សកម្មជនបក្សប្រឆាំងដែលកំពុងជាប់ពន្ធនាគារចំនួន១៣នាក់ បានស្នើទៅតុលាការទម្លាក់ចោលបទចោទប្រកាន់និងដោះលែងពួកគេឱ្យមានសេរីភាពវិញ ដោយថា ពួកគេមិនបានជាប់ពាក់ព័ន្ធនឹងផែនការ៥ចំណុចនៃចលនាសង្គ្រោះជាតិដែលបង្កើតឡើងដោយលោក សម រង្ស៊ី និងមន្ត្រីផ្សេងទៀតទេ។
ការស្នើរបស់សកម្មជនបក្សសង្គ្រោះជាតិដែលត្រូវតុលាការរំលាយ បានធ្វើឡើងបន្ទាប់ពីចៅក្រមសាលាដំបូងរាជធានីភ្នំពេញ នៅថ្ងៃនេះ បានឱ្យតំណាងអយ្យការ និងមេធាវីការពារសិទ្ធិ រួមទាំងជនជាប់ចោទ ធ្វើសេចក្ដីសន្និដ្ឋាននិងសំណូមពរចុងក្រោយ ក្រោយពីបញ្ចប់សវនាការលើសំណុំរឿង «ញុះញង់ឱ្យប្រព្រឹត្តបទឧក្រិដ្ឋជាអាទិ៍ ញុះញង់ឱ្យយោធិនមិនស្ដាប់បញ្ជា និងរួមគំនិតក្បត់»។
សំណុំរឿងទាំង៣នេះ តុលាការបានបើកសវនាការចំនួន១០លើកមកហើយ ដោយមានជនជាប់ចោទចំនួន២១នាក់ហើយ ក្នុងចំណោមថ្នាក់ដឹកនាំនិងសកម្មជនបក្សប្រឆាំងដែលត្រូវបានតុលាការរំលាយទាំង២១នាក់ ក្នុងនោះ អ្នកកំពុងជាប់ឃុំនៅពន្ធនាគារមាន១៣នាក់ ខណៈថ្នាក់ដឹកនាំ៧នាក់ រួមមាន លោក សម រង្ស៊ី, លោក អេង ឆៃអ៊ាង, លោក ហូរ វ៉ាន់, លោក នុត រំដួល, លោកស្រី ជូឡុង សូមូរ៉ា, លោកស្រី មូរ សុខហួរ កំពុងនិរទេសខ្លួននៅក្រៅប្រទេស។
អតីតមន្ត្រីក្រសួងមហាផ្ទៃ លោក ឈុន ប៊ុនឆាត បានស្នើទៅតុលាការឱ្យទម្លាក់បទចោទនិងដោះលែងខ្លួនមានសេរីភាពវិញ ដើម្បីបានជួបជុំនិងចិញ្ចឹមកូនតូចៗពីរនាក់ ខណៈភរិយាគាត់បានស្លាប់ បន្ទាប់ពីសមត្ថកិច្ចចាប់ខ្លួនលោក។ លោក ឈុន ប៊ុនឆាត និយាយថា រូបលោកមិនបានជាប់ពាក់ព័ន្ធអ្វីសោះ ដោយគ្រាន់តែបងជីដូនមួយដែលជាសកម្មជនបក្សប្រឆាំងនិយាយពីលោកប្រាប់មិត្តភក្តិថាមានបងប្អូនធ្វើជាមន្ត្រីនៅក្រសួងមហាផ្ទៃ ក៏ស្រាប់សមត្ថកិច្ចមកចាប់រូបលោកដាក់ពន្ធនាគារទាំងអយុត្តិធម៌ទៅវិញ។
លោកថា៖ «ខ្ញុំស្នើឱ្យទម្លាក់បទចោទនិងដោះលែងខ្ញុំ ព្រោះចាប់ខ្ញុំទាំងមិនបានធ្វើខុសអ្វី គ្រាន់តែបងជីដូនមួយនិយាយ។ ប្រពន្ធខ្ញុំស្លាប់ទាំងសរសៃខ្ចី ដោយសារឃើញសមត្ថកិច្ចចាប់ខ្លួនខ្ញុំ។ ប្រពន្ធខ្ញុំស្លាប់ ទាំងខ្ញុំមិនបានជួបមុខ កូនខ្ញុំពីរនាក់នៅតូចៗ កូនម្នាក់កំពុងបៅទឹកដោះគោ ព្រោះប្រពន្ធខ្ញុំស្លាប់។ កូនៗខ្ញុំសួររកឪពុករហូត ខ្ញុំស្នើលើកលែងការចោទប្រកាន់និងដោះលែងខ្ញុំបានទៅមើលកូនជំនួសម្ដាយ[ប្រពន្ធ]ដែលបានស្លាប់»។
មិនមែនតែលោក ឈុន ប៊ុនឆាត ទេ សកម្មជនបក្សចំនួន១៣នាក់ទៀតដែលកំពុងជាប់ពន្ធនាគារ ក៏បានស្នើទៅតុលាការដូចៗគ្នាដែរ ដោយថា ពួកគេគាំទ្រចំពោះសេចក្ដីសន្និដ្ឋានមេធាវី និងបដិសេធចំពោះការចោទប្រកាន់របស់តំណាងអយ្យការ។
សកម្មជនជាង១០នាក់បានលើកឡើងប្រហាក់ប្រហែលគ្នាថា ពួកគាត់មិនបានពាក់ព័ន្ធនឹងផែនការរៀបចំចំនួន៥ចំណុចនៃចលនាសង្គ្រោះជាតិបង្កើតឡើងនៅទីក្រុងឡុងប៊ិច ប្រទេសអូស្ត្រាលី កាលពីឆ្នាំ២០១៨ឡើយ ហើយមិនដែលទាក់ទងនឹងថ្នាក់ដឹកនាំ និងមន្ត្រីបក្សប្រឆាំងដែរ។ ចំពោះការចោទប្រកាន់របស់តំណាងអយ្យការ ដែលថាពួកគាត់ជាបណ្ដាញសម្ងាត់នោះ ពួកគេថាជារឿងមិនសមហេតុផលឡើយ។
ការបដិសេធនេះ បន្ទាប់តំណាងអយ្យការ លោក សេង ហៀង បានលើកឡើងក្នុងសេចក្ដីសន្និដ្ឋានថា តំណាងអយ្យការមានអង្គហេតុសកម្មភាព និងភស្តុតាងគ្រប់គ្រាន់ ដើម្បីធ្វើការដាក់បន្ទុកលើជនជាប់ចោទទាំង២១នាក់។
អង្គហេតុនិងភស្តុតាងទាំងនោះ រួមមាន ការថ្លែងរបស់លោក សម រង្ស៊ី កាលពីថ្ងៃទី២៨ ខែមករា ឆ្នាំ២០១៨ ទាក់ទិនផែនការ៥ចំណុច និងការផ្ដល់បទសម្ភាសន៍របស់លោក អេង ឆៃអ៊ាង ជាមួយសារព័ត៌មានកាលពីឆ្នាំ២០១៩ រឿងរៀបចំបណ្ដាញសម្ងាត់នៅកម្ពុជា រួមទាំងការនិយាយរឿងកូវីដ-១៩ជាមួយគ្រួសារតាមទូរសព្ទ ក៏ជាភស្តុតាងដែលនាំឱ្យមានសវនាការនាថ្ងៃនេះ។
តំណាងអយ្យការ លោក សេង ហៀង បន្តថា ភស្តុតាងមួយទៀត រួមមាន ការអំពាវនាវរបស់លោក សម រង្ស៊ី ដែលឱ្យពលរដ្ឋនិងកងទ័ពក្រោកឡើង និងឱ្យសហគមន៍អន្តរជាតិដាក់សម្ពាធមកលើរដ្ឋាភិបាល ជាដើម។ លោកបន្តថា បើរដ្ឋាភិបាលមិនទប់ស្កាត់ទេ ប្រាកដជាការជ្រួលច្របល់មិនខាន។
តំណាងអយ្យការ លោក សេង ហៀង ចាត់ទុកករណីនេះថាជាការប៉ុនប៉ង់ផ្ដួលរំលំរដ្ឋាភិបាល និងអំពើញុះញង់ និងស្នើទៅចៅក្រមផ្ដន្ទាទោសជនជាប់ចោទទាំង២១នាក់ និងចេញដីកាឱ្យចាប់ខ្លួនលោក សម រង្ស៊ី និងមន្ត្រីជាន់ខ្ពស់ផ្សេងទៀតដែរ។
លោកថា៖ «ផ្ដួលរំលំរដ្ឋាភិបាលស្របច្បាប់ ដោយឱ្យអឺរ៉ុប US ដក EBA និង GSP ប៉ះពាល់សេដ្ឋកិច្ច ដូចជា វិស័យកាត់ដេរ ទេសចរណ៍ អចលនទ្រព្យ ដោយការប្រកាសឱ្យអន្តរជាតិដាក់សម្ពាធមកលើរដ្ឋាភិបាល បង្កើតឱ្យមានចលាចលក្នុងប្រទេស បំផុសឱ្យប្រជាពលរដ្ឋខឹងរដ្ឋាភិបាលពីបញ្ហាកូវីដ ទាក់ទិននឹងរឿងសេដ្ឋកិច្ច។ ញុះញង់ឱ្យកងទ័ពផ្ដាច់ខ្លួនពីរដ្ឋាភិបាល ព្រោះកងទ័ពជាដៃស្ដាំរដ្ឋាភិបាលក្នុងការទប់ស្កាត់បញ្ហាអសន្តិសុខ ទាំងនេះជាឧបាយកលរបស់ពួកគាត់»។
យ៉ាងណា ការលើកឡើងរបស់តំណាងអយ្យការត្រូវបានមេធាវីការពារក្ដីឱ្យជនជាប់ជំទាស់។
មេធាវីការពារក្ដីជនជាប់ចោទ លោក សំ សុគង់ បានឡើងក្នុងសេចក្ដីសន្និដ្ឋានថា អង្គហេតុឆ្នាំ២០១៨ រឿងបង្កើតចលនា ដំណើរការវិលត្រលប់លោក សម រង្ស៊ី កាលពីថ្ងៃ៩វិច្ឆិកា បានផុតទៅហើយ ខណៈការចាប់ខ្លួនកូនក្ដីនៅឆ្នាំ២០២០ ហើយការចាប់ខ្លួននេះពាក់ព័ន្ធនឹងរឿងកូវីដ-១៩ទេ។
លោកបន្តថា ព្រឹត្តការណ៍ទាំង៣នេះដាច់ចេញពីគ្នា ប៉ុន្តែតំណាងអយ្យការបានព្យាយាមទាញយកមកបញ្ចូលគ្នា ដើម្បីដាក់បន្ទុកលើកូនក្ដីលោក ហើយថាការទាញនេះមិនសមហេតុផល និងផ្ទុយនឹងច្បាប់ថែមទៀត ខណៈកូនក្ដីរបស់លោកឆ្លើយក្នុងសវនាការមិនបានគាំទ្រចលនានោះ។
លោក សំ សុគង់ បន្តទៀតថា កូនក្ដីរបស់លោកមិនមានការពាក់ព័ន្ធជាមួយថ្នាក់ដឹកនាំនៅខាងក្រៅ ហើយការដក EBA និង GSP ក៏មិនមែនដោយសារកូនក្ដីទេ ខណៈមេធាវី៣រូបទៀតក៏បានលើកឡើងប្រហាក់ប្រហែលគ្នាដែរ។ ក្រុមមេធាវីបានស្នើទៅតុលាការទម្លាក់ចោលបទចោទប្រកាន់ និងដោះលែងកូនក្ដីដែលកំពុងជាប់ពន្ធនាគារទាំង១៣នាក់ឱ្យមានសេរីភាពវិញ។
លោក សំ សុគង់ និយាយថា៖ «អង្គហេតុ២០២០ ពាក់ព័ន្ធនឹងរឿងកូវីដ ហើយអង្គហេតុកូនក្ដីខ្ញុំសុទ្ធតែរឿងកូវីដទាំងអស់។ ការបង្កើតចលនា កូនក្ដីរបស់ខ្ញុំបានឆ្លើយហើយ តំណាងអយ្យការគ្រាន់តែយកសម្ដីលោក អេង ឆៃអ៊ាង រឿងបណ្ដាញសម្ងាត់មកចោទកូនក្ដីខ្ញុំ ទាំងកូនក្ដីខ្ញុំអត់មានទទួលថវិកា មានទាក់ទងអីផង ឬមួយដោយសារកូនក្ដីខ្ញុំជាអតីតសកម្មជនបក្សប្រឆាំង? ការដក EBA អឺរ៉ុបជាអ្នកសម្រេច មិនមែនដោយសារពួកគាត់ គេសម្រេចអ៊ីចឹងទេ គេសម្រេចពាក់ព័ន្ធនឹងការលើកកម្ពស់សិទ្ធិនិងលទ្ធិប្រជាធិបតេយ្យទេ»។
ក្រោយពីស្ដាប់សេចក្ដីសន្និដ្ឋានតំណាងអយ្យការ និងក្រុមមេធាវី រួមទាំងសំណូមពរជនជាប់ចោទទាំង១៣នាក់រួច ចៅក្រមជម្រះ លោក រស់ ពិសិដ្ឋ សម្រេចនឹងប្រកាសសាលក្រមនៅថ្ងៃទី១៧ ខែមីនា ឆ្នាំ២០២២ខាងមុខ៕
