ក្រសួងមហាផ្ទៃ ប្រកាសលុបឈ្មោះ «គណបក្សបេះដូងជាតិ» ចេញពីបញ្ជីគណបក្សនយោបាយ បន្ទាប់ពីក្រសួងរកឃើញភាពមិនប្រក្រតីក្នុងការប្រមូលស្នាមេដៃ ដើម្បីស្នើសុំចុះបញ្ជីនាពេលកន្លងមក។
ក្នុងប្រកាសរបស់ក្រសួងមហាផ្ទៃបានឱ្យដឹងកាលពីថ្ងៃទី២ ខែមីនា ម្សិលមិញ ថាក្រសួងសម្រេចលុបឈ្មោះ «គណបក្សបេះដូងជាតិ» ចេញពីបញ្ជីបង្កើតគណបក្សនយោបាយនៅក្រសួងមហាផ្ទៃ តាមបញ្ញត្តិនៃច្បាប់ស្ដីពីគណបក្សនយោបាយ។
ស្ថាបនិកគណបក្សបេះដូងជាតិ លោក សៀម ភ្លុក មានប្រសាសន៍នៅថ្ងៃព្រហស្បតិ៍នេះថា ការលុបឈ្មោះ «គណបក្សបេះដូងជាតិ» ចេញពីបញ្ជីបង្កើតគណបក្សនយោបាយ ជាការបិទសិទ្ធិក្នុងការចូលរួមបង្កើតគណបក្សប្រកួតប្រជែងជាមួយនឹងគណបក្សនយោបាយផ្សេងទៀត ក្នុងគោលការណ៍ប្រជាធិបតេយ្យ សេរី ពហុបក្ស ដែលធ្វើឱ្យផ្ទុយពីច្បាប់រដ្ឋធម្មនុញ្ញ។
លោកបន្តថា លោកគ្រោងនឹងចូលរួមជីវភាពនយោបាយជាមួយគណបក្សមួយ ប៉ុន្តែលោកមិនទាន់បញ្ជាក់ឈ្មោះគណបក្សនោះនៅឡើយ ដោយរង់ចាំសាលាដំបូងរាជធានីភ្នំពេញ កាត់ក្ដីលើសកម្មជន «គណបក្សបេះដូងជាតិ» ជាង២០នាក់ដែលរងការចោទពាក់ព័ន្ធនឹងបទចោទ «លួចបន្លំស្នាមមេដៃបង្កើតគណបក្ស» កន្លងមក។
ជាមួយគ្នានេះដែរ លោក សៀម ភ្លុក ចាត់ទុកការចោទប្រកាន់របស់តុលាការទៅលើសកម្មជនរបស់ខ្លួនថា ជាការគំរាមកំហែងនិងបិទសិទ្ធិសេរីភាពនយោបាយដែលពួកគេគាំទ្រ។
លោកមានប្រសាសន៍ថា៖ «សព្វថ្ងៃ យើងកំពុងតែដោះស្រាយបណ្ដឹងរបស់សកម្មជននៅមូលដ្ឋានដែលតុលាការចោទប្រកាន់ មិនទាន់ទម្លាក់ចោលបទចោទលើពួកគេ ពីព្រោះការចោទប្រកាន់នោះជាការគំរាមកំហែងសិទ្ធិសេរីភាព និងសិទ្ធិនយោបាយ»។
គណបក្សបេះដូងជាតិ ដែលគេសង្ស័យថា លោក សម រង្ស៊ី ស្ថិតនៅពីក្រោយនៃការបង្កើតគណបក្សថ្មីថ្មោងនេះ ត្រូវបានក្រសួងមហាផ្ទៃចោទប្រកាន់ថា «ក្លែងស្នាមមេដៃ និងមានចេតនាទុច្ចរិត»។
បើទោះជាបែបណា ស្ថាបនិកគណបក្សបេះដូងជាតិ លោក សៀម ភ្លុក បានបដិសេធជាញឹកញយថា ខ្លួនមិនបានប្រព្រឹត្តដូចការចោទប្រកាន់របស់ក្រសួងនោះឡើយ។ ផ្ទុយទៅវិញ លោកថា ដោយសារករណីនេះជារឿងនយោបាយ ហេតុនេះគេរកវិធីគ្រប់ល្បិចកលធ្វើយ៉ាងណាកុំឱ្យគណបក្សបេះដូងជាតិអាចលេចចេញជារូបរាងឡើង ដើម្បីឈានទៅរកការបោះឆ្នោតឆ្នាំ២០២២ និងឆ្នាំ២០២៣ ខាងមុខបាន។
កាលពីថ្ងៃទី១៦ ខែវិច្ឆិកា ឆ្នាំ២០២១ ក្រសួងមហាផ្ទៃបានសម្រេចបដិសេធចំពោះការស្នើសុំចុះឈ្មោះក្នុងបញ្ជីបង្កើតគណបក្សនយោបាយ របស់ស្ថាបនិកគណបក្សបេះដូងជាតិ លោក សៀម ភ្លុក។
ក្រោយមក នៅថ្ងៃទី២៦ ខែវិច្ឆិកា ឆ្នាំ២០២១ លោក សៀម ភ្លុក ក៏បានដាក់ពាក្យបណ្ដឹងទៅតុលាការកំពូល ដើម្បីតវ៉ាចំពោះករណីនេះ ប៉ុន្តែត្រូវបានតុលាការកំពូលសម្រេចបិទផ្លូវតវ៉ានៅចុងឆ្នាំ២០២១៕