កម្ពុជារំពឹងថា អត្រាកំណើនសេដ្ឋកិច្ចនៅឆ្នាំ២០២២ នឹងងើបឡើងវិញក្នុងអត្រា ៥,៦% ខណៈអត្រាកំណើនសេដ្ឋកិច្ចសកលនឹងសម្រេចបានក្នុងអត្រា ៤,៤%។
នៅក្នុងវេទិកាសាធារណៈស្ដីពី «ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាជាតិឆ្នាំ២០២២» រៀបចំដោយក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៨ ខែកុម្ភៈនេះ បានឱ្យដឹងថា ឆ្នាំ២០២២ កំណើនសេដ្ឋកិច្ចកម្ពុជារំពឹងថា នឹងសម្រេចបានក្នុងអត្រា ៥,៦% ដោយសារមានការគាំទ្រ និងការបន្តកើនឡើងនៃតម្រូវការខាងក្រៅ និងទំនុកចិត្តវិនិយោគ គួបផ្សំនឹងការដាក់ចេញឱ្យអនុវត្តនូវក្របខណ្ឌយុទ្ធសាស្ត្រ និងកម្មវិធីស្ដារកំណើនសេដ្ឋកិច្ចកម្ពុជាសម្រាប់ឆ្នាំ២០២១-២០២៣ ដែលជារួមនឹងបន្តជំរុញដល់ការងើបឡើងវិញនូវវិស័យកាត់ដេរ កម្មន្តសាលមិនមែនកាត់ដេរ កសិកម្ម និងជាពិសេសគឺវិស័យទេសចរណ៍។
កាលពីឆ្នាំ២០២១ កម្ពុជារំពឹងថា អត្រាកំណើនសេដ្ឋកិច្ចកម្ពុជាស្ថិតក្នុងរង្វង់ ៤%។ ក៏ប៉ុន្តែដោយសារព្រឹត្តិការណ៍សហគមន៍២០កុម្ភៈ (ការឆ្លងរាលដាលជំងឺកូវីដ-១៩ ចូលក្នុងសហគមន៍នៅកម្ពុជា) បានធ្វើឱ្យកម្ពុជាបានអត្រាកំណើនសេដ្ឋកិច្ចត្រឹមតែ ២,៤% ប៉ុណ្ណោះ ខណៈអត្រាកំណើនសេដ្ឋកិច្ចកម្ពុជា ឆ្នាំ២០២០ បានធ្លាក់ចុះដល់ -៣,១%៕
