្ស៊ី អស់រយៈពេលជាង២០ឆ្នាំមកហើយ ហើយក្រោយពីគណបក្សសមរង្ស៊ី និងគណបក្សសិទ្ធិមនុស្ស រួមគ្នាបង្កើតគណបក្សសង្គ្រោះជាតិ រូបលោកបានឈរឈ្មោះជាមេឃុំសណ្ដែក ហើយបានជាប់ឆ្នោតធ្វើជំទប់ទី១ ដោយមានការគាំទ្រពីប្រជាពលរដ្ឋ។
លោកបន្តថា ក្រោយពីគណបក្សសង្គ្រោះជាតិត្រូវបានតុលាការរំលាយ រូបលោកបានសម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា កាលពីឆ្នាំ២០១៧ ដោយកាន់តួនាទីជាជំទប់ទី១ដដែល។ ប៉ុន្តែលោកថា នៅអំឡុងពេលធ្វើការងារជាមួយថ្នាក់ដឹកបក្សកាន់អំណាច ដូចជា មេឃុំ អភិបាលស្រុក និងខេត្ត មិនសូវស៊ីសង្វាក់គ្នាក្នុងការជួយបម្រើប្រជាពលរដ្ឋ និងចាយថវិកាជាតិខ្ជះខ្ជាយ មិនមានតម្លាភាព ទើបគាត់សម្រេចចិត្តលាលែងពីតំណែងបែបនេះ។
លោកមានប្រសាសន៍ថា៖ «នៅក្នុងពេលធ្វើការ ខ្ញុំឃើញម៉េច ខ្ញុំថាអ៊ីចឹង ព្រោះចង់ឱ្យភូមិឃុំរបស់យើងល្អប្រសើរ! ឃើញការខុសឆ្គង ការចាយលុយថវិកាឃុំមិនត្រឹមត្រូវ មិនមានតម្លាភាព ខ្ញុំក៏ណែនាំប្រជុំ និងដាក់ពាក្យសុំអន្តរាគមន៍ទៅថ្នាក់លើឱ្យជួយកែតម្រង់ទិសមន្ត្រីក្រោមឱវាទ ឱ្យគាត់មានការផ្លាស់ប្ដូរឥរិយាបថ។ ខ្ញុំនិយាយទៅក៏ប៉ះពាល់ដល់ថ្នាក់ដឹកនាំ ថ្នាក់ស្រុក ថ្នាក់ខេត្តទេដឹង? បានជាគេនាំគ្នាព្រួតគ្នា ដើម្បីផ្ដាច់ឫសខ្ញុំអ៊ីចឹង ខ្ញុំវាហួសចិត្ដដែរ»។
បន្ថែមពីនេះ ជំទប់ទី១រូបនោះបញ្ជាក់ថា មុនលោកលាឈប់ពីតំណែង ខាងថ្នាក់ដឹកនាំខេត្តបានដាក់ឈ្មោះឱ្យគាត់ឈរឈ្មោះជាបេក្ខជនបម្រុងលេខរៀងទី១១ សម្រាប់បោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះទៅវិញ ដោយលោកចាត់ទុកការរៀបចំបញ្ជីឈ្មោះអាណត្តិថ្មីនេះ ជាការរើសអើងផ្នែកនយោបាយ ពីព្រោះឈ្មោះគាត់ត្រូវឈរលំដាប់លេខ១ឬលេខ២ ទើបត្រឹមត្រូវ។ លោកបានគូសបញ្ជាក់ថា ការលាលែងពីតំណែងរបស់គាត់មិនមែនមកពីបញ្ហាសុខភាពដូចការលើកឡើងរបស់មន្ត្រីថ្នាក់ខេត្តនោះទេ។
វីអូឌី មិនអាចសុំការបំភ្លឺពីមេឃុំសណ្ដែក លោក ម៉ិល សុគង្គា និងអភិបាលស្រុកប្រាសាទបាគង លោក សូ ប្លាតុង បានទេ នៅរសៀលថ្ងៃនេះ។
អ្នកនាំពាក្យរដ្ឋបាលខេត្តសៀមរាប លោក សុខ ថុល មានប្រសាសន៍ថា ដើមចមដែលនាំឱ្យជំទប់ទី១នៃឃុំសណ្ដែកលាឈប់ពីតំណែងនោះ ដោយសារតែគាត់មានបញ្ហាសុខភាព មិនមែនកើតចេញពីការធ្វើការងារមិនចុះសម្រុងគ្នានោះទេ។
លោកមានប្រសាសន៍ថា៖ «ខ្ញុំដឹង ការសុំលាលែងរបស់គាត់ [ជំទប់ទី១ គណបក្សសង្គ្រោះជាតិ] ដោយសារបញ្ហាសុខភាព»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា បើសិនជាដូចការលើកឡើងរបស់ជំទប់ទី១នៃឃុំសណ្ដែក ដែលថាមន្ត្រីថ្នាក់ក្រោមធ្វើការងារមិនចុះសម្រុងគ្នា និងមាននិន្នាការរើសអើងមន្ត្រីដែលធ្លាប់មកពីគណបក្សនយោបាយផ្សេងៗគ្នានោះមែន នឹងនាំឱ្យមានបញ្ហាប្រឈមនិងការបែកបាក់ជាតិ។
លោកមានប្រសាសន៍ថា៖ «ទោះគាត់ជាអតីតមកពីគណបក្សនយោបាយណាក៏ដោយ នៅពេលដែលគាត់ស្ម័គ្រចិត្តទៅរួមរស់ធ្វើការជាមួយនឹងគណបក្សមួយទៀតទៅហើយ បើសិនជានៅតែប្រកាន់និន្នាការនយោបាយ ដូចថ្នាក់ដឹកនាំតែងតែលើកឡើងអ៊ីចឹងថា ភាពអយុត្តិធម៌ ឬក៏ការបែកបាក់សាមគ្គីភាព សាមគ្គីផ្ទៃក្នុង វាបង្កនូវភាពអយុត្តិធម៌ បង្កឱ្យបែកបាក់ឯកភាពជាតិ»៕
