លោកនាយករដ្ឋមន្ត្រី ហ៊ុន សែន បានប្រកាសថា លោកកំពុងដាក់ខ្លួនធ្វើចត្តាឡីស័ក ឬ ដាក់ខ្លួនឱ្យនៅដាច់តែឯងក្នុងរយៈពេលខ្លី ក្រោយប៉ះពាល់ផ្ទាល់ជាមួយអ្នកជំងឺកូវីដ-១៩។
លោកនាយករដ្ឋមន្ត្រី បានសរសេរនៅលើទំព័រហ្វេសប៊ុកផ្លូវការរបស់លោកកាលពីល្ងាចថ្ងៃទី២៥ ខែកុម្ភៈថា ដោយសារលោកបានប៉ះពាល់ផ្ទាល់ជាមួយអ្នកវិជ្ជមានកូវីដ-១៩។ ដូច្នេះដើម្បីធានាកុំឱ្យមានការឆ្លងបន្តដែលអាចចេញពីខ្លួនលោកក្នុងពេលកំពុងមានការសង្ស័យនោះ លោកបានសម្រេចដាក់ខ្លួនធ្វើចត្តាឡីស័កមួយរយ:ពេលខ្លីសិន។
តែទោះជាយ៉ាងនេះក្តី លោកនៅតែអះអាងថា លោកនឹងបន្តធ្វើការងារពីផ្ទះ ហើយក៏មិនទាន់ សម្រេចលុបចោលកម្មវិធីនៅសប្តាហ៍ក្រោយនេះទេ។
លោកបានសរសេរថា៖ «ខ្ញុំនឹងរស់នៅដាច់ដោយឡែក តែខ្ញុំនៅតែបន្តធ្វើការតាមទម្លាប់ដូចដែលខ្ញុំបានធ្វើកាលពីធ្វើចត្តាឡីស័ក៣លើកមុនៗនោះដែរ»។ ខ្ញុំមិនទាន់លុបចោលកម្មវិធីសម្រាប់សប្តាហ៍ក្រោយនៅឡើយទេ។ ខ្ញុំនឹងបន្តធ្វើតេស្តដើម្បីបញ្ជាក់ពីលទ្ធផលវិជ្ជមានឬ អវិជ្ជមានកូវីដ-១៩ ដើម្បីបញ្ចប់ការធ្វើចត្តាឡីស័កសម្រាប់រូបខ្ញុំ ដែលខ្ញុំនឹងជូនព័ត៌មានតាមក្រោយ»។
លោកនាយករដ្ឋមន្ត្រី ហ៊ុន សែន មិនបានបញ្ជាក់ថា តើលោកបានប៉ះពាល់ជាមួយអ្នកជំងឺកូវីដ-១៩ ជាអ្នកណា និងពេលណានោះទេ។ ក៏ប៉ុន្តែផ្អែកតាមសកម្មភាពជាសាធារណៈរបស់លោកកាលពីថ្ងៃទី២៤ ខែកុម្ភៈ លោកបានជួបនិងស្វាគមន៍ដំណើរទស្សនកិច្ចរបស់នាយករដ្ឋមន្ត្រី ម៉ាឡេស៊ី និងក្រោយមក នៅរសៀលថ្ងៃដដែលនោះ លោកក៏បានអញ្ជើញទៅចូលរួមគោរពវិញ្ញាណក្ខន្ធសព លោកនាយឧត្តមសេនីយ៍ សុខ សារឿន រដ្ឋលេខាធិការក្រសួងការពារជាតិផងដែរ។
យោងតាមសេចក្តីប្រកាសព័ត៌មានរបស់ក្រសួងសុខាភិបាលមួយរយៈពេលចុងក្រោយនេះ បានបង្ហាញថា តួលេខនៃអ្នកឆ្លងជំងឺកូវីដ-១៩ នៅកម្ពុជាបានហក់ឡើងវិញ ក្រោយពីជំងឺកូវីដ១៩ បំប្លែងថ្មី «អូមីក្រុង» បានឆ្លងចូលសហគមន៍មក ដោយក្នុងមួយថ្ងៃៗ មិនក្រោម៥០០នាក់នោះទេ។
នៅថ្ងៃទី២៦ ខែកុម្ភៈនេះ ក្រសួងសុខាភិបាលបានប្រកាសរកឃើញអ្នកឆ្លងជំងឺកូវីដ-១៩ ថ្មី ចំនួន ៤៧០ នាក់ ជាសះស្បើយ ៤៩៧ នាក់ និងស្លាប់៥នាក់៕