ក្រសួងសុខាភិបាល នៅព្រឹកថ្ងៃច័ន្ទសប្តាហ៍នេះបានព្រមានជាថ្មីឲ្យបញ្ឈប់ការប្រើប្រាស់ឱសថ Digest Gold គ្មានលេខបញ្ជិកា និងការហាមឃាត់ការចែកចាយ ឬ លក់ឱសថខាងលើ ចាប់ពីថ្ងៃនេះតទៅ។
យ៉ាងណាមិញ ក្រសួងបានតាមដាន និងពិនិត្យឃើញលើបណ្ដាញសង្គមហេ្វសប៊ុក មានគណនីឈ្មោះ LIZA SHOP-សម្រស់និងសុខភាព បានកំពុងផ្សព្វផ្សាយលក់ឳសថ Digest Gold នេះដោយគ្មានលេខទិដ្ឋាការ និងគ្មានច្បាប់អនុញ្ញាតឲ្យផ្សព្វផ្សាយពីក្រសួងឡើយ។
ក្រសួងនិងមានវិធានការតឹងរ៉ឹងទៅតាមច្បាប់ចំពោះម្ចាស់គណនីហេ្វសប៊ុក និង ជនពាក់ព័ន្ធដទៃទៀតដែលបាននឹងកំពុងផ្សព្វផ្សាយលក់ឳសថ Digest Gold ទៅតាមច្បាប់ស្ដីពីច្បាប់វិសោធន៍កម្មច្បាប់ ស្ដីពីការគ្រប់គ្រងឳសថ។
ជាមួយគ្នានេះដែល ក្រសួងស្នើសុំឲ្យប្រជាពលរដ្ឋទាំងអស់ជៀសវាងការខាតបង់ប្រាក់កាស និងប៉ះពាល់ដល់សុខភាពអ្នកប្រើប្រាស់ ត្រូវបញ្ឈប់ការប្រើប្រាស់ឳសថគ្មានទិដ្ឋាការ ឬ លេខបញ្ជិកា ពីក្រសួងសុខាភិបាលខាងលើនេះបន្ដទៀត ព្រោះផលិតផលនេះគ្មានប្រភពច្បាស់លាស់ ដែលមិនអាចធានាបាននូវគុណភាព និងសុវត្ថិភាពបានឡើយ។
គួរបញ្ជាក់ដែរថា ក្រសួងសុខាភិបាល មានច្បាប់ស្ដីពីការគ្រប់គ្រងឳសថ និងច្បាប់ស្ដីពីវិសោធនកម្មច្បាប់ស្ដីពីការគ្រប់គ្រងឳសថ ដូចនេះរាល់ការចរាចរឳសថ ឬផលិតផលដែលមានគុណភាពក្នុងការបង្ការ ឬ ព្យាបាលជម្ងឺគ្រប់ប្រភេទក្នុងប្រទេសកម្ពុជា ត្រូវមានលេខទិដ្ឋការ ឬបញ្ជិកា ពីក្រសួង ហើយរាល់ការផ្សព្វផ្សាយផលិតផលឳសថ ក៏ត្រូវមានការអនុញ្ញាតពីក្រួសងសុខាភិបាលផងដែរ៕