បុគ្គលិក និងអតីតបុគ្គលិកសមាគមអាដហុកចំនួន៥នាក់ ប្រកាសពីការចូលរួមសវនាការសាលាឧទ្ធរណ៍រាជធានីភ្នំពេញ ទៅតាមដីកាកោះ នៅថ្ងៃទី២៥ ខែមីនា ឆ្នាំ២០២២ ក្នុងសំណុំរឿងសូកប៉ាន់សាក្សី។
សេចក្ដីប្រកាសព័ត៌មានរបស់សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ហៅកាត់ថា អាដហុក នៅថ្ងៃអង្គារនេះ បានឱ្យដឹងថា បុគ្គលិកសមាគមអាដហុកចំនួន៣រូប រួមមាន លោក នី សុខា លោក យី សុខសាន្ត និងលោកស្រី លឹម មុន្នី និងអតីតបុគ្គលិកអាដហុក២រូបទៀត គឺលោក ណៃ វង់ដា និងលោក នី ចរិយា នឹងចូលរួមសវនាការសាលាឧទ្ធរណ៍រាជធានីភ្នំពេញ នៅថ្ងៃទី២៥ ខែមីនា ឆ្នាំ២០២២ របស់មហាអយ្យការអមសាលាឧទ្ធរណ៍រាជធានីភ្នំពេញ ដើម្បីជំនុំជម្រះពីបទ “អំពើសូកប៉ាន់សាក្សី”។
កាលពីថ្ងៃទី២៣ ខែតុលា ឆ្នាំ២០១៨ អ្នកទាំង៥រូបបានដាក់ពាក្យបណ្ដឹងឧទ្ធរណ៍ ដោយមិនសុខចិត្តទៅនឹងសាលក្រមព្រហ្មទណ្ឌ ចុះថ្ងៃទី២៦ ខែកញ្ញា ឆ្នាំ២០១៨ របស់សាលាដំបូងរាជធានីភ្នំពេញ ដែលបានសម្រេចផ្ដន្ទាទោសពួកគេដាក់ពន្ធនាគារ ម្នាក់ៗកំណត់៥ឆ្នាំ ដោយត្រូវអនុវត្តក្នុងពន្ធនាគាររយៈពេល១៤ខែ និងសល់ប៉ុន្មានព្យួរ ពីបទ “សូកប៉ាន់សាក្សី” ក្នុងសំណុំរឿង «នាង ខុម ចាន់តារាទី» ហៅ «ស្រីមុំ»។
អ្នកទាំង៥រូប ត្រូវបានចាប់ខ្លួនដោយអង្គភាពប្រឆាំងអំពើពុករលួយ កាលពីថ្ងៃទី២៧ ខែមេសា ឆ្នាំ២០១៦ ពីបទ “សូកប៉ាន់សាក្សី” តាមមាត្រា ៥៤៨ នៃក្រមព្រហ្មទណ្ឌនៃព្រះរាជាណាចក្រកម្ពុជា ហើយត្រូវបានបញ្ជូនទៅឃុំខ្លួននៅពន្ធនាគាព្រៃស ”ម១” នៅថ្ងៃទី០១ ខែឧសភា ឆ្នាំ២០១៦ រហូតដល់ថ្ងៃទី២៩ ខែមិថុនា ឆ្នាំ២០១៧៕