តំណាងគណបក្សភ្លើងទៀនប្រចាំខេត្តសៀមរាប ចោទមេឃុំក្រឡាញ់ មកពីគណបក្សប្រជាជនកម្ពុជា ថាបានបិទសិទ្ធិសេរីភាពគណបក្សក្រៅរដ្ឋាភិបាលមួយនេះ មិនឱ្យលើកផ្លាកគណបក្សក្បែរផ្លូវសាធារណៈ។
ប្រធានក្រុមការងារគណបក្សភ្លើងទៀនប្រចាំខេត្តសៀមរាប លោក សុខ គឹមសេង បានប្រាប់ វីអូឌី នៅថ្ងៃចន្ទនេះថា កាលពីថ្ងៃទី១២ ខែមីនា គណបក្សភ្លើងទៀន បានសម្រេចចិត្តលើកផ្លាកគណបក្សនៅមុខដីឡូត៍មួយកន្លែងដែលជាកម្មសិទ្ធិរបស់សកម្មជនគណបក្សភ្លើងទៀន ស្ថិតនៅជាប់ផ្លូវជាតិលេខ៦អា ក្នុងឃុំក្រឡាញ់ ស្រុកក្រឡាញ់ ខេត្តសៀមរាប។
លោកបន្តថា នៅពេលដែលលើកផ្លាកនោះ ស្រាប់តែមេឃុំក្រឡាញ់មកពីគណបក្សកាន់អំណាច លោក ដោ វឿ បានចុះទៅរារាំង ដោយថា ពួកគេលើកផ្លាកខុសទីតាំង។
លោកបន្តថា៖ «គាត់[មេឃុំ]តម្រូវឱ្យយើងដាក់ចូលក្នុងចូលអ៊ីចឹងទៅ។ ប៉ុន្តែរូបភាពជាក់ស្ដែង យើងដាក់ចូលក្នុងចំណីផ្លូវទេ ហើយឆ្ងាយពីផ្លូវ»។
លោក សុខ គឹមសេង បានចាត់ទុកការរារាំងលើកផ្លាកគណបក្សនេះ ថាជាចេតនានយោបាយ បង្កឡើងដោយអាជ្ញាធរនៅថ្នាក់មូលដ្ឋាន ដែលមានបំណងមិនចង់ឱ្យគណបក្សភ្លើងទៀនមានឱកាសក្នុងការចូលរួមការបោះឆ្នោតឃុំសង្កាត់ខាងមុខនេះ។
បើតាមលោក សុខ គឹមសេង ការលើកផ្លាកគណបក្សនយោបាយនៅតាមទីសាធារណៈនេះ មិនមែនមានតែគណបក្សភ្លើងទៀនមួយទេ ពោលគឺមានគណបក្សនយោបាយច្រើនណាស់ រួមទាំងគណបក្សប្រជាជនកម្ពុជាខ្លួនឯងផង។
ឆ្លើយតបចំពោះការចោទប្រកាន់នេះ មេឃុំក្រឡាញ់ លោក ដោ វឿ ទទួលស្គាល់ថា អាជ្ញាធរមូលដ្ឋានពិតជាបានចុះទៅហាមឃាត់ការលើកផ្លាកគណបក្សនេះមែន។ ប៉ុន្តែលោកថា បញ្ហានេះ ភាគីទាំងពីរបានដោះស្រាយបញ្ចប់ការខ្វែងគំនិតគ្នារួចអស់ហើយ មកដល់ពេលនេះ។
បើតាមលោក ដោ វឿ នេះមិនមែនជាការរឹតត្បិតសេរីភាពនៃការធ្វើសកម្មភាពនយោបាយអ្វីនោះទេ ប៉ុន្តែគ្រាន់តែមានការយល់ច្រឡំគ្នាបន្តិចបន្តួចតែប៉ុណ្ណោះ។
លោកបន្តថា៖ «ខ្ញុំមិនមែនចង្អៀតចង្អល់អីទេ។ ក្រោយមក គាត់បានសួរខ្ញុំលើករបៀបម៉េច រួចខ្ញុំថាបើលើករួចទៅហើយ មិនដឹងធ្វើម៉េច! ខ្ញុំក៏ហីទៅ មិនដឹងធ្វើម៉េច។ ខ្ញុំមិនមែនថា វាប្រកាន់អញ្ចេះអញ្ចុះអីទេ»។
តាមរយៈវីដេអូឃ្លីបដែលវីអូឌីទើបទទួលបាននៅថ្ងៃចន្ទនេះ បង្ហាញពីសកម្មភាពនៃការចុះទៅរារាំងការលើកផ្លាកគណបក្សរបស់មេឃុំ លោក ដោ វឿ អមជាមួយកម្លាំងប្រជាការពារភូមិផង។ នៅក្នុងវីដេអូឃ្លីប ភាគីទាំងពីរបានប្រកែកគ្នារកត្រូវរៀងខ្លួន។
នាយកប្រតិបត្តិអង្គការនិចហ្វិក លោក សំ គន្ធាមី បញ្ជាក់ថា ការធ្វើដូច្នេះរបស់អាជ្ញាធរមូលដ្ឋាន បង្ហាញពីភាពមិនទាន់មានភាពចាស់ទុំខាងផ្នែកនយោបាយ។ មួយវិញទៀត លោកថា នេះជាការឆ្លុះបញ្ចាំងពីការរំលោភអំណាចធ្ងន់ធ្ងរ នៅមុនថ្ងៃបោះឆ្នោតមកដល់។
បើតាមលោក សំ គន្ធាមី ប្រសិនបើសកម្មភាពនៅតែបន្តរបៀបនេះទៀតនៅតាមមូលដ្ឋាន នោះនឹងជំរុញឱ្យមានការរិះគន់កាន់តែច្រើនអំពីដំណើរការនៃការបោះឆ្នោតនាពេលខាងមុខនេះ។
លោកបន្តថា៖ «អត់ទេ! គេអនុញ្ញាតឱ្យដាក់ផ្លាកគណបក្សនយោបាយហ្នឹងនៅតំបន់សាធារណៈ តាមមាត់ថ្នល់មាត់អីហ្នឹង។ យើងឃ្លាំមើល ឃើញគណបក្សប្រជាជនកម្ពុជា គេដាក់បានគ្រប់តែគ្នាហ្នឹង! ហើយអ៊ិលឌីភីអី គេដាក់បានគ្រប់តែគ្នាតើ! នេះយើងមើលក៏យើងដឹងដែរ។ វាមានទៅប៉ះពាល់អី ដូចយើងឃើញស្រាប់ហើយ គេដាក់គ្រប់តែគណបក្សហ្នឹង រឿងលើកផ្លាកនេះ»។
តំណាងគណបក្សភ្លើងទៀនប្រចាំខេត្តសៀមរាប លោក សុខ គឹមសេង បញ្ជាក់ថា គណបក្សក្រៅរដ្ឋាភិបាលមួយនេះបានដាក់បញ្ជីបេក្ខភាពមេឃុំ-ចៅសង្កាត់ ដែលបម្រើឱ្យការបោះឆ្នោតឃុំសង្កាត់ខាងមុខនេះ បានទាំង១០០ឃុំសង្កាត់ ក្នុងចំណោមឃុំសង្កាត់សរុបនៅទូទាំងខេត្តសៀមរាប។ ប៉ុន្តែ លោកអះអាងថា ថ្វីត្បិតបញ្ជីបេក្ខភាពមេឃុំ-ចៅសង្កាត់ ត្រូវបានស្ថាប័នជាតិរៀបចំការបោះឆ្នោតទទួលស្គាល់ជាផ្លូវការហើយក្ដី ក៏រូបភាពនៃការគំរាមកំហែង បំភិតបំភ័យ និងទិញទឹកចិត្តបេក្ខភាពដែលឈរឈ្មោះឱ្យគណបក្សភ្លើងទៀន នៅតែបន្តកើតមានជារៀងរាល់ថ្ងៃ។
ជុំវិញការលើកផ្លាកគណបក្សនយោបាយនៅតាមទីសាធារណៈឬកន្លែងឯកជននេះ គណៈកម្មាធិការជាតិរៀបចំការបោះឆ្នោតបានជូនដំណឹងគ្រប់អាណត្តិនៃការបោះឆ្នោត ឱ្យសហការគ្នារវាងអាជ្ញាធរមូលដ្ឋាន និងសាម៉ីគណបក្ស ដើម្បីចៀសវាងបាតុភាពណាមួយកើតឡើង ដែលនាំឱ្យមានជម្លោះនយោបាយ។ បើតាមតាមរយៈសេចក្ដីជូនដំណឹងរបស់ គ.ជ.ប គណបក្សនយោបាយនីមួយៗអាចមានសិទ្ធិលើកផ្លាកគណបក្សរបស់ខ្លួនបាន ទាំងនៅទីសាធារណៈ និងទីកន្លែងឯកជន ទៅតាមលំដាប់មុន-ក្រោយ ឬមានការយល់ព្រមពីម្ចាស់ទីតាំង៕
