មន្ដ្រីជំនាញបានចុះបង្រាប ទីតាំលួចនាំចូលឱសថបុរាណចិន ម៉ាស N95 និងគ្រឿងបរិក្ខារពេទ្យក្លែងក្លាយខុសច្បាប់ជាច្រើន ដែលពុំមានលេខបញ្ជិកានិងគ្មានការអនុញ្ញាតពីក្រសួងពាក់ព័ន្ធ។
សេចក្តីប្រកាសព័ត៌មានរបស់គណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ កាលពីម្សិលមិញបានឱ្យដឹងថា ក្រសួងមួយនេះ និងក្រសួង-ស្ថាប័នពាក់ព័ន្ទផ្សេងទៀត បានប្រតិបត្តិការបង្រ្កាប ទីតាំងនាំចូល ស្ដុកទុក ចែកចាយគ្រឿងបរិក្ខារពេទ្យ និងឱសថក្លែងក្លាយ មួយកន្លែងដែលមានទីតាំងស្ថិតនៅផ្ទះលេខ១៥០៦ វិថីបឹងទទឹងថ្ងៃ ភូមិដើមគ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
ប្រភពដដែលបន្តថា ក្នុងប្រតិបតិ្តការបង្រ្កបទីតាំងនេះ កម្លាំងចម្រុះរបស់គណៈកម្មាធិការ បានរកឃើញ ឱសថបុរាណចិន LIANHUA QINGWEN JIONAN ក្លែងក្លាយ ពុំមានចុះលេខប្រវេទន៍ និងលេខបញ្ជិកាពីក្រសួង និងផលិតផលម៉ាសម៉ាក N95 ក្លែងក្លាយ ដែលមានម៉ាស៊ីនកាំរស្មីបាញ់ម៉ាកសញ្ញាចំនួន ០២គ្រឿង និងគ្រឿងបរិក្ខារពេទ្យ និងឱសថក្លែងក្លាយផ្សេងៗទៀត ដែលពុំមានច្បាប់អនុញ្ញាពីក្រសួងពាក់ព័ន្ធ។
សេចក្តីប្រកាសព័ត៌មានដដែលបញ្ជាក់ថា ទីតាំងដែលសមត្ថកិច្ចបង្ក្រាបនោះត្រូវបានសម្រេចឱ្យបិទ ដោយផ្អាកអាជីវកម្មជាបណ្ដោះអាសន្នតាមការសម្រេចរបស់ព្រះរាជអាជ្ញា ខណៈជនសង្ស័យចំនួនម្នាក់ ត្រូវបានកសាងសំណុំរឿងបញ្ជូននទៅកាន់តុលាការផងដែរ។
គណៈកម្មាធិការប្រយុទ្ធប្រឆាំងផលិតផលក្លែងក្លាយឱ្យដឹងថា អំឡុងពេលការរីករាលដាលជំងឺកូវីដ-១៩ មានជនខិលខូចមួយចំនួន ការនាំចូល ស្ដុកទុក ចែកចាយគ្រឿងបរិក្ខារពេទ្យនិងឱសថក្លែងក្លាយ នៅលើទីផ្សារកម្ពុជាដែលបណ្តាលឱ្យមានហានិភ័យដល់សុខភាពប្រជាពលរដ្ឋ។
យ៉ាងណា គណៈកម្មាធិការដដែលនេះប្តេជ្ញាថា នឹងបន្តស្រាវជ្រាវលើករណីទាំងនេះបន្ថែមទៀត ដើម្បីចាត់វិធានការទៅលើជនល្មើសទៅតាមផ្លូវច្បាប់៕