គណបក្សសម្ព័ន្ធដើម្បីប្រជាធិបតេយ្យ (LDP) បានប្រកាសថា នឹងមិនដាក់បេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០២២នេះឡើយ។
យោងតាមសេចក្តីជូនដំណឹងមួយ ដែលវីអូឌីទទួលបាននៅយប់ថ្ងៃសៅរ៍ ទី៥ ខែមីនា គណបក្សសម្ព័ន្ធដើម្បីប្រជាធិបតេយ្យ (LDP) បានជូនដំណឹងដល់អ្នកគាំទ្ររបស់ខ្លួនថា ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ ខាងមុខនេះ គណបក្សសម្ព័ន្ធដើម្បីប្រជាធិបតេយ្យនឹងមិនចូលរួមឈរឈ្មោះក្នុងការបោះឆ្នោតនេះឡើយ។
គណបក្សសម្ព័ន្ធដើម្បីប្រជាធិបតេយ្យ (LDP) យល់ថា គណៈកម្មាធិការជាតិរៀបចំការបោះឆ្នោត គ.ជ.ប បានរឹតត្បិតនូវលទ្ធភាពរបស់គណបក្សនយោបាយក្នុងការទទួលបាននូវទម្រង់លទ្ធផលឆ្នោតបឋមតាមការិយាល័យបោះឆ្នោត ឬ ទម្រង់លទ្ធផលឆ្នោតបឋម ១១០២ (ទ.១១០២) ដោយផ្ទាល់ មកភ្នាក់ងារគណបក្សនយោបាយភ្លាមៗនៅក្រោយពីការរាប់សន្លឹកឆ្នោតរួចរាល់ឡើយ។ សេចក្តីជូនដំណឹងដដែលបានបញ្ជាក់ថា គ.ជ.ប បានតម្រូវឱ្យភ្នាក់ងារគណបក្សទៅយកទម្រង់លទ្ធផលឆ្នោតបឋម ឬ ទម្រង់ ១១០២ នៅគណៈកម្មការឃុំសង្កាត់រៀបចំការបោះឆ្នោត ដែលខុសប្លែកពីការបោះឆ្នោតនាពេលកន្លងមក។ ម្យ៉ាងវិញទៀត គណបក្សនេះបានលើកឡើងថា អ្វីដែលគណបក្សសម្ព័ន្ធដើម្បីប្រជាធិបតេយ្យធ្លាប់ស្នើទៅ គ.ជ.ប អំពីការកំណត់សុពលភាពសន្លឹកឆ្នោតបានការនោះ ក៏ គ.ជ.ប នៅតែបន្តអនុវត្តការទទួលស្គាល់សុពលភាពសន្លឹកឆ្នោតតាមនីតិវិធីចាស់ដដែល។
វីអូឌី នៅមិនទាន់អាចទាក់ទងតំណាងគណបក្សសម្ព័ន្ធដើម្បីប្រជាធិបតេយ្យ (LDP) ដើម្បីបញ្ជាក់ពីព័ត៌មាននេះបន្ថែមបាននៅឡើយទេ។
កាលពីថ្ងៃទី២៧ ខែមករា កន្លងទៅ គណបក្សនយោបាយចំនួន ៦ ក្នុងនោះរួមមាន គណបក្សប្រជាធិបតេយ្យមូលដ្ឋាន គណបក្សកម្ពុជានិយម គណបក្សកែទម្រង់កម្ពុជា គណបក្សកម្លាំងប្រជាធិបតេយ្យ គណបក្សបំណងពលរដ្ឋ និងគណបក្សភ្លើងទៀន ក៏បានធ្វើញត្តិរួមគ្នាទាមទារឲ្យ គ.ជ.ប រក្សាទុកទម្រង់កំណត់ហេតុនៃការរាប់សន្លឹកឆ្នោត (១១០២) ឲ្យនៅដដែល ដោយរក្សាខ្ទង់ព័ត៌មានអំពីតួលេខសំខាន់ៗ ដូចជា សន្លឹកឆ្នោតដែលទទួលបាន សន្លឹកឆ្នោតដែលមិនបានប្រើ សន្លឹកឆ្នោតដែលខូច និងមានការចែកជូនកំណត់ហេតុនៃការរាប់សន្លឹកឆ្នោតទម្រង់ ១១០២ ជូនភ្នាក់ងារគណបក្សនយោបាយដែលមានវត្តមាន នៅការិយាល័យរាប់សន្លឹកឆ្នោតដូចការបោះឆ្នោតមុនៗ។
សូមជម្រាបជូនថា នៅថ្ងៃដំបូងនៃការដាក់បញ្ជីបេក្ខភាពឈរឈ្មោះបោះឆ្នោតឃុំសង្កាត់កាលពីថ្ងៃសុក្រ ទី៤ ខែមីនា មានគណបក្សនយោបាយចំនួន ១១ ហើយបានដាក់បញ្ជីបេក្ខភាពដើម្បីចូលរួមប្រកួតប្រជែងសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០២២ខាងមុខ។
យោងប្រតិទិនដែលចេញដោយ គ.ជ.ប បញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់នេះ នឹងត្រូវធ្វើឡើងនៅថ្ងៃអាទិត្យទី៥ ខែមិថុនា ឆ្នាំ២០២២៕
