គណបក្សភ្លើងទៀន បានប្រកាសថ្កោលទោសប្រទេសរុស្ស៊ីដែលបានឈ្លានពានទឹកដីនិងអធិបតេយ្យភាពរបស់ប្រទេសអ៊ុយក្រែន ខណៈបណ្ដារដ្ឋនៅអាស៊ីមួយចំនួននិងអឺរ៉ុបបានប្រកាសជួយដោយផ្ដល់អាវុធ រួមទាំងសម្ភារផ្សេងៗដល់អ៊ុយក្រែន។
ក្នុងសេចក្ដីថ្លែងការណ៍របស់គណបក្សភ្លើងទៀន នៅថ្ងៃទី៣ ខែមីនា ឆ្នាំ២០២២ ឱ្យដឹងថា ការសម្រេចថ្កោលទោសនេះ ដើម្បីចូលរួមជាមួយសហគមន៍អន្តរជាតិ ដោយមិនគាំទ្រចំពោះប្រទេសរុស្ស៊ីដែលបានការប្រើប្រាស់កម្លាំងយោធាឈ្លានពានប្រទេសអ៊ុយក្រែន ធ្វើឱ្យបាត់បង់អាយុជីវិតមនុស្សជាច្រើន មានទាំងកុមារផង និងខូចខាតទ្រព្យសម្បត្តិយ៉ាងធ្ងន់ធ្ងរ។
សេចក្ដីថ្លែងការណ៍ដដែលថា គាំទ្រចំពោះការតស៊ូយ៉ាងប្ដូរផ្ដាច់ការពារទឹកដីនិងលទ្ធិប្រជាធិបតេយ្យរបស់រដ្ឋាភិបាលនិងប្រជាពលរដ្ឋអ៊ុយក្រែន ហើយនឹងប្រឆាំងដាច់ខាតនូវរាល់អំពើឈ្លានពាននៃប្រទេសមួយទៅលើប្រទេសមួយទៀត។
សេចក្ដីថ្លែងការណ៍គណបក្សភ្លើងទៀន៖ «គណបក្សភ្លើងទៀនចូលរួមជាមួយនឹងសហគមន៍អន្តរជាតិ អំពាវនាវដល់ប្រទេសរុស្ស៊ីដែលជាប្រទេសមហាអំណាចយោធាដ៏ធំទី២នៅលើពិភពលោក សូមបញ្ឈប់ជាបន្ទាន់»។
អ្នកនាំពាក្យគណបក្សភ្លើងទៀន លោក ថាច់ សេដ្ឋា បន្ថែមថា សេចក្ដីថ្លែងការណ៍ថ្កោលទោសនេះ ដើម្បីលើកស្ទួយលទ្ធិប្រជាធិបតេយ្យ សិទ្ធិមនុស្ស ជាពិសេសបង្ហាញការមិនពេញចិត្តចំពោះការឈា្លនពានពីប្រទេសមួយទៅប្រទេសមួយទៀតដែលបង្កឱ្យមានវិនាសកម្ម។
លោកថា៖ «អ៊ីចឹងហើយយើងខ្ញុំថ្កោលទោស មិនថារុស្ស៊ីទេ ប្រទេសណាក៏ដោយដែលមានអំពើឈ្លានពានទៅប្រទេសមួយទៀត គឺយើងមិនគាំទ្រជាដាច់ខាត»។
យ៉ាងណាក៏ដោយ បណ្ដាប្រទេសចំនួន១៤១ កាលពីម្សិលមិញ បានសម្រេចបោះឆ្នោតគាំទ្រ ដោយថ្កោលទោសរុស្ស៊ីចំពោះការឈ្លានពានទៅលើទឹកដីអ៊ុយក្រែន។
ឯកអគ្គរដ្ឋទូតបារាំង និងអាល្លឺម៉ង់ កាលពីថ្ងៃទី១ ខែមីនា បានស្នើដល់កម្ពុជាចូលរួមក្នុងចលនាអន្តរជាតិ ដើម្បីគាំទ្រអ៊ុយក្រែន និងថ្កោលទោសការឈ្លានពានរបស់រុស្ស៊ី។ តំណាងទូតប្រទេសទាំងពីរក៏បានអំពាវនាវឱ្យមានការគោរពអធិបតេយ្យភាព និងបូរណភាពដែនដីរបស់អ៊ុយក្រែន ហើយស្នើឱ្យដកទ័ពពីសំណាក់រុស្ស៊ីភ្លាមៗនិងគ្មានលក្ខខណ្ឌចេញពីទឹកដីអ៊ុយក្រែន៕
