ស្ថាបនិក «គណបក្សបេះដូងជាតិ» អះអាងថា នឹងចូលបំភ្លឺនៅតុលាការតាមពេលវេលាកំណត់ ពាក់ព័ន្ធនឹងរឿងក្លែងបន្លំស្នាមមេដៃសមាជិក ដើម្បីយកទៅដាក់ស្នើសុំចុះបញ្ជីគណបក្សបេះដូងជាតិនៅក្រសួងមហាផ្ទៃ។
ស្ថាបនិក «គណបក្សបេះដូងជាតិ» លោក សៀម ភ្លុក មានប្រសាសន៍នៅថ្ងៃអាទិត្យនេះថា តុលាការបានចេញដីកាកោះរូបលោក ឱ្យចូលបំភ្លឺនៅសាលាដំបូងរាជធានីភ្នំពេញ នៅថ្ងៃទី២២ ខែមីនា ឆ្នាំ២០២២នេះ ពាក់ព័ន្ធនឹងរឿងក្លែងបន្លំស្នាមមេដៃសមាជិក ដើម្បីយកទៅដាក់ស្នើសុំចុះបញ្ជីគណបក្សបេះដូងជាតិនៅក្រសួងមហាផ្ទៃ។
ករណីនេះ លោក សៀម ភ្លុក អះអាងថា គាត់នឹងចូលបំភ្លឺតាមដីកាកោះ ពីព្រោះរូបលោកមិនបានធ្វើខុសដូចការចោទប្រកាន់នោះទេ។
លោកមានប្រសាសន៍៖ «បើគេឱ្យយើងចូលបំភ្លឺ យើងនឹងចូលបំភ្លឺ ពីព្រោះអី យើងអត់មានចេតនាធ្វើអ្វីខុសច្បាប់ទេ ឬក្លែងបន្លំស្នាមមេដៃទាំងអស់ហ្នឹងទេ។ ខ្ញុំគិតថា ក្រសួងមហាផ្ទៃនិងគណបក្សកាន់អំណាចគួរតែបោះបង់ ឬទម្លាក់ការចោទប្រកាន់ដែលមិនមានតម្លៃផ្លូវច្បាប់ និងប្រទេសជាតិ»។
គណបក្សបេះដូងជាតិ ដែលគេសង្ស័យថា លោក សម រង្ស៊ី ស្ថិតនៅពីក្រោយនៃការបង្កើតគណបក្សថ្មីថ្មោងមួយនេះ ត្រូវបានក្រសួងមហាផ្ទៃចោទប្រកាន់ថា «ក្លែងស្នាមមេដៃ និងមានចេតនាទុច្ចរិត»។
បើទោះជាបែបណា ស្ថាបនិកគណបក្សបេះដូងជាតិ លោក សៀម ភ្លុក បានបដិសេធជាញឹកញយថា ខ្លួនមិនបានប្រព្រឹត្តដូចការចោទប្រកាន់របស់ក្រសួងនោះឡើយ។ ផ្ទុយទៅវិញ លោកថា ដោយសារករណីនេះជារឿងនយោបាយ ហេតុនេះគេរកវិធីគ្រប់ល្បិចកលធ្វើយ៉ាងណាកុំឱ្យគណបក្សបេះដូងជាតិអាចលេចចេញជារូបរាងឡើង ដើម្បីឈានទៅរកការបោះឆ្នោតឆ្នាំ២០២២ និងឆ្នាំ២០២៣ ខាងមុខបាន។
កាលពីថ្ងៃទី១៦ ខែវិច្ឆិកា ឆ្នាំ២០២១ ក្រសួងមហាផ្ទៃបានសម្រេចបដិសេធចំពោះការស្នើសុំចុះឈ្មោះក្នុងបញ្ជីបង្កើតគណបក្សនយោបាយ របស់ស្ថាបនិកគណបក្សបេះដូងជាតិ លោក សៀម ភ្លុក។
បន្ទាប់មក នៅថ្ងៃទី២៦ ខែវិច្ឆិកា ឆ្នាំ២០២១ លោក សៀម ភ្លុក ក៏បានដាក់ពាក្យបណ្ដឹងទៅតុលាការកំពូល ដើម្បីតវ៉ាចំពោះករណីនេះ ប៉ុន្តែត្រូវបានតុលាការកំពូលសម្រេចបិទផ្លូវតវ៉ានៅចុងឆ្នាំ២០២១។
ក្រោយមក នៅថ្ងៃទី២ ខែមីនា ឆ្នាំ២០២២ ក្រសួងមហាផ្ទៃ ក៏បានប្រកាសលុបឈ្មោះ «គណបក្សបេះដូងជាតិ»របស់លោក សៀម ភ្លុក ចេញពីបញ្ជីគណបក្សនយោបាយតែម្តង៕