រដ្ឋមន្រ្តីក្រសួងមហាផ្ទៃ លោក ស ខេង បានថ្លែងដោយរម្លឹកអំពីភាពសម្បូរហូរហៀនៃព្រៃឈើនៅកម្ពុជាកាលពីអតីតកាល ខណៈបច្ចុប្បន្ន លោកថា ព្រៃឈើ ដែលជាធនធានធម្មជាតិ នៅសល់តិចតួចប៉ុណ្ណោះ ដោយរកតែព្រៃសម្រាប់បាំងថ្ងៃមិនបាន។
ការថ្លែងរបស់រដ្ឋមន្ត្រីក្រសួងមហាផ្ទៃ បានធ្វើឡើងក្នុងពីធីសន្និបាតបូកសរុបលទ្ធផលការងារឆ្នាំ២០២១របស់ខេត្តបាត់ដំបង កាលពីព្រឹកថ្ងៃទី១០ ខែមីនា ឆ្នាំ២០២២។
លោក ស ខេង បានថ្លែងថា កាលពីដើមខេត្តបាត់ដំបង និងបណ្តាស្រុកមួយចំនួននៅតាមព្រំដែន សុទ្ធតែព្រៃឈើ ប៉ុន្តែមកដល់បច្ចុប្បន្ន លោកថា ព្រៃឈើ ដែលជាធនធានធម្មជាតិ នៅសល់តិចតួចប៉ុណ្ណោះ។
លោកបន្តថា ព្រៃឈើចាប់ពីស្រុកសំឡូតខេត្តបាត់ដំបង រហូតទៅដល់ព្រំប្រទល់ខេត្តកោះកុង កំពុងរងការទន្រ្ទាន។ ករណីនេះ លោកបានបញ្ជាទៅអាជ្ញាធរពាក់ព័ន្ធ ចុះទៅពិនិត្យមើលការទន្ទ្រាន និងការកាប់បំផ្លាញព្រៃឈើក្នុងស្រុកសំឡូត ក្នុងនោះ លោកណែនាំអាជ្ញាធរស្នើសុំឧទ្ធម្ភាគចក្រ (Helicopter) ណាមួយ ឬយន្តហោះគ្មានមនុស្សបើក (Drone) ដើម្បីថតមើលពីខាងលើក្នុងតំបន់ព្រៃឈើ ដែលរងការទន្ទ្រាននោះ។
ជាមួយគ្នានោះ លោក ស ខេង ក៏បានរម្លឹកពីភាពសម្បូរហូរហៀនៃព្រៃឈើនៅកម្ពុជា កាលពីអតីតកាល។ លោកថា ព្រៃឈើពីមុនមើលមេឃមិនឃើញ មើលថ្ងៃមិនឃើញទេ តែឥឡូវនេះ រកន្លែងជ្រកបាំងថ្ងៃអត់បានដែរ។
លោកថា៖ «ធនធានធម្មជាតិឥឡូវសល់តិចតួចទេ។ យើងដឹងហើយបាត់ដំបង់មួយប៉ែក ហើយសុ្រក ថ្មីសុទ្ធតែព្រៃ ទោះមកទល់នឹងឆ្នាំ៩០ ជាងហើយ ក៏នៅព្រៃច្រើនដែរ ប៉ុន្តែឥឡូវអត់ទេ។ ពីមុន មើលមេឃមិនឃើញទេ មើលថ្ងៃមិនឃើញទេ ប៉ុន្តែឥឡូវរកកន្លែងជ្រកបាំងថ្ងៃអត់បាន។ នៅសល់ខ្លះមួយជួរសំឡូត ទៅជាប់នឹងកោះកុង ប៉ុន្តែកំពុងតែមានការទន្ទ្រាន»។
មន្រ្តីសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) លោក អូត ឡាទីន បានចាត់ទុកថា ការលើកឡើងរបស់រដ្ឋមន្ត្រីក្រសួងមហាផ្ទៃ ហាក់ផ្ទុយពីក្រសួងបរិស្ថានដែលតែងតែច្រានចោលរបាយការណ៍របស់អង្គការសង្គមស៊ីវិល និងសហគមន៍ដែលរកឃើញពីបទល្មើសធនធានធម្មជាតិ។ យ៉ាងណា លោកចាត់ទុកប្រសាសន៍រដ្ឋមន្ត្រីក្រសួងមហាផ្ទៃ កំពុងបង្ហាញក្ដីបារម្ភអំពីវិនាសសកម្មព្រៃឈើនៅកម្ពុជា។ មួយវិញទៀត លោកថា ការថ្លែងរបស់លោក ស ខេង ក៏ជាការរំលឹកទៅអាជ្ញាធរឱ្យពង្រឹងការទប់ស្កាត់ផងដែរ។
លោកថា៖ «ខ្ញុំឆ្ងល់ក្រសួងបរិស្ថានដែលធ្វើកិច្ចការងារទៅលើវិស័យព្រៃឈើនៅកម្ពុជា ហេតុអ្វីបានជាក្រសួងបរិស្ថានមើលមិនឃើញពីវិនាសសកម្មព្រៃឈើនៅក្នុងប្រទេសកម្ពុជា បែរជារដ្ឋមន្ត្រីក្រសួងមហាផ្ទៃគាត់អ្នកមើលឃើញអំពីបញ្ហាវិនាសកម្មព្រៃឈើនៅក្នុងប្រទេសកម្ពុជាទៅវិញ។ អ៊ីចឹងពួកគាត់ធ្វើការរបៀបម៉េចបានជាពួកគាត់មិនដឹងបញ្ហាហ្នឹង»។
លោក អូត ឡាទីន បន្តថា បើសិនជារដ្ឋាភិបាលមើលឃើញអំពីវិនាសកម្មព្រៃឈើហើយ ប៉ុន្តែមិនមានវិធានការតឹងរឹងទប់ស្កាត់ទេ លោកថា ព្រៃឈើនៅកម្ពុជានឹងបាត់បង់អស់ឆាប់ៗ ខណៈសង្គមស៊ីវិល និងសហគមន៍ដែលសកម្មក្នុងការការពារធនធានធម្មជាតិនៅតែត្រូវបានក្រសួងបរិស្ថាន និងអាជ្ញាធររារាំងក្នុងការចុះល្បាតនោះ។
យោងតាមរបាយការណ៍របស់ក្រសួងបរិស្ថានកាលពីខែកញ្ញា ឆ្នាំ២០២១ថា នៅក្នុងឆ្នាំ១៩៦៥ ផ្ទៃដីកម្ពុជាចំនួន ៧៣% គ្របដណ្តប់ដោយព្រៃឈើ ប៉ុន្តែមកដល់ត្រឹមឆ្នាំ២០១៨ ព្រៃឈើបានថយមកនៅសល់ក្រោម ៤៧% ប៉ុណ្ណោះ។ ដោយឡែក បើតាមរបាយការណ៍របស់អង្គការលើកលែងទោសអន្តរជាតិ (Amnesty International) ចេញផ្សាយកាលពីថ្ងៃទី២៨ ខែមករា ឆ្នាំ២០២២នេះវិញ បានបង្ហាញថា ក្នុងឆ្នាំ២០២១ ព្រៃឈើលើផ្ទៃដីកម្ពុជាជាង ៦ ០០០ហិកតា បានរងនូវការកាប់បំផ្លាញនៅតំបន់ការពារព្រៃឡង់ និងព្រៃព្រះរកា ដោយមានការទទួលសំណូក និងការប្រព្រឹត្តអំពើពុករលួយរបស់អាជ្ញាធរពាក់ព័ន្ធ៕
