អាជ្ញាធរជាតិអប្សរា មិនគាំទ្រការយកទង់ជាតិខ្មែរមកច្នៃជាម៉ូដសម្លៀកបំពាក់ ព្រោះអាចជាការប្រមាថនិងប៉ះពាល់ដល់កិត្តិយសរបស់ប្រទេសជាតិទៅវិញ។
អ្នកនាំពាក្យអាជ្ញាធរជាតិអប្សរា លោក ឡុង កុសល ត្រូវបានស្រង់ប្រសាសន៍មកចុះផ្សាយលើទំព័រហ្វេសប៊ុករបស់អាជ្ញាធរជាតិអប្សរា កាលពីថ្ងៃចន្ទម្សិលមិញថា ទង់ជាតិត្រូវបានគោរព ដោយស្មារតីស្នេហាជាតិ ស្រឡាញ់ទឹកដី ជាតិមាតុភូមិ។ លោកបន្តថា ទង់ជាតិក៏ត្រូវបានផ្ដល់ជាមហាកិត្តិយសសម្រាប់វីរជន យុទ្ធជន និងយុទ្ធនារី ដែលបានពលីជីវិតនៅពេលបានចេញច្បាំងការពារជាតិ ទឹកដី ឬទៅបំពេញបេសកកម្មមនុស្សធម៌នៅក្រៅ ហើយជាតិតែងយកទង់ជាតិទៅគ្រងពីលើ ដើម្បីសម្ដែងការគោរពនិងដឹងគុណជាដើម។
អ្នកនាំពាក្យរូបនេះបន្តថា ការយករូបភាពទង់ជាតិខ្មែរមកច្នៃធ្វើជាម៉ូដសម្លៀកបំពាក់មិនសមរម្យនោះទេ ពីព្រោះនៅពេលដែលគេស្លៀកពាក់ហាក់បីដូចជាអង្គុយលើទង់តំណាងឱ្យជាតិទាំងមូល ឬក៏នៅពេលដែលសម្លៀកបំពាក់នោះប្រឡាក់ ពលរដ្ឋខ្លះមិនបានយកទៅបោកសម្អាតទេ តែបែរជាយកទៅទុកចោល ជាដើម ដែលអាចប្រមាថនិងធ្វើឱ្យប៉ះពាល់ដល់កិត្តិយសរបស់ប្រទេសជាតិ។
លោក ឡុង កុសល បញ្ជាក់ថា ប្រសិនបើចង់បង្ហាញឱ្យឃើញពីទឹកចិត្តស្រឡាញ់ជាតិពិតមែននោះ គឺនៅពេលមកទស្សនាតំបន់អង្គរដែលជាសម្បត្តិវប្បធម៌និងបេតិកភណ្ឌរបស់មនុស្សជាតិ ប្រជាពលរដ្ឋគួរជួយចូលរួមការពារបរិស្ថាន កុំបោះសំរាមចោលនៅក្នុងរមណីយដ្ឋានអង្គរ ត្រូវធ្វើដំណើរថ្មើរជើងចូលតំបន់អង្គរ កុំដើរជាន់ស្មៅដែលនាំឱ្យខូចសោភ័ណភាព កុំយកអាហារទៅទទួលទាននៅទីតាំងហាមឃាត់ក្នុងតំបន់បេតិកភណ្ឌ កុំទិញលក់ដី និងសង់សំណង់ខុសច្បាប់នៅក្នុងតំបន់ការពារ ដើម្បីកុំឱ្យខូចខាតសណ្ដាប់ធ្នាប់សាធារណៈនិងស្ទះផ្លូវជាដើម។
វីអូឌី មិនអាចសុំការបញ្ជាក់បន្ថែមពីលោក ឡុង កុសល បានទេ នៅរសៀលថ្ងៃអង្គារនេះ។
អាជីវករលក់សម្លៀកបំពាក់នៅតំបន់ប្រាសាទអង្គវត្ត សុំមិនបញ្ចេញឈ្មោះ និយាយថា គាត់គាំទ្រនឹងការលើកឡើងរបស់អាជ្ញាធរជាតិអប្សរា ដែលថា ការយករូបភាពទង់ជាតិខ្មែរមកច្នៃធ្វើជាម៉ូដសំលៀកបំពាក់ អាចប្រមាថនិងធ្វើឱ្យប៉ះពាល់ដល់កិត្តិយសរបស់ប្រទេសជាតិ។
ប៉ុន្តែអាជីវកររូបនោះស្នើទៅអាជ្ញាធរពាក់ព័ន្ធត្រូវទប់ស្កាត់កុំឱ្យមានអ្នកផលិតសម្លៀកបំពាក់ដាក់រូបអង្គរនៅពីលើ និងទប់ស្កាត់កុំឱ្យក្រុមហ៊ុនស្រាបៀរអង្គរយករូបអង្គរវត្តដាក់លើកំប៉ុង ដើម្បីបង្ហាញពីតម្លាភាព កុំឱ្យប៉ះពាល់កិត្តិយសរបស់ជាតិដូចគ្នាផងដែរ ។
អាជីវកររូបនោះនិយាយថា៖ «បើគាត់ [អាជ្ញាធរអប្សរា] លើកហេតុផលអ៊ីចឹង ចុះបើអាវយឺតគេដាក់រូបប្រាសាទអង្គរវត្តនៅតាមអាវយឺត ដែលគេដាក់លក់ដែរនោះ ប៉ុន្មានឆ្នាំហើយ ម៉េចមិនឃើញបិទ? ចុះបើស្រាបៀរអង្គរ គេយកកំប៉ុងទៅជាន់ ម៉េចមិនថាផង? ហើយយើង [សម្លៀកបំពាក់ទង់ជាតិខ្មែរ] នេះ មិនឃើញគេយកស្បៃយកទៅជាន់បន្តិចអីផង…ពេលអ៊ីចឹងវាអត់សមហេតុផល បើជ្រុលអត់ឱ្យ អត់ទាំងអស់គ្នា»។
ចំណែកប្រធានវិទ្យាស្ថានប្រជាធិបតេយ្យកម្ពុជា លោកបណ្ឌិត ប៉ា ចន្ទរឿន ក៏បានគាំទ្រនឹងការលើកឡើងរបស់អាជ្ញាធរជាតិអប្សរាដែរ ប៉ុន្តែលោកជំរុញទៅរដ្ឋាភិបាល និងស្ថាប័នពាក់ព័ន្ធ ត្រូវបង្កើតគោលការណ៍ ឬពិធីសារឱ្យបានច្បាស់លាស់ជុំវិញការប្រើប្រាស់ទង់ជាតិ ដើម្បីកុំឱ្យពលរដ្ឋយកប្រើប្រាស់ខុស នាំឱ្យប៉ះពាល់ដល់អត្តសញ្ញាណរបស់ជាតិ។
លោកមានប្រសាសន៍ថា៖ «អាជ្ញាធរពាក់ព័ន្ធ ជាពិសេសខាងរដ្ឋសភា ត្រូវបង្កើតគោលការណ៍ ឬពិធីសារនៃការប្រើប្រាស់ទង់ជាតិដែលជានិមិត្តសញ្ញាណរបស់ជាតិឱ្យបានលម្អិតទៅ ហើយធ្វើការផ្សព្វផ្សាយជូនប្រជាពលរដ្ឋឱ្យបានដឹង»។
លោកមានប្រសាសន៍បន្ថែមថា៖ «ទីពីរ គួរតែពិចារណាដករូបប្រាសាទអង្គរវត្តពីកំប៉ុងស្រាបៀរ ឬផលិតផលដទៃទៀត ពីព្រោះកាលណាយើងយកនិមិត្តរូបរបស់ជាតិទៅដាក់ធ្វើជាឡូហ្គោ ឬក៏ផ្លាកសញ្ញា ឬក៏ផលិតផលរបស់ឯកជន វាអត់ត្រូវទេ វាធ្វើឱ្យប៉ះពាល់ដល់គុណតម្លៃរបស់ជាតិ ហើយក៏មានទំនាស់ផលប្រយោជន៍នៅក្នុងហ្នឹងផងដែរ»៕
