ក្រុមកូដករណាហ្គាវើលដ៍ប្រកាសប្តូរមកធ្វើកូដកម្មតាមប្រព័ន្ធអនឡាញ ដើម្បីទាមទារឱ្យភាគីពាក់ព័ន្ធដោះស្រាយបញ្ចប់វិវាទការងារ និងដោះលែងថ្នាក់ដឹកនាំ រួមទាំងសមាជិកសហជីពចំនួន១១នាក់ ដែលកំពុងជាប់ឃុំនៅពន្ធនាគារ ឱ្យមានសេរីភាពវិញ ខណៈពួកគេមួយចំនួនធំជាប់ធ្វើចត្តាឡីស័ក។
កូដករក្រុមហ៊ុនណាហ្គាវើលដ៍ កញ្ញា សៀក បញ្ញា និយាយថា ដើមចមដែលនាំឱ្យក្រុមកូដករប្តូរមកធ្វើកូដកម្មតាមប្រព័ន្ធអនឡាញនេះ ដោយសារតែកូដករមួយចំនួនធំកំពុងជាប់ធ្វើចត្តាឡីស័ក តាមការណែនាំរបស់ក្រសួងសុខាភិបាល ។
កញ្ញាមានប្រសាសន៍៖ «ពួកខ្ញុំនៅតែបន្តធ្វើកូដកម្មដដែល តែពួកខ្ញុំធ្វើតាមអនឡាញវិញ កូដកម្មតាមអនឡាញដូចជា ផុសរូប និងផុសប៉ុស្ទឺទាមទារឱ្យក្រុមហ៊ុនដោះស្រាយវិវាទការងារ ។ ពួកខ្ញុំធ្វើកូដករតាមអនឡាញ ដោយសារពួកខ្ញុំជាប់ធ្វើចត្តាឡីស័ក តាមការណែនាំរបស់ក្រសួងសុខាភិបាលចំនួន៧ថ្ងៃទៀត»។
កូដករម្នាក់ទៀត អ្នកស្រី ម៉ៅ គឹមឡាយ និយាយថា ពួកគាត់បន្តធ្វើកូដកម្មតាមប្រព័ន្ធអនឡាញតែរយៈពេលខ្លីតែប៉ុណ្ណោះ ដោយសារពួកគេមួយចំនួនធំជាប់ធ្វើចត្តាឡីស័កមួយសប្តាហ៍ទៀត។
អ្នកស្រីបញ្ជាក់ថា បើស្ថាប័នពាក់ព័ន្ធមិនដោះស្រាយបញ្ចប់វិវាទជូនក្រុមកូដករទេ នោះពួកគេនៅតែចិញ្ចឹមចិត្តធ្វើកូដកម្មរហូតមានដំណោះស្រាយ។
អ្នកស្រីនិយាយថា៖ «សូមឱ្យអាជ្ញាធរពាក់ព័ន្ធជួយសម្រួលនិងដោះស្រាយជូនពួកខ្ញុំផង ព្រោះពួកខ្ញុំមិនទាន់មានដំណោះស្រាយទេ អញ្ចឹងយើងនៅតែធ្វើកូដកម្ម គឺយើងធ្វើរហូតដល់មានដំណោះស្រាយ»។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍ថា លោកមិនចាប់អារម្មណ៍និងការធ្វើកូដកម្មរបស់ក្រុមកូដករណាហ្គាវើលដ៍នោះទេ។ ប៉ុន្តែលោកអំពាវនាវឱ្យពួកគេគោរពតាមការណែនាំរបស់ក្រសួងសុខាភិបាល និងរដ្ឋបាលរាជធានីភ្នំពេញ ដើម្បីកុំឱ្យឆ្លងរាលដាលនៃជំងឺកូវីដ-១៩ ចូលក្នុងសហគមន៍ទ្រង់ទ្រាយធំជាដើម។
លោកអំពាវនាវដូចនេះថា៖ «ធ្វើយ៉ាងណាចូលរួមអនុវត្តសេចក្តីណែនាំរបស់ក្រសួងសុខាភិបាល ក៏ដូចជាសេចក្តីហាមឃាត់របស់សាលារាជធានីភ្នំពេញ។ យើងឃើញស្រាប់ហើយមួយសារ ពីរសារ ទៅបីសារ សុទ្ធតែរកឃើញវិជ្ជមាននៅក្នុងក្រុមកូដករ។ អញ្ចឹងហើយសាលារាជធានីភ្នំពេញ ហាមមិនឱ្យមានការជួបជុំ ខ្លាចមានឆ្លងចូលក្នុងសហគមន៍ជាទ្រង់ទ្រាយធំ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ជំរុញទៅរដ្ឋាភិបាលគប្បីអន្តរាគមន៍ទៅអាជ្ញាធរពាក់ព័ន្ធពន្លឿនដោះស្រាយបញ្ចប់វិវាទការងាររវាងក្រុមហ៊ុនណាហ្គាវើលដ៍ និងក្រុមកូដករឱ្យបានឆាប់ បើពុំដូច្នោះទេ នឹងធ្វើឱ្យប៉ះពាល់ដល់មុខមាត់រដ្ឋាភិបាលកាន់តែអាក្រក់បន្ថែមទៀត។
លោកមានប្រសាសន៍ថា៖ «ដំណោះស្រាយឱ្យមានតម្លាភាព ជារឿងសំខាន់ ប៉ុន្តែបើសិនជាការអូសបន្លាយនៅតែវែងឆ្ងាយ វាក្លាយទៅជាមិនមែនវិវាទជាមួយណាហ្គាវើលដ៍ ជាមួយនិងកូដករទេ វាក្លាយទៅជាទំនាស់បដិបក្ខ រវាងក្រុមកូដករជាមួយអាជ្ញាធរទៅវិញ ដែលមិនមានផលចំណេញទេ ផ្ទុយទៅវិញមានតែរងការរិះគន់រដ្ឋាភិបាលថា រំលោភសិទ្ធិមនុស្ស រំលោភសិទ្ធិសហជីព រំលោភសិទ្ធិបុគ្គលិកណាហ្គាវើលដ៍»។
កាលពីថ្ងៃ២៤ ខែកុម្ភៈ អង្គការសមាគមចំនួន ៥១ស្ថាប័នដែលចេញសេចក្តីថ្លែងការណ៍រួម លើកឡើងថា មួយរយៈមកនេះ កូដករណាហ្គាវើលដ៍ ដែលភាគច្រើនជាស្ត្រី បានរងនូវអំពើហិង្សា ការបៀតបៀនផ្លូវភេទ រួមទាំងការប្រើវិធានសុខាភិបាលមិនត្រឹមត្រូវពីសំណាក់អាជ្ញាធរដែលចុះទប់ស្កាត់ការធ្វើកូដកម្មដោយអហិង្សា។
ពួកគេចាត់ទុកទង្វើរបស់អាជ្ញាធរថា បានអនុវត្តផ្ទុយទៅនឹងអនុវត្តអនុសញ្ញា ស៊ី-ដ ដែលតម្រូវឱ្យរដ្ឋជាសមាជិកធានាពេញលេញនូវសិទិ្ធសេរីភាពជួបជុំ ការបញ្ចេញមតិ គ្មានការរំលោភបំពាន និងតាមដានត្រួតពិនិត្យ ឬចាប់ពិរុទ្ធ។ ប៉ុន្តែត្រូវបានរដ្ឋបាលរាជធានីភ្នំពេញច្រានចោលការចោទប្រកាន់នេះ។
ក្រោយមក នៅថ្ងៃទី២៥ ខែកុម្ភៈ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចេញសេចក្ដីថ្លែងការណ៍ថា កន្លងមក ក្រុមកូដករជាច្រើននាក់ដែលចូលរួមកូដកម្មបានអនុវត្តតាមវិធានការ សុខាភិបាលត្រឹមត្រូវ ដោយពាក់ម៉ាស់ រក្សាគម្លាតពីគ្នា និងបានធ្វើតេស្ត កូវីដ-១៩ ថែមទៀត។ តែអាជ្ញាធរបានរុញច្រាន និងចាប់ខ្លួនកូដករបញ្ចូលក្នុងរថយន្តក្រុងទាំងបង្ខំ ដើម្បីយកទៅធ្វើតេស្តរកជំងឺកូវីដ-១៩ ក្រោមហេតុផលថា បំពានវិធានសុខាភិបាល ហើយបានឃុំខ្លួនពួកគេនៅកន្លែងមណ្ឌលចត្តាឡីស័កដោយគ្មានអនាម័យសមរម្យ និងមិនបានផ្ដល់ទឹកសម្រាប់ឱ្យពួកគេបរិភោគជាដើម។
អង្គការឃ្លាំមើលសិទ្ធិមនុស្សចាត់ទុកការចោទប្រកាន់របស់អាជ្ញាធរទៅលើក្រុមកូដករថា បានបំពានវិធានការកូវីដ-១៩នោះថា ធ្វើឡើងដោយមិនសមហេតុផល ឡើយ ដែលករណីនេះ គ្រាន់តែជារឿងបិទបាំងចំពោះការបញ្ឈប់កូដកម្មរបស់កូដករក្រុមហ៊ុនណាហ្គាវើលដ៍ពីសំណាក់អាជ្ញាធរតែប៉ុណ្ណោះ។
គួរបញ្ជាក់ថា កូដករណាហ្គាវើលដ៍បានចេញតវ៉ាជាថ្មីទៀតចាប់ពីថ្ងៃទី២៨ ខែធ្នូ ឆ្នាំ២០២១មក ក្រោយពីថៅកែរបស់ខ្លួនបានបញ្ឈប់បុគ្គលិកជាង១ ៣០០នាក់ ដែលភាគច្រើនពួកគេជាថ្នាក់ដឹកនាំសហជីព។ ក្រុមកូដករទាំងនោះអះអាងថា ការបញ្ឈប់នេះ ថៅកែធ្វើឡើងដោយមិនអនុលោមតាមច្បាប់ស្តីពីការងារនោះទេ។ ប៉ុន្តែវិវាទដែលបានអូសបន្លាយជាង២ខែមកនេះ ជំរុញឱ្យថ្នាក់ដឹកនាំសហជីពជាច្រើននាក់ត្រូវបានចាប់ឃាត់ខ្លួន ក្នុងនោះមេដឹកនាំនិងសកម្មជនសហជីព ១១នាក់កំពុងជាប់ពន្ធនាគារ៕
