សមត្ថកិច្ចរាជធានីភ្នំពេញ បានបន្តចាប់បង្ខំក្រុមកូដករក្រុមហ៊ុនណាហ្គាវើលដ៍ជិត៤០នាក់បន្ថែមទៀតបោះចូលក្នុងរថយន្តក្រុង ដឹកយកទៅដាក់នៅសមាគមនារីកម្ពុជាដើម្បីអភិវឌ្ឍន៍ ក្នុងខណ្ឌព្រែកព្នៅ រាជធានីភ្នំពេញ ដើម្បីធ្វើតេស្តរកវីរុសកូវីដ-១៩ ខណៈពួកគេបន្តចេញធ្វើកូដកម្មទៀត នៅរសៀលថ្ងៃអង្គារនេះ។
កូដករណាហ្គាវើលដ៍ កញ្ញា សៀក បញ្ញា ប្រាប់ វីអូឌី នៅថ្ងៃអង្គារនេះថា នៅប្រហែលជាម៉ោង២រសៀល សមត្ថកិច្ចខ្លះស្លៀកស៊ីវិលបានទាត់និងចាប់សែងក្រុមកូដករចំនួន៣៩នាក់បោះចូលរថយន្តក្រុង ដឹកយកទៅសមាគមនារីកម្ពុជាដើម្បីអភិវឌ្ឍន៍ ក្នុងខណ្ឌព្រែកព្នៅ ខណៈដែលពួកគេកំពុងឈរត្រៀមទៅធ្វើកូដកម្មនៅក្បែរក្រុមហ៊ុន ដើម្បីទាមទារឱ្យមានដំណោះស្រាយវិវាទការងារ និងដោះលែងថ្នាក់ដឹកនាំនិងសមាជិកសហជីពចំនួន១១នាក់ដែលកំពុងជាប់ឃុំនៅពន្ធនាគារ។
កូដកររូបនោះបន្តថា ក្រោយពីសមត្ថកិច្ចបញ្ជូនក្រុមកូដករដល់សមាគមនារីកម្ពុជាដើម្បីអភិវឌ្ឍន៍ រហូតដល់ម៉ោងជិត៦ល្ងាចនេះ គ្រូពេទ្យនៅមិនទាន់ទៅធ្វើតេស្តរកវីរុសកូវីដ-១៩ឱ្យពួកគេនៅឡើយ ដោយទុកពួកគាត់ចោលនៅទីនោះទៅវិញ។
កញ្ញាចាត់ទុកការចាប់ក្រុមកូដករដែលធ្វើកូដកម្មដោយអហិង្សាពីសំណាក់សមត្ថកិច្ចនេះ ថាជាការបំបែកពួកគេមិនឱ្យតស៊ូមតិទាមទារសិទ្ធិការងារ ពោលគឺមិនមែនជាការអនុវត្តវិធានការទប់ស្កាត់ការឆ្លងរាលដាលជំងឺកូវីដ-១៩នោះទេ។
កញ្ញាបញ្ជាក់ថា៖ «នេះសបញ្ជាក់ឱ្យឃើញថា ស្ថាប័នទាំងអស់ព្យាយាមរារាំងក្រុមកូដករ ដើម្បីបំបែកពួកខ្ញុំ អត់ឱ្យពួកខ្ញុំធ្វើកូដកម្ម ដើម្បីទាមទារសិទ្ធិការងារ សិទ្ធិសេរីភាពសហជីពក្នុងក្រុមហ៊ុនណាហ្គាវើលដ៍»។
កញ្ញាបន្ថែមថា៖ «មិនមែនដើម្បីទប់ស្កាត់ជំងឺកូវីដអីទេ បើសិនជាក្រសួងសុខាភិបាលនិងសាលាក្រុងភ្នំពេញ គាត់ពិតជាមានចេតនាក្នុងការប្រើវិធានការដើម្បី[ទប់ស្កាត់]ជំងឺអូមីក្រុង មិនមែនគាត់បើកឱ្យគេលក់សំបុត្រឱ្យក្រុមបាល់ទាត់ជាង២ម៉ឺននាក់ ដោយមិនធ្វើតេស្ត ហើយបែរជាមកចោទពួកខ្ញុំប្រមូលផ្ដុំខុសច្បាប់ ចាប់ពួកខ្ញុំមកធ្វើតេស្ត វាអត់ត្រូវទេ វាមិនមែនជាដំណោះស្រាយសម្រាប់ពួកខ្ញុំទេ»។
កាលពីរសៀលថ្ងៃម្សិលមិញ អំឡុងពេលដែលក្រុមកូដករណាហ្គាវើលដ៍ទៅប្រមូលផ្ដុំធ្វើកូដកម្មជាថ្មីទៀតនៅក្បែរក្រុមហ៊ុនក្នុងខណ្ឌចំការមននោះ សមត្ថកិច្ចបានចាប់បង្ខំកូដករ៦៤នាក់ឱ្យឡើងរថយន្តក្រុងចំនួន២ ហើយដឹកទៅកាន់មណ្ឌលចត្តាឡីស័កនៅខណ្ឌព្រែកព្នៅ ដើម្បីធ្វើតេស្តរកកូវីដ-១៩។
កូដករក្រុមហ៊ុនណាហ្គាវើលដ៍ កញ្ញា ជួប សោភ័ណ្ឌ បានប្រាប់ វីអូឌី នៅថ្ងៃអង្គារនេះថា ក្រោយការធ្វើតេស្តនោះ គ្រូពេទ្យបានរកឃើញកូដករ២នាក់មានវិជ្ជមានវីរុសកូវីដ-១៩ ខណៈ៦២នាក់ទៀតអវិជ្ជមាន ហើយត្រូវបានសមត្ថកិច្ចអនុញ្ញាតឱ្យត្រលប់ទៅផ្ទះវិញ ក្រោមលក្ខខណ្ឌបង្ខំឱ្យពួកគេធ្វើកិច្ចសន្យា បន្តអនុវត្តវិធានសុខាភិបាលឱ្យបានម៉ឺងម៉ាត់ បញ្ឈប់សកម្មភាពប្រមូលផ្ដុំធ្វើបាតុកម្មខុសច្បាប់។
កញ្ញានិយាយថា៖ «មុនដំបូង នៅចាំឡាន [ដឹកកូដករវិជ្ជមានកូវីដ-១៩ យកទៅព្យាបាល] បន្ទាប់មកពួកខ្ញុំអត់ធ្វើក្រដាសដែលគេហុចឱ្យយើងទេ យើងសរសេរបន្ថែម គេអត់យក អ៊ីចឹងគេឱ្យអង្គុយចាំទាំងអស់គ្នា ដល់គេឱ្យក្រដាសមួយទៀត និយាយទៅគេបង្ខំតែម្ដង នៅពេលយើងធ្វើឱ្យគេហើយអស់ បានគេឱ្យខាងពេទ្យយកពីរនាក់ខាងកូដករចត្តាឡីស័ក ហើយពួកខ្ញុំឱ្យមកផ្ទះ»។
វីអូឌី មិនទាន់អាចសុំការបញ្ជាក់ករណីនេះពីអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បាននៅឡើយទេ នៅថ្ងៃអង្គារនេះ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីន មានប្រសាសន៍ថា ការដែលអាជ្ញាធរដាក់គំនាបឱ្យកូដករចុះកិច្ចសន្យា បន្ទាប់ពីពិនិត្យឃើញអវិជ្ជមានកូវីដ-១៩ ដើម្បីជាថ្នូរឱ្យត្រលប់មកផ្ទះវិញនោះ ជាកិច្ចសន្យាបង្កើតឡើងផ្ទុយពីច្បាប់រដ្ឋធម្មនុញ្ញ ផ្ទុយពីសន្ធិសញ្ញា ឬក៏កតិកាសញ្ញាអន្តរជាតិ ដែលមានចែងអំពីសិទ្ធិក្នុងការជួបជុំ និងសិទ្ធិធ្វើកូដកម្មដោយសន្តិវិធី ឬក៏សិទ្ធិសម្ដែងមតិ។
អ្នកស្រីមានប្រសាសន៍ថា៖ «ទោះបីធ្វើកិច្ចសន្យាឱ្យផ្ដិតមេដៃមួយរយសន្លឹក មួយពាន់សន្លឹកពីកម្មករក៏ដោយ កាលណាកិច្ចសន្យាផ្ទុយពីស្មារតីនៃច្បាប់ គឺទុកជាមោឃៈ មានន័យថា យកមកប្រើប្រាស់អត់បាន»។
កាលពីថ្ងៃទី១៥ ខែកុម្ភៈ រដ្ឋបាលរាជធានីភ្នំពេញ បានចេញសេចក្ដីជូនដំណឹងមួយ ដោយហាមដាច់ខាត មិនអនុញ្ញាតឱ្យមានការប្រមូលផ្ដុំធ្វើបាតុកម្មខុសច្បាប់របស់កូដករណាហ្គាវើលដ៍ នៅក្នុងសង្កាត់ទន្លេបាសាក់ ខណ្ឌចំការមនទៀតឡើយ។ រដ្ឋបាលរាជធានីភ្នំពេញអះអាងថា ការមិនអនុញ្ញាតនេះ គឺដើម្បីទប់ស្កាត់ការឆ្លងរាលដាលជំងឺកូវីដ-១៩ បំប្លែងខ្លួនថ្មីប្រភេទ «អូមីក្រុង» ចូលក្នុងសហគមន៍ ក៏ដូចជាធានាបាននូវសន្តិសុខ សណ្ដាប់ធ្នាប់ របៀបរៀបរយសាធារណៈ។
អាជ្ញាធរក៏បានព្រមានដែរថា ក្នុងករណីក្រុមអ្នកតវ៉ារឹងរូសបន្តសកម្មភាពខុសច្បាប់ទៀតនោះ នឹងចាត់វិធានការច្បាប់តែម្តង៕