រដ្ឋាភិបាលបានឱ្យដឹងថា នាយករដ្ឋមន្ត្រីម៉ាឡេស៊ី គ្រោងមកពីបំពេញទស្សនកិច្ចផ្លូវការនៅកម្ពុជានាចុងខែកុម្ភៈនេះ ដើម្បីរឹតចំណងសាមគ្គីភាព និងកិច្ចសហប្រតិបត្តិការរវាងប្រទេសទាំងពីរ។
ក្នុងកិច្ចប្រជុំគណៈរដ្ឋមន្ត្រី កាលពីថ្មីៗនេះ លោកនាយករដ្ឋមន្ត្រី ហ៊ុន សែន បានថ្លែងថា លោក Ismail Sabri Yaakob នាយករដ្ឋមន្ត្រីនៃប្រទេសម៉ាឡេស៊ី គ្រោងនឹងមកបំពេញទស្សនកិច្ចផ្លូវការនៅកម្ពុជា រយៈពេល ២ថ្ងៃ ដោយចាប់ពីថ្ងៃទី២៣ ដល់ថ្ងៃទី២៤ ខែកុម្ភៈ ឆ្នាំ២០២២ ដើម្បីរឹតចំណងសាមគ្គីភាព និងកិច្ចសហប្រតិបត្តិការរវាងប្រទេសទាំងពីរ ។
ក្នុងអំឡុងទស្សនកិច្ចនៅកម្ពុជា លោកនាយករដ្ឋមន្ត្រីម៉ាឡេស៊ី Ismail Sabri Yaakob នឹងអញ្ជើញចូលក្រាបថ្វាយបង្គំគាល់ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងជួបសម្ដែងការគួរសមជាមួយប្រធានព្រឹទ្ធសភា លោក សាយ ឈុំ , ប្រធានរដ្ឋសភា លោក ហេង សំរិន រួមទាំងជួបប្រជុំទ្វេភាគីជាមួយលោកនាយករដ្ឋមន្ត្រី ហ៊ុន សែន ផងដែរ។
លោក ហ៊ុន សែន បានឱ្យដឹងទៀតថា បើនៅចុងឆ្នាំ២០២២នេះ មិនមានការរំខានពីការរាតត្បាតជំងឺកូវីដ-១៩ ទេ គឺនាយករដ្ឋមន្ត្រីម៉ាឡេស៊ី លោក Ismail Sabri Yaakob នឹងអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅកម្ពុជា ខណៈកម្ពុជាជាប្រធានអាស៊ានក្នុងឆ្នាំនេះ៕