ក្រសួងសុខាភិបាលឱ្យដឹងថា មនុស្សចំនួន៥នាក់ទៀតបានស្លាប់ដោយសារជំងឺកូវីដ-១៩ ខណៈអ្នកឆ្លងថ្មី មានចំនួនជិត៥០០នាក់។
សេចក្តីប្រកាសព័ត៌មានរបស់ក្រសួងសុខាភិបាលចេញផ្សាយនៅថ្ងៃទី២៦ ខែកុម្ភៈ ឆ្នាំ២០២២នេះឱ្យដឹងថា ផ្អែកតាមលទ្ធផលបញ្ជាក់ដោយ PCR test កាលពីម្សិលមិញ រកឃើញអ្នកឆ្លងជំងឺកូវីដ-១៩ បំប្លែងថ្មី ប្រភេទ «អូមីក្រុង» ចំនួន៤៧០នាក់ ខណៈអ្នកស្លាប់មានចំនួន ៥ នាក់ ក្នុងនោះ មិនបានចាក់វ៉ាក់សាំង៤នាក់។
ក្រសួងបានបានបញ្ជាក់ថា ក្នុងចំណោមអ្នកឆ្លងថ្មីទាំង ៤៧០នាក់នោះ មានករណីនាំចូលពីក្រៅប្រទេសចំនួន៣៥នាក់ និងឆ្លងក្នុងសហគមន៍៤៣៥នាក់។ ក្រសួងថា ក្រៅពីអ្នកស្លាប់ និងរកឃើញអ្នកឆ្លងថ្មី ក៏មានអ្នកជំងឺចំនួន៤៩៧នាក់ បានជាសះស្បើយដែរ។
គិតត្រឹមព្រឹកថ្ងៃសៅរ៍នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុប ១២៩ ៥៤៨នាក់ ក្នុងនោះ អ្នកជំងឺព្យាបាលជាសះស្បើយចំនួន ១២២ ៨៧៧នាក់ និងអ្នកស្លាប់ចំនួន៣ ០៣២នាក់។
ចំណែកករណីឆ្លងវីរុសប្រភេទអូមីក្រុងចូលក្នុងសហគមន៍វិញ ក្រសួងថា គិតមកដល់ពេលនេះបានកើនដល់៨២៧០នាក់ហើយ៕