ក្រសួងសុខាភិបាល ឱ្យដឹងថា មានមនុស្សជិត១៤០នាក់ទៀតបានឆ្លងជំងឺកូវីដ-១៩បំប្លែងថ្មីប្រភេទ អូមីក្រុង និងមានអ្នកស្លាប់ម្នាក់ដោយសារជំងឺនេះ។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១៥ ខែមីនា ឆ្នាំ២០២២ បានឱ្យដឹងថា ក្រសួងបានរកឃើញករណីឆ្លងជំងឺកូវីដ-១៩ថ្មី ចំនួន១៣៩នាក់ទៀត ដែលសុទ្ធតែជាប្រភេទអូមីក្រុងទាំងអស់ ក្នុងនោះមានករណីនាំចូលពីក្រៅប្រទេសចំនួន២៤នាក់ និងឆ្លងក្នុងសហគមន៍១១៥នាក់។ ចំណែក អ្នកជាសះស្បើយថ្មីវិញ ក្រសួងថាមានចំនួន៤២៥នាក់។
បើតាមក្រសួងសុខាភិបាល គិតត្រឹមព្រឹកថ្ងៃអង្គារនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៤ ៣៥២នាក់ ក្នុងនោះ អ្នកជំងឺព្យាបាលជាសះស្បើយចំនួន១២៩ ៧១៧នាក់ និងអ្នកស្លាប់ចំនួន៣ ០៤៨នាក់។ ចំណែកករណីឆ្លងអូមីក្រុងក្នុងសហគមន៍វិញ ក្រសួងថា គិតមកដល់ពេលនេះបានកើនដល់១២ ៦៦២នាក់៕
