គណបក្សភ្លើងទៀន ចោទប្រកាន់អាជ្ញាធរនៅតាមមូលដ្ឋានមកពីគណបក្សប្រជាជនកម្ពុជានៅតាមបណ្ដារាជធានី-ខេត្តមួយចំនួនថា នៅបន្តគំរាមកំហែងនិងបំភិតបំភ័យបេក្ខជនដែលឈរឈ្មោះឱ្យគណបក្សក្រៅរដ្ឋាភិបាលមួយនេះក្រោមរូបភាពផ្សេងៗ។
លោក ថាច់ សេដ្ឋា អ្នកនាំពាក្យគណបក្សភ្លើងទៀន បានប្រាប់ វីអូឌី នៅថ្ងៃពុធនេះថា មានបេក្ខជនដែលឈរឈ្មោះជាមេឃុំ-ចៅសង្កាត់ឱ្យគណបក្សក្រៅរដ្ឋាភិបាលមួយនេះ នៅតែត្រូវបានអាជ្ញាធរមូលដ្ឋានបន្តគំរាមកំហែងនៅឡើយ។ លោកបន្តថា រូបភាពនៃការយាយីនេះកើតឡើងច្រើនជាងគេ ក្នុងពេលបច្ចុប្បន្ន គឺទីក្រុងភ្នំពេញ។ ក្រៅពីនេះមានខេត្តបាត់ដំបង ពោធិ៍សាត់ ប៉ៃលិន និងត្បូងឃ្មុំ ជាដើម។
លោកបន្តថា៖ «ភ្នំពេញកាន់ច្រើនជាងគេ មានសង្កាត់នៅខាងទួលគោក មានសង្កាត់ផ្សារដេប៉ូ១ មានខាងទឹកល្អក់ មានខាងដេប៉ូ២ និងផ្សារចាស់។ តាមពិតទៅ នៅមានហូរហែច្រើនណាស់ យើងពិបាករៀបរាប់ បើរៀបរាប់ទៅ វាច្រើនគួរសម។ ប៉ុន្តែបើទោះជាយ៉ាងណា ពួកយើងនៅតែជម្នះ។ មានអ្នកខ្លះខ្លាច ហើយក៏មានអ្នកខ្លះមិនខ្លាចទេ។ អ្នកណាខ្លាច យើងរកអ្នកបំពេញបន្ថែមទៅ»។
យ៉ាងនេះក្ដី លោក សុខ ឥសាន អ្នកនាំពាក្យគណបក្សប្រជាជនកម្ពុជា តែងបដិសេធថា មិនមានរូបភាពនៃការគំរាមកំហែងដូចការលើកឡើងរបស់គណបក្សនយោបាយមួយចំនួនទេ។ លោកបន្តថា ការព្យាយាមបញ្ចេញព័ត៌មានអំពីរឿងរសើបនេះ វាតែងកើតឡើងនៅមុនថ្ងៃបោះឆ្នោតប៉ុណ្ណោះ។ មិនតែប៉ុណ្ណោះ នេះជាវិធីសាស្រ្ត ដើម្បីធ្វើយ៉ាងណាឱ្យអ្នកបោះឆ្នោតបាត់បង់ជំនឿចិត្តលើគណបក្សកាន់អំណាចតែម្ដង។
លោកបន្តថា៖ «ឥលូវម្នាក់ៗសុទ្ធតែមានទូរសព្ទនៅនឹងហោប៉ៅរៀងៗខ្លួនហើយ។ ដូច្នេះ បើមានបញ្ហាអី អ្នកណាគំរាមកំហែងអី ថតឱ្យជាប់មក ហើយដាក់ទៅ គ.ជ.ប ទៅ។ អាហ្នឹងគឺថាគេនឹងដោះស្រាយជូនហើយ។ វាអត់មានករណីហ្នឹងផង រហូតមកដល់ថ្ងៃនេះហើយ ខ្ញុំអត់មានឮព័ត៌មាន ទើបតែឮប្អូននិយាយមិញនេះឯង»។
យ៉ាងនេះក្ដី លោក ថាច់ សេដ្ឋា ឱ្យដឹងថា មកដល់ពេលនេះ គណបក្សនៅមិនទាន់ទទួលបានពីតួលេខពិតប្រាកដអំពីបេក្ខជនឈរឈ្មោះដែលត្រូវបានគេគំរាមកំហែង និងអ្នកដែលដើរចេញព្រោះតែការបំភិតបំភ័យ ហើយត្រូវដាក់អ្នកថ្មីជំនួសនៅឡើយទេ។
រដ្ឋធម្មនុញ្ញដែលជាច្បាប់កំពូល មាត្រា៤២ កំណត់ថា ប្រជាពលរដ្ឋខ្មែរមានសិទ្ធិបង្កើតសមាគម និងគណបក្សនយោបាយ ហើយសិទ្ធិនេះត្រូវបានកំណត់និងធានាដោយច្បាប់។ ក្រៅពីនេះ ច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់វិញ ក៏ពុំមានមាត្រាណាមួយដែលបើកផ្លូវឱ្យមានការដកហូតសិទ្ធិបេក្ខជនដែលឈរឈ្មោះឱ្យគណបក្សនយោបាយណាមួយដែរ ប្រសិនបើមិនខុសលក្ខន្តិកៈដែលកំណត់ដោយគណៈកម្មការឃុំ-សង្កាត់រៀបចំការបោះឆ្នោត។
មាត្រា៣៦ នៃច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ ហាមឃាត់មិនឱ្យឈរឈ្មោះជាបេក្ខជនមេឃុំ-ចៅសង្កាត់ទៅបាន លើកលែងតែសមាជិករដ្ឋសភា ព្រឹទ្ធសភា សមាជិកក្រុមប្រឹក្សាធម្មនុញ្ញ សមាជិកឧត្ដមក្រុមប្រឹក្សានៃអង្គច្រៅក្រម សមាជិករដ្ឋាភិបាល និងចៅក្រមជាដើម។
បើទោះជាបែបណា ក្រៅពីការគំរាមកំហែងចំពោះបេក្ខជនដែលឈរឈ្មោះហើយ នៅមានស្លាកសញ្ញាគណបក្សនយោបាយនៅតាមបណ្ដារាជធានី ខេត្តមួយចំនួនក៏ត្រូវរងការយាយីដែរ។ ការបំផ្លាញផ្លាកគណបក្សនយោបាយនេះកើតឡើងទាំងមុននិងក្នុងពេលយុទ្ធនាការនៃការចុះបញ្ជីបេក្ខជនមេឃុំ-ចៅសង្កាត់។
ស្លាកគណបក្សនយោបាយដែលគេសង្កេតឃើញមានការកាប់បំផ្លាញឬផ្ដួលរំលំដោយជនមិនស្គាល់អត្តសញ្ញាណ ភាគច្រើនគឺគណបក្សភ្លើងទៀន និងគណបក្សប្រជាធិបតេយ្យមូលដ្ឋាន។
ទាក់ទិនបញ្ហនេះ នាយកប្រតិបត្តិនៃអង្គការនិចហ្វិក លោក សំ គន្ធាមី ចាត់ទុកថា អ្នកដែលគំរាមកំហែងនេះ គឺកំពុងតែអនុវត្តផ្ទុយពីស្មារតីនៃច្បាប់យ៉ាងធ្ងន់ធ្ងរ។
មួយវិញទៀត បេក្ខជនដែលឈរឈ្មោះតំណាងឱ្យគណបក្សនយោបាយណាមួយ វាជាការអនុវត្តស្របទៅតាមនីតិវិធី ដូចមានកំណត់នៅក្នុងច្បាប់ជាតិផង និងអន្តរជាតិផង។ បើតាមលោក សំ គន្ធាមី ផ្ទុយទៅវិញ អាជ្ញាធរមូលដ្ឋានទេដែលជាអ្នកខុសច្បាប់ ព្រោះនេះជាការបិទសិទ្ធិសេរីភាពនិងសិទ្ធិនយោបាយរបស់នីតិបុគ្គលដែលត្រូវបានធានាដោយច្បាប់។
លោកបន្តថា៖ «ឈរឈ្មោះគណបក្សនយោបាយណាមួយក៏ដោយ គាត់ប្រើសិទ្ធិនយោបាយរបស់គាត់ គាត់ឈរឈ្មោះឱ្យគេបោះឆ្នោតណា អាហ្នឹងគឺសិទ្ធិមានចែងក្នុងច្បាប់រដ្ឋធម្មនុញ្ញ និងកតិកាសញ្ញាស្អីទាំងអស់ ហើយច្បាប់អន្តរជាតិក៏មានដែរ។ អ្នកគំរាមកំហែងគេ ខុសច្បាប់ហើយ មិនអាចទៅគំរាមគេមិនឱ្យឈរឈ្មោះស្អីៗ ឬរារាំងគេអ៊ីចឹងទេ។ វារំលោភសិទ្ធិនយោបាយរបស់បុគ្គលម្នាក់ៗហ្នឹងហើយ»។
ស្ថាប័នជាតិរៀបចំការបោះឆ្នោត ឬ គ.ជ.ប បានចេញរបាយការណ៍បណ្ដោះអាសន្នរបស់ខ្លួនកាលពីថ្ងៃទី៨ ខែមីនា អំពីគណបក្សនយោបាយដែលបានចុះបញ្ជីបេក្ខភាពមេឃុំ-ចៅសង្កាត់មានចំនួន១៧គណបក្សនយោបាយ។ តាមរយៈសេចក្ដីប្រកាសនេះ គណៈកម្មការឃុំសង្កាត់រៀបចំការបោះឆ្នោត សម្រេចយល់ព្រមឬបដិសេធលើពាក្យសុំនោះក្នុងរយៈពេល៧ថ្ងៃយ៉ាងយូរ បន្ទាប់ពីបានទទួលពាក្យសុំចុះបញ្ជីបេក្ខជននៃគណបក្សនយោបាយ៕