អាជ្ញាធរខេត្តព្រះវិហារ បានរារាំងអ្នកភូមិមានជម្លោះដីធ្លីជាមួយក្រុមហ៊ុនចិន មិនឱ្យទៅដាក់ញត្តិនៅសាលាខេត្ត ដើម្បីសុំអន្តរាគមន៍ពីអភិបាលខេត្តជួយដោះស្រាយវិវាទដីធ្លី ខណៈជម្លោះនោះអូសបន្លាយជិត១០ឆ្នាំមកហើយ។
លោក សឿន ថា ដែលអះអាងថាជាប្រធានសហគមន៍ប្រើសក្អក បានប្រាប់ វីអូឌី ថាអ្នកភូមិប្រហែល២០០នាក់ មកពី៧សហគមន៍ ដែលកំពុងមានជម្លោះដីធ្លីជាមួយក្រុមហ៊ុនចិន «ហេងហ៊្វូ គ្រុប ស៊ូហ្គឺរ អីនដាស្ទ្រី (Hengfu Group Sugar Industry)» ស្ថិតក្នុងខេត្តព្រះវិហារ នៅថ្ងៃអង្គារនេះ បាននាំគ្នាជិះគោយន្តទៅដាក់ញត្តិនៅសាលាខេត្តព្រះវិហារ ដើម្បីសុំឱ្យអភិបាលបាលខេត្តព្រះវិហារ លោក ប្រាក់ សុវណ្ណ ជួយដោះស្រាយដីធ្លី ប៉ុន្តែត្រូវរារាំងដោយអាជ្ញាធរស្រុកត្បែងមានជ័យ។
ប្រធានសហគមន៍រូបនេះបានបង្ហាញការខកចិត្តចំពោះអាជ្ញាធរដែលមិនបានជួយរកដំណោះស្រាយវិវាទដីធ្លី និងបានរារាំងពួកគាត់មិនឱ្យទៅជួបអភិបាលខេត្តថែមទៀត។
លោកបន្ថែមថា៖ «ខ្ញុំគិតថា វាហាក់បីដូចជាអយុត្តិធម៌សម្រាប់ពួកខ្ញុំមែនទែន ព្រោះពួកខ្ញុំជាជនរងគ្រោះបាត់បង់ដីធ្លីដោយសារក្រុមហ៊ុនរំលោភយក ហើយពួកខ្ញុំឡើងទៅនេះ ដើម្បីសុំឱ្យអភិបាលខេត្តលោកជួយដោះស្រាយ ប៉ុន្តែបែរជាសមត្ថកិច្ចលោកចុះមករារាំងពួកយើងទៅវិញ។ ខ្ញុំមានការខកចិត្តចំពោះពួកគាត់ជាខ្លាំង»។
តំណាងសហគមន៍សម្បូរ លោក ផាន់ វណ្ណធី និយាយថា អ្នកភូមិមិនបានទៅបង្កបញ្ហាអ្វីនោះទេ ដោយពួកគាត់គ្រាន់តែទៅដាក់ញត្តិសុំឱ្យអាជ្ញាធរជួយអន្តរាគមន៍កាត់ឆ្វៀលដីសហគមន៍ និងដីអាស្រ័យផលរបស់ពួកគាត់ ចេញពីដីរបស់ក្រុមហ៊ុនតែប៉ុណ្ណោះ។
តំណាងសហគមន៍រូបនេះលើកឡើងថា អ្នកភូមិខ្លះបានចូលទៅអាស្រ័យផលលើដីរបស់ខ្លួនទាំងភ័យខ្លាច និងខ្លះទៀតខកខានចូលអាស្រ័យផលជាច្រើនឆ្នាំហើយ ក្រោយក្រុមហ៊ុនប្ដឹងពលរដ្ឋទៅតុលាការ។
លោកបន្ថែមថា៖ «ចង់ឱ្យគាត់ [អភិបាលខេត្ត] កាត់ឆ្វៀលឱ្យពួកយើង កុំឱ្យយើងធ្វើអាស្រ័យផលទាំងភ័យខ្លាច។ សព្វថ្ងៃ អ្នកខ្លះបានធ្វើ អ្នកខ្លះក៏អត់ វា[ក្រុមហ៊ុន]មិនទាន់ប្រគល់ឱ្យយើងធ្វើពេញសិទ្ធិអីណា»។
វីអូឌី មិនអាចសុំការបញ្ជាក់ពីអភិបាលខេត្តព្រះវិហារ លោក ប្រាក់ សុវណ្ណ និងស្នងការនគរបាលខេត្តព្រះវិហារ លោក សួស សុខដារ៉ា បានទេ នៅថ្ងៃអង្គារនេះ ខណៈលោកស្រី នួន វលក្ខណ៍ នាយករងរដ្ឋបាលសាលាខេត្តព្រះវិហារ បដិសេធអត្ថាធិប្បាយ។
មន្រ្តីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះវិហារ លោក ឡោ ចាន់ ចាត់ទុកករណីអាជ្ញាធររារាំងពលរដ្ឋមិនឱ្យទៅដាក់ញត្តិនេះ ថាជាការរឹតត្បិតសិទ្ធិសេរីភាពបញ្ចេញមតិ និងសិទ្ធិដាក់ពាក្យបណ្ដឹងរបស់ពលរដ្ឋ ដែលទង្វើនេះធ្វើឡើងផ្ទុយពីច្បាប់រដ្ឋធម្មនុញ្ញកម្ពុជា។
លោកបន្ថែមថា៖ «អាជ្ញាធរគាត់គួរណាតែរកដំណោះស្រាយជូនពលរដ្ឋ ជាពិសេសរឿងជម្លោះដីធ្លីដ៏រ៉ាំរ៉ៃមួយនេះមិនត្រូវបានដោះស្រាយទេ។ អាជ្ញាធរគួរណាហៅភាគីពាក់ព័ន្ធមកចរចារកដំណោះស្រាយ ជាជាងរារាំងពួកគាត់បែបនេះ»។
ក្រុមហ៊ុនចិន ហេងហ៊្វូ គ្រុប ស៊ូហ្គឺរ អីនដាស្ទ្រី តំណាងឱ្យក្រុមហ៊ុនចំនួន៥ មានក្រុមហ៊ុន ឡានហ្វេង, ក្រុមហ៊ុន រូយហ្វេង, ក្រុមហ៊ុន ហេងណុង, ក្រុមហ៊ុន ហេងយូ និងក្រុមហ៊ុន ហេងរូយ ទទួលបានដីសម្បទានសេដ្ឋកិច្ចសរុបជាង៤ម៉ឺនហិកតាពីរដ្ឋាភិបាលកម្ពុជាកាលពីឆ្នាំ២០១១ ដើម្បីដំណើរការឧស្សាហកម្មស្ករសនៅខេត្តព្រះវិហារ ដោយបង្កឱ្យមានជម្លោះដីធ្លីជាមួយពលរដ្ឋចំនួន៣ស្រុក រួមមាន ស្រុកឆែប ស្រុកត្បែងមានជ័យ និងស្រុករវៀង៕
