សមត្ថកិច្ចរាជធានីភ្នំពេញ បានបន្តរារាំងក្រុមកូដករក្រុមហ៊ុនណាហ្គាវើលដ៍មិនឱ្យប្រមូលផ្ដុំតវ៉ានៅក្បែរក្រុមហ៊ុន ក្នុងខណ្ឌចំការមន ដោយបានចាប់សែងពួកគេដឹកក្នុងរថយន្តក្រុង ខណៈពួកគេចេញធ្វើកូដកម្មជាថ្មីម្ដងទៀត នៅរសៀលថ្ងៃអង្គារនេះ។
កាលពីរសៀលថ្ងៃម្សិលមិញ អំឡុងពេលដែលក្រុមកូដករណាហ្គាវើលដ៍ ទៅប្រមូលផ្ដុំធ្វើកូដកម្មជាថ្មីទៀតនៅក្បែរក្រុមហ៊ុនក្នុងខណ្ឌចំការមននោះ សមត្ថកិច្ចបានចាប់បង្ខំកូដករ៦៤នាក់ឱ្យឡើងរថយន្តក្រុងចំនួន២ ហើយដឹកទៅកាន់មណ្ឌលចត្តាឡីស័កនៅខណ្ឌព្រែកព្នៅ ដើម្បីធ្វើតេស្តរកសំណាកកូវីដ-១៩។
កូដករក្រុមហ៊ុនណាហ្គាវើលដ៍ កញ្ញា ជួប សោភ័ណ្ឌ បានប្រាប់ វីអូឌី នៅថ្ងៃអង្គារនេះថា ក្រោយការធ្វើតេស្តនោះ គ្រូពេទ្យបានរកឃើញកូដករ២នាក់ មានវិជ្ជមានវីរុសកូវីដ-១៩ ខណៈ៦២នាក់ទៀតអវិជ្ជមាន ហើយត្រូវបានសមត្ថកិច្ចអនុញ្ញាតឱ្យត្រលប់ទៅផ្ទះវិញ ក្រោមលក្ខខណ្ឌបង្ខំឱ្យពួកគេធ្វើកិច្ចសន្យា បន្តអនុវត្តវិធានសុខាភិបាលឱ្យបានម៉ឺងម៉ាត់ បញ្ឈប់សកម្មភាពប្រមូលផ្ដុំធ្វើបាតុកម្មខុសច្បាប់។
កញ្ញាបន្តថា សមត្ថកិច្ចក៏បានព្រមានពួកគាត់ផងដែរថា បើនៅរឹងរូស មិនរាងចាល ហើយនៅតែបន្តធ្វើបាតុកម្ម សមត្ថកិច្ចនឹងចាត់វិធានការរដ្ឋបាល និងវិធានការច្បាប់លើពួកគាត់។
កញ្ញានិយាយថា៖ «មុនដំបូង នៅចាំឡាន [ដឹកកូដករវិជ្ជមានកូវីដ-១៩ យកទៅព្យាបាល] បន្ទាប់មកពួកខ្ញុំអត់ធ្វើក្រដាសដែលគេហុចឱ្យយើងទេ យើងសរសេរបន្ថែម គេអត់យក អ៊ីចឹងគេឱ្យអង្គុយចាំទាំងអស់គ្នា ដល់គេឱ្យក្រដាសមួយទៀត និយាយទៅគេបង្ខំតែម្ដង នៅពេលយើងធ្វើឱ្យគេហើយអស់ បានគេឱ្យខាងពេទ្យយកពីរនាក់ខាងកូដករចត្តាឡីស័ក ហើយពួកខ្ញុំឱ្យមកផ្ទះ»។
នៅរសៀលថ្ងៃអង្គារ ក្រុមកូដករជាច្រើននាក់បានបន្តការប្រមូលផ្ដុំជាថ្មីទៀតនៅក្បែរក្រុមហ៊ុន ប៉ុន្តែត្រូវបានសមត្ថកិច្ចរារាំងនិងបានចាប់សែងពួកគេដាក់ក្នុងរថយន្តជាថ្មីទៀត ដោយពុំទាន់ដឹងថានឹងដឹកទៅណានោះទេ។ នេះបើតាមបញ្ជាក់របស់កញ្ញា ស្រីពៅ ដែលជាកូដករក្រុមហ៊ុនណាហ្គាវើលដ៍។
វីអូឌី មិនទាន់អាចសុំការបញ្ជាក់ករណីនេះពីអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បាននៅឡើយទេ នៅថ្ងៃអង្គារនេះ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីន មានប្រសាសន៍ថា កិច្ចសន្យាដែលអាជ្ញាធរដាក់គំនាបឱ្យកូដករចុះកិច្ចសន្យាបន្ទាប់ពីពិនិត្យឃើញអវិជ្ជមាន ដើម្បីជាថ្នូរឱ្យត្រលប់មកផ្ទះវិញនោះ ជាកិច្ចសន្យាបង្កើតឡើងផ្ទុយពីច្បាប់រដ្ឋធម្មនុញ្ញ ផ្ទុយពីសន្ធិសញ្ញា ឬក៏កតិកាសញ្ញាអន្តរជាតិ ដែលមានចែងអំពីសិទ្ធិក្នុងការជួបជុំ និងសិទ្ធិធ្វើកូដកម្មដោយសន្តិវិធី ឬក៏សិទ្ធិសម្ដែងមតិ។
អ្នកស្រីមានប្រសាសន៍ថា៖ «ទោះបីធ្វើកិច្ចសន្យាឱ្យផ្ដិតមេដៃមួយរយសន្លឹក មួយពាន់សន្លឹកពីកម្មករក៏ដោយ កាលណាកិច្ចសន្យាផ្ទុយពីស្មារតីនៃច្បាប់ គឺទុកជាមោឃៈ មានន័យថា យកមកប្រើប្រាស់អត់បាន»។
ក្នុងឱកាសបើកការដ្ឋានសាងសង់ស្ថានីយប្រព្រឹត្តកម្មទឹកកខ្វក់បឹងជើងឯក ក្នុងខណ្ឌមានជ័យ រាជធានីភ្នំពេញ នាព្រឹកថ្ងៃទី២២ ខែកុម្ភៈ ឆ្នាំ២០២២ លោកនាយករដ្ឋមន្ត្រី ហ៊ុន សែន បានថ្លែងបែបរិះគន់ជាប្រយោលទៅកាន់ក្រុមកូដករណាហ្គាវើលដ៍ថា កុំយកជំងឺចែកទៅក្រុមគ្រួសារពីការប្រមូលផ្តុំតវ៉ា។
កាលពីថ្ងៃទី១៥ ខែកុម្ភៈ រដ្ឋបាលរាជធានីភ្នំពេញ បានចេញសេចក្ដីជូនដំណឹងមួយ ដោយហាមដាច់ខាត មិនអនុញ្ញាតឱ្យមានការប្រមូលផ្ដុំធ្វើបាតុកម្មខុសច្បាប់របស់កូដករណាហ្គាវើលដ៍ នៅក្នុងសង្កាត់ទន្លេបាសាក់ ខណ្ឌចំការមនទៀតឡើយ។ រដ្ឋបាលរាជធានីភ្នំពេញអះអាងថា ការមិនអនុញ្ញាតនេះ គឺដើម្បីទប់ស្កាត់ការឆ្លងរាលដាលជំងឺកូវីដ-១៩ បំប្លែងខ្លួនថ្មីប្រភេទ «អូមីក្រុង» ចូលក្នុងសហគមន៍ ក៏ដូចជាធានាបាននូវសន្តិសុខ សណ្ដាប់ធ្នាប់ របៀបរៀបរយសាធារណៈ។
អាជ្ញាធរក៏បានព្រមានដែរថា ក្នុងករណីក្រុមអ្នកតវ៉ារឹងរូសបន្តសកម្មភាពខុសច្បាប់ទៀតនោះ នឹងចាត់វិធានការច្បាប់តែម្តង៕