ក្រសួងរៀបចំដែនដី បានព្រមានចាត់វិធានការច្បាប់ចំពោះក្រុមហ៊ុនឬក្រុមជាងដែលហ៊ានសាងសង់ឬរុះរើសំណង់ដែលមិនទាន់ទទួលបានលិខិតអនុញ្ញាតជាផ្លូវការ ដោយថា សកម្មភាពទាំងនោះជារឿងខុសច្បាប់។
ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី២ ខែមីនា ឆ្នាំ២០២២ បានចេញលិខិតមួយដោយអះអាងថា ចាប់ពីពេលនេះតទៅ ក្រសួងនឹងចុះត្រួតពិនិត្យបទល្មើសតាមការដ្ឋានសំណង់នានា ដើម្បីចាប់វិធានការដកហូតអាជ្ញាបណ្ណ និងការដាក់ទណ្ឌកម្មផ្សេងៗទៀតចំពោះក្រុមហ៊ុនឬក្រុមជាងដែលបំពានបំរាមនេះ ដូចជា ការកសាងសំណុំរឿងបញ្ជូនទៅតុលាការ ដើម្បីស្នើសុំការរឹបអូសសម្ភារ បរិក្ខារ និងឧបករណ៍ផ្សេងៗទៀត។
លិខិតសរសេរថា៖ «ក្រសួងរៀបចំដែនដី នគរូបនីយកម្ម និងសំណង់ មិនអនុញ្ញាតឱ្យធ្វើការចុះកិច្ចសន្យាម៉ៅការ សាងសង់ ឬរុះរើសំណង់ដែលមិនទាន់ទទួលបានលិខិតអនុញ្ញាតសាងសង់ លិខិតអនុញ្ញាតជួសជុល លិខិតអនុញ្ញាតរុះរើ និងលិខិតអនុញ្ញាតបើកការដ្ឋានសំណង់ពីអាជ្ញាធរឬមន្ត្រីមានសមត្ថកិច្ចឡើយ»។
ក្រសួងបញ្ជាក់ថា សកម្មភាពដោយគ្មានច្បាប់ទាំងនេះជាអំពើខុសច្បាប់ ព្រោះគម្រោងសាងសង់សំណង់នោះមិនមានប្លង់ស្ថាបត្យកម្ម និងប្លង់គ្រឿងផ្គុំសំណង់ដែលទទួលបានការយល់ព្រមពីអាជ្ញាធរឬមន្រ្ដីមានសមត្ថកិច្ច ដែលអាចបង្កឱ្យប៉ះពាល់ដល់បទប្បញ្ញតិ្ដស្ដីពីធ្លាគម្លាត សន្ដិសុខ សណ្ដាប់ធ្នាប់សាធារណៈ គុណភាព សុវត្ថិភាពសំណង់សោភ័ណភាព ទ្រព្យសម្បតិ្ត សុខុមាលភាពរបស់ម្ចាស់សំណង់ និងអាចបង្កឱ្យមានវិវាទផ្សេងៗ។
ក្រសួងសាម៉ីដដែលអះអាងថា ចំពោះការផ្ដន្ទាទោសពិន័យ គឺអាចជាប្រាក់ ឬអាចផ្ដន្ទាទោសដាក់ពន្ធនាគារ ការរំលាយក្រុមជាង ការដាក់ឱ្យសិ្ថតនៅក្រោមការត្រួតពិនិត្យតាមដានរបស់តុលាការ និងការហាមឃាត់ចំពោះការធ្វើសកម្មភាពផ្សេងៗទៀត៕
