ក្រុមគ្រួសារ និងសហជីពសេរីកម្មករនៃព្រះរាជាណាចក្រកម្ពុជា បានអំពាវនាវជាថ្មីទៀតឱ្យសមត្ថកិច្ចនិងតុលាការពន្លឿននីតិវិធី ធ្វើយ៉ាងណាជំរុញរឿងក្ដីនៃអំពើឃាតកម្មទៅលើប្រធានសហជីពសេរីកម្មករប្រចាំរោងចក្រ សាន់តិច ឱ្យបានលឿន និងស្វែងរកឃាតករពិត ដើម្បីយកមកផ្ដន្ទាទោសតាមច្បាប់។
ការទាមទារយុត្តិធម៌ជាថ្មីទៀតរបស់សាច់ញាតិ និងសហជីពសេរីកម្មករ ធ្វើឡើងស្របពេលនៅថ្ងៃទី២៤ ខែកុម្ភៈនេះ គឺជាខួប១៥ឆ្នាំ ដែលលោក ហ៊ី វុទ្ធី អតីតប្រធានសហជីពសេរីកម្មករប្រចាំរោងចក្រ សាន់តិច ត្រូវឃាតករលួចបាញ់ប្រហារ។
លោក ហ៊ី វុទ្ធី ត្រូវគេដឹងថាជាមេដឹកនាំសហជីពម្នាក់ដែលតែងតស៊ូមតិ និងជាអ្នកដែលហ៊ានលះបង់គ្រប់បែបយ៉ាងក្នុងការតស៊ូទាមទារសិទ្ធិសេរីភាពជូនកម្មករ។ មេដឹកនាំសហជីពរូបនេះត្រូវឃាតករបាញ់សម្លាប់នៅព្រឹកថ្ងៃទី២៤ ខែកុម្ភៈ ឆ្នាំ២០០៧។ អំពើបាញ់ប្រហារនេះ កើតឡើង នៅបន្ទាប់ពីលោកចេញពីធ្វើការវេនយប់នៅរោងចក្រ សាន់តិច ដែលស្ថិតនៅតាមបណ្ដោយផ្លូវវេងស្រេង ក្នុងសង្កាត់ចោមចៅ ខណ្ឌដង្កោ រាជធានីភ្នំពេញ។
ប្រធានសហព័ន្ធសហជីពសេរីកម្មករនៃព្រះរាជាណាចក្រកម្ពុជា អ្នកស្រី ទូច សើ ឱ្យដឹងថា កន្លងមក បើទោះជាតុលាការធ្លាប់បានផ្ដន្ទាទោសមនុស្សមួយចំនួនរួចមកហើយក្ដី ប៉ុន្តែអ្នកដែលជាប់ពាក់ព័ន្ធទាំងនោះមិនមែនជាឃាតករពិតប្រាកដទេ។ អ្នកស្រីបន្តថា សម្រាប់សាច់ញាតិ និងក្នុងនាមសហជីព នៅតែទទូចស្នើឱ្យសមត្ថកិច្ច និងតុលាការបន្តបើកការស៊ើបអង្កេត និងស្វែងរកឃាតករពិតយកមកផ្ដន្ទាទោស ដើម្បីផ្ដល់យុត្តិធម៌ដល់ជនរងគ្រោះនិងសាច់ញាតិ។
អ្នកស្រីបន្តថា៖ «បើតាមខ្ញុំយល់ឃើញ ដូចជាមិនអាចចាប់ឃាតករហ្នឹងបានទេ។ នេះគ្រាន់តែជាការបន្លំភ្នែកតែប៉ុណ្ណោះ ដើម្បីធ្វើម៉េចថារកឃាតករឱ្យឃើញ ឱ្យជនរងគ្រោះបានធូរអារម្មណ៍។ ប៉ុន្តែតាមខ្ញុំពិនិត្យមើលជាទូទៅ ដូចជាមិនឃើញឱ្យជាក់ស្ដែងថាពិតជាអាចចាប់ឃាតករហ្នឹងបាន»។
ជុំវិញរឿងក្ដីព្រហ្មទណ្ឌនេះ កាលពីឆ្នាំ២០១១ ចៅក្រមជំនុំជម្រះ លោក កោ វណ្ឌី បានសម្រេចចោទប្រកាន់ឈ្មោះ ចាន់ សុផល អាយុ៣២ឆ្នាំ និងជនសង្ស័យដទៃទៀត ពីបទ «មនុស្សឃាតគិតទុកជាមុន» ដោយផ្ដន្ទាទោសកំបាំងមុខដាក់ពន្ធនាគារ១៨ឆ្នាំ។ ក្រោយសមត្ថកិច្ចចាប់ខ្លួនបានកាលពីខែមីនា ឆ្នាំ២០១២ ជនជាប់ចោទបានប្ដឹងទាស់ទៅឧទ្ធរណ៍ ប្រឆាំងសាលក្រមសាលាដំបូងរាជធានីភ្នំពេញ។ ជនជាប់ចោទធ្លាប់អះអាងថា ខ្លួនមិនមានជាប់ពាក់ព័ន្ធរឿងក្ដីឃាតកម្មនេះទេ ប៉ុន្តែបានសារភាពថា រូបគេបានស្គាល់គ្នាជាមួយជនរងគ្រោះ មុនពេលស្លាប់។
វីអូឌី មិនអាចសុំប្រតិកម្មពីភរិយាលោក ហ៊ី វុទ្ធី គឺអ្នកស្រី វ៉ា សុភក្តិ បានទេ នៅថ្ងៃព្រហស្បតិ៍នេះ។
បើទោះជាបែបណា តាមរយៈសារអំពាវនាវនៅលើបណ្ដាញសង្គមហ្វេសប៊ុករបស់សហព័ន្ធសហជីពសេរីកម្មករនៃព្រះរាជាណាកចក្រកម្ពុជា នៅចំថ្ងៃខួប១៥ឆ្នាំ នៃការបាញ់សម្លាប់សកម្មជនសហជីពនេះ បង្ហាញថា ក្រុមគ្រួសារ និងភរិយាលោក ហ៊ី វុទ្ធី នៅពេលនេះ កំពុងរស់នៅដោយនិរទេសខ្លួនក្នុងប្រទេសបារាំង។ ប្រភពដដែលបន្តថា អស់រយៈពេល១៥ឆ្នាំហើយ ដែលឃាតករនិងជនដៃដល់ដែលស្គាល់ទាំងឈ្មោះនិងមុខមាត់ពិត នៅបន្តមានសេរីភាពនៅឡើយទេ រួមទាំងអ្នកបញ្ជានៅពីក្រោយខ្នងផង។
កាលពីខែមករា ឆ្នាំ២០១៤ ចៅក្រមជំនុំជម្ រះលោក កោ វណ្ឌី បានលើកយករឿងក្ដីព្រហ្មទណ្ឌនេះមកពិនិត្យឡើងវិញ ហើយបានចាត់របៀបនៃការស៊ើបអង្កេតបន្ត ដើម្បីស្វែងរកអ្នកពាក់ព័ន្ធ ប៉ុន្តែពេលវេលានៃការស៊ើបអង្កេតបានកប់ជិត១០ឆ្នាំមកនេះ នៅមិនទាន់ឃើញមានការវិវត្តថ្មីនៅឡើយទេ ហើយអ្នកពាក់ព័ន្ធក៏មិនទាន់ឃើញសមត្ថកិច្ចហៅមកសួរនាំនៅឡើយដែរ។
វីអូឌី មិនអាចសុំការបញ្ជាក់បន្ថែមពីអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេ ខណៈមន្រ្តីនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល មិនអាចសុំការអត្ថាធិប្បាយបាន។
យ៉ាងនេះក្ដី នាយករងអង្គការការពារសិទ្ធិមនុស្សលីកាដូ លោក អំ សំអាត ក៏ឯកភាពដែរថា ការទាមទាររកយុត្តិធម៌ពីក្រុមគ្រួសារជនរងគ្រោះ ជាភាពត្រឹមត្រូវមួយ ព្រោះសេចក្ដីសម្រេចរបស់តុលាការក្នុងការកំណត់ទៅលើអញ្ញត្តជន ដោយជនមិនស្គាល់ផ្សេងទៀត ជាអំពើយុត្តិធម៌មួយសម្រាប់ជនរងគ្រោះ។ លោកបន្តថា ប្រសិនបើគ្រប់សំណុំរឿង ទាំងតុលាការ និងសមត្ថកិច្ចចេះតែបន្តផ្អិបទុកបែបនេះ នឹងនាំឱ្យមានភាពអយុត្តិធម៌សង្គមកើតឡើងកាន់តែច្រើន។
លោកបន្តថា៖ «មកដល់ពេលនេះ យើងជាអង្គការសង្គមស៊ីវិលមើលឃើញថា ភាពយុត្តិធម៌ពេលលេញសម្រាប់ក្រុមគ្រួសារលោក ហ៊ី វុទ្ធី ក៏នៅមិនទាន់មានដែរ ដែលយើងចាត់ទុកវាជានិទណ្ឌភាពមួយដែរសម្រាប់ករណីលោក ហ៊ី វុទ្ធី ដោយសារយុត្តិធម៌មិនទទួលបានពេញលេញ ហើយក្រុមគ្រួសាររបស់គាត់ក៏នៅតែទទូចសុំឱ្យមានការស៊ើបអង្កេត»។
បើតាមអ្នកជំនាញសិទ្ធិមនុស្សរូបនេះ ការសម្លាប់មេដឹកនាំសហជីពកន្លងទៅ ដូចជា លោក ជា វិជ្ជា លោក រស់ សុវណ្ណរ៉េត និងលោក ហ៊ី វុទ្ធី នេះជាដើម ជាសារអាក្រក់មួយដែលជាការគំរាមកំហែងនិងបំភិតបំភ័យទៅដល់ស្មារតីសហជីពដែលការពារផលប្រយោជន៍របស់កម្មករ៕